1  2  3  4  5  6  7 

8 Intoloy Diyos ay nangwani, “Sak-en si Yahweh ay Kangatoan ay Diyos. Kanayon ay iilaek din am-amagen di managbasol ay ipogaw sin ili ay nay. Daosak to daida sin labaw di daga, ngem adiak kaanen am-in din polin Jacob. 9 Ed wani, ibilin ko ay mayakayak to din polin Israel sin pantean da sin odom ay nanasyon ta say mailasin am-in din lawa. 10 Matey si kampilan am-in din managbasol sin ipogaw ko ay mangwani en laton ay adi dan maabotan si lawa.”

11 “Din nasyon ay Israel yan kaman beey ay nadadael, ngem wadan to di agew ay isaad ko kasin ya baroak din nadadael ta pomigsa ay kaman ed idi sin timpon Ari David. 12 Et sakopen dan to din odom pay ay lak-am di Edom ya din am-in ay ili ay sigod ay maibilang ay okak.” Siya say inbagan Diyos et sisya di manongpal.

13 Kanan aben Diyos, “Domteng to di timpo ay mayat ya palalo ay ad-ado di apit sin payew ya inobasan da. Din kaiarigana et mantedtedted di mam-is ay arak sin dodontog ya man-oy-oyas sin bilbilig. 14 Itaolik to din ipogaw ko sin daga da et amagen da kasin din nadadael ay siyodad da ta isdi di panbeeyan da. Man-esek das obas et daida di manginom sin arak ay kaamagana. Manmola da abe sin garden et daida di mangan sin apiten da. 15 Maiarig din ipogaw ko si mola ay is-ek ko sin daga ay indawat ko en daida et adi da polos magab-ot kasin.” Siya say inbagan Yahweh ay Diyos tako.