1 Idi makdeng pay din daong, kanan Diyos en Noe, “Senggep kayo am-in ay pamilya, tan sik-a anggoy di ammok sin labaw di daga ay nalinteg di ogali na. 2 Ipasgep yo abe di manparis sin am-in ay kalasin di animal ay maibilang ay kadodogis. Mo din maibilang ay nalinis pay,* Din maibilang ay kadodogis et din maiparit ay maidaton en Diyos ya maisida. Din nalinis pay et din maibagay ay maidaton ya maisida. ipasgep yo di sagpipito ay manparis. 3 Siya abe sin am-in ay kalasin di titit, ipasgep yo di sagpipito ay manparis. Say iyat mo di ta way iyat da am-in ay man-ganak ya maad-ado kasin isnan daga. 4 Tan mo emey di pito ay agew, ibaak di odan, et iweswes na ay mandeges si opatapolo ay agew ya labi enggana ay malned am-in ay pinarsuak isnan labaw di daga.” 5 Say inbagan Diyos di, et inamag Noe amin di naitogon en sisya.

6 Enem ay gasot di tawen Noe sin sinenggepana sin daong. 7 Daida ay sin-asawa ya din an-ak da ay da Sem en Ham ya si Jafet ya din as-awa da et sinenggep da am-in ta way iyat da ay mangilsot sin lebeng. 8 Inmey abe sin kad-an da Noe di manparis ay am-in ay kalasin di animal ya titit, pati manbodbodos ya mankodkodap, waday maibilang ay nalinis, wada abey kadodogis, 9 et nakisgep da am-in, tan siya met laeng di inbilin Diyos. Et asi pag in-eb Diyos.

10 Malabas pay di pito ay agew, dinmateng tet-ewa din lebeng. 11 Naitompong sin pitsa 17 di maikadwa ay bowan sin maikan-em ay gasot ay tawen Noe. Sin siya di ay agew, binomtak din poon di obbog ya ginawang et kabela am-in di danom sin oneg di daga. Kabokat abes Diyos sin kad-an di danom ed kayang 12 et logiana ay mandeges. 13 Ngem mo da Noe pay, laton ay sinesenggep da am-in ay pamilya sin daong, 14-16 pati am-in ay kalasin di animal ya titit ay inbilin Diyos, ay din maayew ya din atap, din dadakke ya din kinittoy ay lalaki ya babai.

17 Intoltoloy din odan ay dinmegedeges si opatapolo ay agew ya labi dowan dinmakdake din danom enggana ay tomay-apew din daong. 18 Intoltoloy din danom pay laeng ay domakdake et tinmay-atay-apew din daong sin labaw di danom. 19 Neyneyna et nalim-otan am-in di kakayangan ay dontog 20 enggana ay nasurok ay opat ay depa di kalosong di danom sin kayang di dontog ay sana. 21 Et nalned am-in di ipogaw ya am-in abe ay animal ya titit isnan labaw di daga. 22 Olay sino ay manlengleng-ag et natey, 23 tan dinosan Diyos daida. Din naipowira anggoy et da Noe ya din naitapi en daida sin daong. 24 Et kinmakaman din lebeng sin daga si sin-gasot ya limapolo ay agew.