30
1 2 3 4 5 6 7 8 9 10 11 12 13 14 15 16 17
Din Seg-ang Diyos Sin Ipogaw Na
(30:18-21,23-26)
Pag ipadton Isaias ay madosa din taga-Juda tan baken si Diyos di nantalktalkan da, mo adi et en da nakitolag sin taga-Egipto ta badangan das daida ay makigobat sin taga-Assyria. Binilin Diyos si Isaias ta isolat na din lawa ay ogalin di ipogaw na ta say waday mangipaneknek sin kinamanagbasol da sin tapin di agew. Kanana en magay silbin din tolong di taga-Egipto et bigla ay madosa din taga-Juda ay kaman kalamba ay dadlon magopak. Madosa da tan kanayon ay tetewengen da din ibagbagan Diyos babaen si mamadto ya adi dan kabagbagaan. Ngem pag nan kanan en daida: (30:1-17)
18 Olay mo siya di, sedsed-en Diyos din pansagongan yo en sisya ta ipaila na di seg-ang na en dakayo. Tan nalinteg si Yahweh ay Diyos et nagasat amin ay mantalek en sisya. 19 Somaldeng to di pan-og-ogaan yo, dakayo ay man-ili ed Jerusalem. Managseg-ang si Diyos et badanganas dakayo mo mankedaw kayo si badang na. 20 Olay mo dosaen Diyos dakayo, kanayon pay dedan ay wada di mangit-itdo en dakayo ay adi masapol ay anapen yo. 21 Mo masangaw kayo sin kannawan ono kannigid sin pandanan yo, madnge yo din kali na sin likodan yo ay kanana, “Sinay di pandanan yo.” 22
23 Sin agew ay sana, paodanen Diyos mo tonggal manmola kayo et ad-ado di apiten yo ya annawa abe di pastolan di animal yo. 24 Olay din baka ya dangki ay pan-alado yo yan pakanen yo sin kamayatan ay makan ay nas-et ay naisagana. 25 Wadan to di man-oy-oyas ay danom sin am-in ay dontog ya bilig sin agew ay sakopen yo din naaladan ay pantean di kalaban yo et ad-ado di matey. 26 Din selag di bowan et manbalin ay kaman din kapat-an di sey-ang di agew ya mamin pito abe ay kaman din sigod ay kapigsan di sey-ang di agew din sey-ang na. Mapasamak dana sin timpo ay pangagasan ya pamedbedan Diyos sin sogat ay inpalak-am na en dakayo ay ipogaw na.
Salakniban Diyos ed Jerusalem, ngem dadlonan abaken ya dosaen din taga-Assyria. (30:27–31:9)
27 28 29 30 31 32 33