45
Din Inkarin Diyos En Baruk
1 Siya na din inbagan din mamadto ay si Jeremias en Baruk ay anak Nerias idi nakdeng ay insolat Baruk si nalopilop ay papil din inbagbaga na en sisya. Sin doy ay timpo yan say maikap-at ay tawen ay nanturayan Jehoyakim ay anak Josias ay ari ed Juda. Kanan Jeremias, 2 “Siya na di kanan Yahweh ay Diyos di Israelita en sik-a ay Baruk: 3 Kankanam, ‘Kaasiak pay isna! Tinapian Diyos din ligat ko ya panladladingitak. Enggay nabbayak ay manpakpakaasi yan magay lomag-anana.’ ”
4 Ngem kanan Diyos: “Dadaelek din insaad ko ya gabotek din inmolak. Amagek na isnan intiro ay daga. 5 Apay nga an-anapem di somigedan di kasasaad mo? Adi kan say iyat, tan dosaek amin ay ipogaw, ngem sik-a pay yan adi ka maan-ano olay intoy em-emeyam.” Siya na di inbagan Diyos.
Din Naipadto Maipanggep Sin Odom Ay Nasyon Ya Din Nadadaelan Di Siyodad Ay Jerusalem
Wada abe di inpadton Jeremias maipanggep si odom ay nasyon ay ed Egipto, Filistia, Moab, Ammon, Edom, Damascus, Kedar, Hazor ya Elam. Kanana en makilak-am da am-in si dosa babaen sin taga-Babilonia, ngem asi pabaroan Diyos din kasasaad di nasyon ay Egipto, Moab, Ammon ya Elam. Pag dosaen aben Diyos ed Babilonia.
Sin naodi ay kapitolo (52:1-34) madad-at kasin din naabakan ya nadadaelan di Jerusalem. Din istorya ay nay et madtengan abe sin 2 Aari kapitolo 24-25. (46:1–52:34)