1 Anak ko, patiem din ibagak ya igtom din bilbilin ko sin nemnem mo. 2 Estem ay mandenge si sirib yan ipasnek mo ay mangawat. 3 Mankararag ka ay mankedaw si panang-awat. 4 Anapem ay kaman din iyat mo ay manganap si palata ono naitabon ay kinabaknang. 5 Mo say iyat mo di, maawatam di iyat mo ay mangipateg en Diyos et maammoam sisya ay kosto. 6 Tan si Diyos di poon di sirib et sisya di mangidawat si laing ya panang-awat. 7 Idawat na di kosto ay sirib sin nalinteg ya salsalaknibanas daida 8 tan ay-ayowanana din nalinteg ya matalek. 9 Mo dengngem sak-en, maammoam to di kosto ya nalinteg ay amagem ya din iyat mo ta magay panlaslasinem. 10 Tan manbalin ka ay masirib et maragsakan ka gapo sin laing mo. 11 Din kinaannad mo ya panang-awat mo et kaman siya da di manalaknib en sik-a. 12 Ilisi das sik-a ay man-amag si lawa. Mailisi ka abe sin ipogaw ay mangipalawlawa si gait na. 13 Daida din manokog si nalinteg ay panagbiyag et kaman dan wadas mabolinget. 14 Maragsakan ya maganasan da ay mangamag si lawa. 15 Nasikap ya makaetek da, adi dan katalek.

16 Mailisi ka abe sin makaawis ay kalin di manakikamalala ay babai 17 ay nanaynan si asawa na et niliw-ana din kari na sin sangoanan Diyos. 18 Din beey na yan kaman danan ay manturong si pese, tan din senggep sidi et omas-asag-en da sin kad-an di natey. 19 Din en manteng en sisya et adi polos mantaoli ya adi kasin makadteng sin danan ay manturong si biyag.

20 Isonga say onodam din panagbiyag di siged ya nalinteg ay ipogaw. 21 Tan din kaman dadi et daida di matagotago ya mantetee sin ili, 22 ngem din mangam-amag si lawa ya din baken matalek yan makaan da.