1 Din kinasirib yan maiarig si ipogaw ay nangisaad si beey na ya tinood na din pito ay posti na. 2 Nanparti si animal na ya nantimpla si arak. Insagana na abe din lamisaan. 3 Binaa na din baa na ay babbabai ta emey da sin kakayangan ay lugar sin ili yan kanan da: 4 “Dakayo ay magay ammo na ya dakayo ay naong-ong, 5 omali kayo ta mangan kayo ya inomen yo din tinimplak ay arak. 6 Dokogan yo din ogalin di magay nemnem na yan onodan yo din panagbiyag di masirib ta matago kayo.”

7 Din mamagbaga si manlaslasoy ya sin mangam-amag si lawa et maoyaw ya mapabainan anggoy. 8 Isonga adi kan bagbagaan di ipogaw ay makalasoy, tan iliget nas sik-a. Ngem mo say bagbagaam di masirib, laylayden daka. 9 Bagbagaam di masirib et matapian din sirib na. Itdoam di nalinteg et matapian din laing na.

10 Din egyat ya panangipateg di ipogaw en Diyos, say poon di sirib. Din pangammoan di ipogaw en Diyos ay nasantoan et say lomaingana. 11 Tan begew sin sirib et omando di biyag mo, matapian si piga ay tawen. 12 Mo masirib ka, sik-a di manlak-am si siged. Mo makaoyaw ka, sik-a anggoy di man-ikaro.

13 Din kinaong-ong et maiarig si babai ay ngalawngaw, magay ammo na ya magay baina. 14 Tomokdo sin pantew di beey na ono sin kangatoan ay partin di siyodad 15 yan ayagana din malablabas ay adi makibibiyang sin am-amagen di odom. 16 Kanana sin magay nemnem na, “Dakayo ay nengneng, omali kayos na, 17 tan mam-is di danom ay naakew. Mam-is abe di makan ay ilimed ay kanen.” 18 Ngem adi dan ammo ay matey di emey en sisya et din odom yan enggay wada da sin kad-an di natey.