1 Din ipogaw ay adi na ammo ay makikadwa si gait na ay ipogaw et din awak na anggoy di nemnemnemena. Kontraena am-in ay kosto sin pannemnem di odom.

2 Adi layden di naong-ong ay man-adal, laydena anggoy ay mangibaga sin wadas nemnem na.

3 Din pangamagan si lawa et say kalaslasoyan ya kaibabainan.

4 Din kalin di masirib et maiarig si malosong ay ginawang ay adi katdok.

5 Lawa mo pangabaken din nakabasol ya adi maitonton din kalintegan di magay basol na.

6 Din kalin di naong-ong yan say begew si pakiibawana ya kasoplitana.

7 Din kali na yan maiarig si bito ay kaknaana ya kadadaelana.

8 Din apat di tayoktok yan kaman makan ay mam-is ay okmonen.

9 Din kalawlawan di nasadot yan magay kaitkenana sin makadadael si ib-a na.

10 Si Diyos yan maiarig si makneg ay pantabonan ay pankamangan din nalinteg ay ipogaw.

11 Sin pannemnem di babaknang yan maiarig din sanikwa da si nakayang ay alad ay pansalinan da.

12 Din mangipapangato si awak na yan say begew si kadadaelana. Masapol ay manpakombaba di esa ay ipogaw, asi maidayaw.

13 Kababain mo waday somongbat ay adi na dengngen omona di salodsod, yan say kailaan di kinaong-ong na.

14 Din pigsan di nemnem di ipogaw di makatolong en sisya sin sakit na, ngem mo magay pigsan di nemnem na, makaan abe di namnama na.

15 Din masirib yan nakasagana ya laylaydena ay man-adal.

16 Idawtam si sagot din nangato ay ipogaw mo laydem ay maam-ammos sisya.

17 Din ibagan di damo ay mankali sin pangokoman yan kaman kosto mo daan mankali din kalabana.

18 Mabalin ay makeddengan di naligat ay kaso babaen si binonotan ay maikamang en Diyos.

19 Naligligat ay itaoli din panakikadwan di napasakitan di nemnem na ay gayyem mo din iyat ay lomsot si alad di siyodad.

20 Apiten di ipogaw di am-in ay ibongan di kali na.

21 Din kali et makabalin ay say katagoan ono kateyan, isonga din manglaylayad ay mankali et masapol ay awatena mo sinoy ibongan di kali na.

22 Din mangasawa, siged dis gon-odena, tan din asawan di ipogaw et kailaan di seg-ang Diyos en sisya.

23 Manpakpakaasi di nabiteg ay mankali, ngem din baknang yan bodtak di songbat na.

24 Waday odom ay gagayyem ay domadael, ngem waday odom ay nasursurok mo agi di kinapodno da.