1 Adi kan omapal ono makigayyem sin managbasol, 2 tan kedse ya golo di nemnemnemen da ya kalkalien da.

3 Babaen si sirib ya panakaawat, maisaad ya komneg di beey. 4 Babaen si laing, mapno di kowarto na si nankababanol ay gameng.

5 Din masirib ay ipogaw yan dakdakdakey panakabalina mo din mabikas. Nabanbanol abe di laing mo din pigsan di awak. 6 Tan mangabak di ipogaw si gobat gapo sin siged ay pamagbaga ya ad-ado ay plano.

7 Adi maawatan di naong-ong din planon di masirib ay ipogaw, isonga mo matopog di papangolo ta manngalat da, magay maibaga na.

8 Am-in ay manplanos lawa et mandinamag ay makedse da. 9 Din planoen di naong-ong yan basol. Kaliliget di ipogaw di makalasoy.

10 Nakapsot di nemnem di ipogaw ay manpaabak si ligat.

11 Isalakan mo din nakeddengan ay matey. Adi ka baybay-an mo ikaan da ta en da peslen. 12 Adi kan kanan en adi ka ammo, tan kabaelan Diyos ay ilaen din wadas nemnem mo. Ammo na di nemnemnemen ya am-amagen di am-in ay ipogaw et gon-gonaana am-in maibasar sin am-amagen da.

13 Anak ko, mangan kas anig, tan waday panmayatana ya mam-is. 14 Siya abe ay waday panmayatan di sirib sin nemnem mo. Mo magon-od mo, waday mayat ay namnamam sin tapin di agew yan sigurado ay matongpal.

15 Adi kan tadonen di tollisan. Adi kan mansiim si akewem sin beey di nalinteg. 16 Tan olay mo mamin pito ay maisokba din nalinteg, bomangon met laeng. Ngem mo din managbasol di maisokba, adi makabangon.

17 Adi ka koman manragsak ay mangila sin kaisokbaan ya katokangan di kaibaw mo. 18 Mo say iyat mo di, adi malaydan si Diyos et makaan din bonget na en daida.

19 Baken koman magolo di nemnem mo begew sin mangam-amag si lawa ya adi kan apalan daida. 20 Tan magay mayat ay pantongpalan da et kaman dan lampa ay mad-ep.

21 Anak ko, patgem ya egyatam si Diyos ya siya abe sin ari. Adi kan maitapi sin komontra en daida. 22 Tan magay makaammo sin bigla ay idawat da ay dosa.

23 Nay da di odom ay pamagbagan di masirib. Baken mayat mo waday pabpaboran sin pangokoman. 24 Din mangikeddeng ay magay basol di nakabasol et baosan ya kaliliget di kaipoipogaw isnan lobong. 25 Ngem din howis ay manosa si nakabasol et somiged di biyag da ya mabindisyonan da.

26 Din ipogaw ay kosto ya naimposoan di songbat na et ipaila na di napodno ay panakigayyem.

27 Isaganam din payew mo ya manmola ka omona asi kan amagen di beey mo.

28 Adi kan pabasolen di ib-am mo magay kosto ay gapo na, adi ka aben palawlawaen. 29 Adi ka aben kanan en ibaes mo din inamag na met laeng en sik-a.

30 Sin namingsan, nalabasak sin payew ya inobasan di nasadot ay ipogaw ay magay nemnem na. 31 Enggay nabeas ya nagodogod abe din batog ay alad na. 32 Idi inilak di, waday inadal ko. 33 Mo kanam en maseyep kas at-atik ono man-illeng ka anggoy, 34 di pantongpalana et bigla ay bomiteg ka ay kaman din inakewan di tollisan.