Salmo 6
6
Kararag Di Ipogaw Ay Maligligatan
1 Adi ka kod yomamyam ya domosdosa, Apo,
begew sin bonget mo.
2 Maseg-ang ka ta pabikasem kasin nan awak ko,
tan enggay kinmapsotak, palalo nan sakit ko.
3 Palalo abe ay magolo nan nemnem ko.
Pig-an pay ay pasaldengem nan ligat ko?
4 Somagong ka kod ta omisalakan ka, Apo,
gapo sin adi manbalbaliw ay layad mo.
5 Tan sin kad-an di natey, magay mannemnem en sik-a,
sin isdi magay mandayaw en sik-a.
6 Gapo sin ladingit ko, kinmapsokapsotak.
Linablabi ay man-og-ogaak sin kaseyseyepak,
et mabasbasa din pongan ko si lowak.
7 Begew sin kalaban ko, kinmapsot nan matak,
tan linmadaladag da gapo si kaoogak.
8 Dakayo ay mangam-amag si lawa, omaddawi kayo,
tan dinngen Diyos din adawag ko,
9 et sigurado ay patgana din kararag ko.
10 Maabak din kalaban ko et emegyat da.
Dalasen da ay lomayaw gapo si bain da.