Salmo 17
17
Kararag Di Nalinteg Ay Ipogaw
1 Sik-a ay Diyos, dengngem kod nan kararag ko
ay manpakpakaasi si badang mo
ta iturong mo kod din kosto,
tan naimposoan nan kararag ko.
2 Ikeddeng mo koma ay maga di basol ko,
tan ammom din kostokosto.
3 Ammom di wadas nemnem ko.
Mo sin labi yan pomadas ka, Apo,
mailam ay magay basol ko.
Magay binmasolak begew sin tepek ko,
4 ay kaman din am-amagen di odom ay gagait ko.
Din kedse da abe et baken say tinadtadon ko,
mo adi tinongtongpal ko din inbagam ay bilbilin mo.
5 Say kanayon ay inonodak din laydem, Apo,
maga polos di nilabsing ko.
6 Mankararagak en sik-a, Apo,
tan patgam din kararag ko,
isonga dengngem ta songbatam nan kararag ko.
7 Ipailam kod din nakaskasdaaw ay layad mo,
tan sik-a di mangisalakan babaen sin panakabalin mo
sin am-in ay mangan-anap si pankamangan da
mo ilayawan da din kaibaw da.
8 Bomantay ka ay kaman din iyat mo
sin kabanolan ay gameng mo.
Somalaknib ka sin payak mo
9 ta adi omdas din kalaban ko ay mankakekedse,
tan nay linmikob da et layden da ay pomse.
10 Magay seg-ang da ya natangsit di kali da.
11 Enggay linmikob da, am-in ay emeyak yan wada da.
Manseseed das mayat ay timpo ta pomse da.
12 Kaman dan layon ay manseseed si kanen da,
tan mantabon da ta manseed das doklosen da.
13 Apo, din kalaban ko yan sangoem koma
ta say abakem daida.
Babaen sin kampilan mo, omisalakan ka
sin mangam-amag si lawa.
14 Babaen sin panakabalin mo, omisalakan ka koma
sin ipogaw ay naimongsan di nemnem da
sin gamgameng ay wadas nan daga.
Mapnek da koma sin insaganam para en daida.* Kanan di odom en din ibagbagan di versikulo ay nay et din dosa ay insaganan Diyos para sin mangam-amag si lawa. Di odom pay, kanan da en din maibagbaga isna et din bindisyon ay insaganan Diyos para sin ipogaw ay banbanolena. Baken nalawag din naisolat sin Hebreo.
Mansobsobra koma din an-ak da,
ya wada abey mabay-an para sin apo da.
15 Mo sak-en pay, mailak to din ropam, Apo,
gapo ta magay lawa ay inamag ko.
Mo bomangonak et manragsakak to
gapo sin kawadam, Apo.
*17:14 Kanan di odom en din ibagbagan di versikulo ay nay et din dosa ay insaganan Diyos para sin mangam-amag si lawa. Di odom pay, kanan da en din maibagbaga isna et din bindisyon ay insaganan Diyos para sin ipogaw ay banbanolena. Baken nalawag din naisolat sin Hebreo.