Salmo 40
40
Kanta Ay Pangdayaw Di Ipogaw En Diyos Ya Kararag Ay Mankedaw Si Badang Na
1 Inanosak ay sinsin-ed din badang Diyos Apo,
inmosdong et dinnge na din kararag ko.
2 Inmisalakan sin kaeegyat ay bito ay naikosnongak
ay kad-an di pitek ay nailemlemak.
Inmipatang sin dakdake ay bato,
et mandanak ay magay egyat ko.
3 Baro ay kanta di initdo na ta ikansiyon ko.
Panangdayaw en sisya ay Diyos tako.
Ad-adon to di makaila et emegyat da
ya mantalek dan sisya.
4 Nagasat din mantalek en Diyos
ay adi masangaw ay makidayaw si sinan didiyos.
5 Magay makaison sik-a, Yahweh ay Diyos mi.
Nakaskasdaaw din inam-amag mo para en dakami,
et siya abe sin planom paran dakami.
Adiak makaibaga mo dad-atek amin dana,
tan palalo ay ad-ado da.
6 Baken din napalpalti ay animal ya odom ay daton di laylaydem.
Baken abe din kapopooan di animal ya odom ay daton para sin basbasol di panragragsakam.
Ngem indawat mo din ingak ay mannge sin ibagam.
7 Et naeyak ay Diyos ay manongpal sin laydem
ay kaman din inpaisolat mo sin nalopilop ay libro maipanggep en sak-en.
8 Laydelaydek ay onodan din laydem ay Diyos ko.
Kanayon ay nemnemek din linteg mo.
9 Inpaammok din kosto sin gimong di am-in ay ipogaw mo,
adiak met ginmiginek et ammom ay Diyos Apo.
10 Magay binokbokodak, kanayon ay dinad-at ko
din omiparagsak ay pangisalakanam ya kinamatalek mo,
siya abe sin adi manbalbaliw ay layad ya seg-ang mo.
11 Din seg-ang mon sak-en, mantoltoloy koma.
Kanayon koma ay somalaknib ka,
begew sin komakaman ay layad mo
ya din kinamatalek mo.
12 Tan nanliniked nan problemak, palalo ay ad-ado.
Adiak makaila tan kaman tomab-ok nan basbasol ko,
ad-ado da mo din kabibilang di book ko,
et enggay nakaan di toled ko.
13 Apo Diyos, pangaasim koma
ta dalasem ay omisalakan ka.
14 Sapay koma ta maabak ya maibabain da
din manpanggep isnan biyag ko
ya malaydan sin ligat ko.
15 Din lomaslasoy, maibabain da koma
begew sin kaabakan da.
16 Ngem din mangan-anap en sik-a,
sapay koma ta manragsak da.
Amin ay man-iyaman sin panangisalakan mo,
kanayon koma ay kanan da, “Nangatongato si Diyos Apo.”
17 Kaseseg-angak ay nabiteg kayman,
ngem adi ka met lomiwliw-an.
Diyos ko ay omisalakan,
dalasem koma ay bomadang.