Salmo 81
81
Pamagbagan Diyos Ta Patien Din Ipogaw Nas sisya
1 Begew si ragsak yo, ibogaw yo din kanta yo
ay mangidaydayaw en Diyos ay napoan di pigsa tako.
Sisya din Diyos ay dinaydayaw Jacob ay apo tako.
2 Manambol kayo, ilogi yo ay mankanta!
Kompasan yo si arpa ya gitara
ta say makaay-ayo di kadngeana.
3 Mananggoyob kayo ay mangipaammo sin fiesta
sin beskan di bowan ya pan-inatana.
4 Tan ed Israel, naibilin dana ay linteg,
bilin Diyos ay dinaydayaw Jacob.
5 Sin Israelita, inbilin di Apo
sin nangobatana si taga-Egipto.
Wada et di dinngek ay kali ay adiak ammo:
6 “Kinaan ko din nadagsen ay binaklay yo,
kinaan ko din baskit sin takkay yo.
7 Sin timpon di ligat yo, nankararag kayo
et insalakan kos dakayo.
Sin kido ay nantatabonak, sinongbatak dakayo,
sin kad-an di obbog ed Meriba pinadas kos dakayo.
8 Dakayo ay ipogaw ko,
dengngen yo din pamagbagak en dakayo,
et sapay koma ta pomati kayo.
9 Maga koma di odom ay diyos yo,
maiparit di sinan didiyos ay pandokmogan yo,
10 tan sak-en si Yahweh ay Diyos yo
ay nangikaan en dakayo ed Egipto.
Mantakaw kayo ngarud et pakanek dakayo.
11 Ay apaw kayo ay ipogaw ko,
adi yo pinatpati din inbagak en dakayo.
12 Isonga binaybay-ak dakayo ta onodan yo
din wadas makenteg ay nemnem yo.
13 Dakayo ay Israelita ay ipogaw ko,
sapay koma ta pomati kayo,
tan mo tongpalen yo din bilin ko,
14 abakek ay dagos amin ay kalaban yo.
15 Din omililiget et manyakog-ong dan sak-en si egyat da
ya madosa da si eng-enggana.
16 Ngem pakanek pay dakayo
si kamayatan ay bakakew ya kam-isan ay diro.”