Salmo 87
87
Din Kaidayawan Di Dontog Ay Zion
1 Insaad Diyos din siyodad ay Zion sin dontog ay pinili na.
2 Binanbanol Diyos din siyodad ay sana
mo din odom ay lugar di Israelita.
3 Dakayo ay man-ili isnan siyodad di Apo dengngen yo,
nan nabanol ay ibaga na maipanggep en dakayo:
4 “Mo listaek di nanongtongpal sin bilin ko,
itapik din taga-Babilonia ya Egipto.
Din taga-Filistia, Etiopia ya Tiro
et maibilang da ay man-ili ed Zion ay siyodad ko.”
5 Awni et si Diyos ay Kangatoan
yan papigsaena din siyodad ay Zion,
et din kaipoipogaw yan kanan da,
“Man-ili kami abe sin isna.”
6 Kadi et mo listaen Diyos din ipogaw na,
ibilang na ay naianak da am-in isna.
7 Awni et mansala da dowan dan kanan ay mangikankanta,
“Din laklak-amen tako ay bindisyon
et napo da am-in ed Zion.”