Salmo 96
96
Si Diyos Din Kangatoan Ay Ari
1 Ikantaan yos Diyos si baro ay kanta,
ikantaan yos sisya, amin ay ipogaw isnan daga.
2 Dayawen yos sisya babaen sin kanta yo.
Inag-agew ay dad-aten yo
din nangisalakananan datako.
3 Dad-aten yo sin nanasyon din kinangato na
ya din nakaskasdaaw ay inam-amag na.
4 Tan nangato si Diyos et lebbeng na ay daydayawen yo ay kosto,
baken odom ay diyos mo adi et sisya anggoy di patgen yo.
5 Tan din daydayawen di odom ay nanasyon isnan daga
et owat sinan didiyos ay magay silbi na,
ngem si Diyos pay et pinarsua na din am-in ay wadad daya.
6 Madaydayaw sisya, mabigbig di kinangato na.
Din panakabalina ya mankoniniing ay kinadiyos na
et pon-en da din Timplo na.
7 Dayawen yo si Diyos, amin ay nasyon isnan daga,
bigbigen yo din panakabalin ya kinadiyos na
8 ya din madaydayaw ay ngadana.
Iey yon daton yon sisya
ya senggep kayo sin Timplo na.
9 Mandokmog kayo ay mandayaw en sisya
ay maptemapteng din kinasanto na.* Di odom ay kaiologan nina sin Hebreo et: 1) Nasantoan koma di bado yo ay mandayaw en Apo 2) Mandokmog kayo en sisya ay nasantoan, mo sin Timplo di ena panpailaan.
Manpayegpeg kayo si egyat yo sin sangoanana,
amin ay ipogaw isnan daga.
10 Amin ay nasyon di pangibagaan yo
ay enggay man-ari si Diyos Apo.
Insaad na ay kosto din daga et adi maikiwkiweg.
Din pangokomana sin kaipoipogaw yan nalinteg.
11 Manragsak kayo ay wadad daya ya isnan daga,
manragsak kayo ay baybay ya amin ay linaona,
12 dakayo abe ay papayew ya amin ay molmola,
ibogaw yo din ragsak yo, kakaiw sin kada.
13 Manragsak kayo sin omalian Diyos ay mangituray sin daga.
Magay pabpaborana ya nalinteg di iyat na
ay mangokom ya mangituray sin ipogaw isnan daga.
*96:9 Di odom ay kaiologan nina sin Hebreo et: 1) Nasantoan koma di bado yo ay mandayaw en Apo 2) Mandokmog kayo en sisya ay nasantoan, mo sin Timplo di ena panpailaan.