Salmo 100
100
Kanta Ay Pangdayaw En Diyos
1 Kaipoipogaw isnan daga, ipigsa yo koma ay mangikanta
sin pangidaydayawan yo en Diyos ed daya.
2 Omali kayo sin sangoanana ay mankankanta,
naragsak kayo koma ay manaydayaw en sisya.
3 Bigbigen yo ay si Yahweh et Diyos Apo.
Sisyay namarsua en datako et oka nas datako,
et kaman takon karnero sin pastolan di Apo.
4 Man-iyaman kayo ya dayawen yos sisya
mo senggep kayo sin Timplo na.
5 Tan si Yahweh et siged sisya.
Magay pap-eng din seg-ang ya layad na.
Matalek abe si eng-enggana
ay manongpal sin amin ay inkari na.