Zekarias
Maipanggep Sin Libro Ay Nay
Si Zekarias et baken owat mamadto mo adi et padi abe. Din olog di ngadana et adi linglinglingan Diyos. Naianak sisya ed Babilonia et naitapi sin 50,000 ay Judio ay nantaoli ed Juda sin 538 B.C. ay inpangon da Zerubbabel en Josue. Inlogin din kaipoipogaw ay mangisaad kasin sin Timplo, ngem begew sin nangonkontra en daida, insaldeng dan obla si nasurok ay sinpo ay tawen.
Din panggep Zekarias ay nangaskasaba et ta papigsaena din nemnem di kailiana ta itoloy da ay mangamag sin Timplo ya ta mabaroan abe di ogali da. Ad-ado di inpadton Zekarias ay maipanggep sin Mesias mo din odom ay mamadto, powiras Isaias. Inpadto na din damo ay inmaliana ya kaipogaw na (6:12), din kinapadi na ya turay na (6:13), din kinadiyos na (13:7), din nalipotana (11:12-13), din panturayana (9:10) ya din kasinan omalian (14:4). Ad-ado abe di inpadto na maipanggep ed Jerusalem ya din pangokoman Diyos sin nanasyon. Mo basaen tako din libro ay nay, maawatan tako din panakabalin Diyos ay mangituray sin ipogaw ya nanasyon ed nabaon, ed wani, ya siya abe sin tapin di agew.
Din Linaona
Din nangayagan Diyos sin ipogaw na ta manbabawi da 1:1-6
Din naipaila en Zekarias ay kaman iitaw 1:7–6:8
Din nadotokan Josue ay kangatoan ay padi 6:9-15
Din maipanggep si kaitpean di dagaang 7:1-14
Din kasin pamindisyonan Diyos ed Israel 8:1-23
1
Din Nangayagan Diyos Sin Ipogaw Na Ta Manbabawi Da
(1:1-6)
1 Sin maikawao ay bowan sin maikadwa ay tawen di turay Darius, waday inpaibagan Diyos sin mamadto ay si Zekarias ay anak Berekias ay anak Iddo. 2 Kanan Zekarias, “Palalo di bonget Diyos ay Kangatoan ay Turay sin aap-o yo. 3 Isonga kanana en dakayo, ‘Sagongen yos sak-en ta awatek dakayo. 4 Adi yo tadonen din aap-o yo ed idi. Kinaskasabaan di mamadto si daida ta manbabawi da sin basbasol da ya sagongen das sak-en ngem adi da pinatpati. 5 Ed wani, enggay natey da amin din aap-o yo ya mamadto. 6 Binagbagaak ya inpaammok din bilbilin ko sin aap-o yo babaen sin mamadto, ngem adi da pinatpati, isonga nadosa da. Pag dan manbabawi yan kanan da: Kosto baw din inkeddeng Diyos ay dosa tan maibagay sin inam-amag tako.’ ”
Din Nangon-ona Ay Naipaila En Zekarias Ay Kaman Iitaw
7 8 9 10 11 12 13 14 15 16 17 18 19 20 21
(2:10-13; 3:7-10)
Wada di wao ay kaman iitaw ay inpailan Diyos en Zekarias ta say mapapigsa di nemnem di ipogaw ay nantaoli ed Juda. Din damo ay inila na et lalaki ay nangakabayo si manbalanga ay kabayo. Wada di odom ay nangakabayo ay inmey sin kad-ana et inpadamag da en sisya din mayat ay kasasaad di odom ay nanasyon isnan daga, dowan kaseseg-ang da pay laeng ed Juda. Pag kanan din anghel ay kangalat Zekarias en laton ay seg-angan Diyos ed Jerusalem et maamag kasin din Timplo. Bomaknang abe kasin din kailiili ed Juda.
Din maikadwa ay iniitaw na et inila na di opat ay sakngod ay kaiarigan din napigsa ay nanasyon ay nangisian sin taga-Israel ya Juda ed idi. Asi et dinmateng di opat ay karpintiro ay nananggen si martilyo ta paegyaten da din sakngod ya abaken das daida.
Din maikatlo ay iniitaw na et inila na di lalaki ay nananggen si panlokod. Linokod na ed Jerusalem ta way iyat na ay kasin mangamag. Kanan din anghel en palalo ay ad-adon to di ipogaw ya animal ed Jerusalem isonga magay alad di ili si omanay, ngem laton tan salakniban Diyos ay mismo din siyodad babaen si apoy sin nanniliked di siyodad. (1:7–2:9)