Na Luuk
A Lagasai Roxo Na Luuk A Xaleie
A Ferawaian Paamua
Lana Lagasai Roxo na Luuk fo xaleie i taxa faxalit netaara o na Yesus ve a mataa ina siak faꞌuli a mu Israel e mu rabuna aava ri waan la pabung patak sait. Layaan na Yesus rao i fatamasiak a faisok sina, nane xuus a mu rabuna o a Vovau Xaradak a fatamasiaxe xena kuusan fasavat a ferawaian sina Piran xe sina mu valagof (4:18). E tuuna paaliu, lana lagasai aanabeꞌ na Luuk a ferawai o na Yesus a muluk a mu rabuna aava ri taxa yaas a maana buk matafanan xaves e nane xavang nari.
A maana mo aava na Yesus a vile a fafaamamaas a mu rabuna sina. Layaan na Maria a luxe a mu rabuna ri faamamaas faagut paaliu pana (1:42-48 e 2:10). E la fataxapiak ina lagasai, ri faamamaas faagut paaliu (24:25) layaan na Yesus a laak xe la xunavata.
Saxano mo aava na Luuk a kuusane se Yesus a xasanu Lagasai Roxo ri pife kuus pana. Na Luuk sang mon a ferawai pana maana mo xaves aava savat layaan na Yesus a savat la xavala. Lana palagasai 10 na Luuk a xalei a ferawaian paap aava na Yesus a ferawai pana sena mataa ti Sameria aava xavang a saxa Juda aava sipan la salan, e lana palagasai 15 a ferawai paap pana lak aava taꞌulan na tamana e femilung xolai, e saxano ferawaian paap fulaa maan vaxa. Na Luuk sang vaxa a xalei a xuuskuus pa Sekias aava mataa ina siak taakis.
Na Luuk a ferawai faaxaves pana vilaana ina fenung faagut, a faisok sina Vovau Xaradak e a vilaana sina Piran xena lamon tapin a faasaalan sina rabuna. Nane ferawai faaxaves vaxa pana maana mo aava lutefin ri fo vile.
A ferawaian si Luuk pife taxapus naboxo lana lagasai aanabeꞌ, piau. Nane xalei vaxa a lagasai taara xalie pana Faisok Sina Mu Yaamut aava kuusan a maana mo aava mu yaamut ri vile lamina yaan na Yesus fo laak xe la xunavata.
1
A Fasisian
1 A maana rabuna xaves ri fo kala sena maana mo aava Piran fo fasavate la matavas la palou itaara. 2 A maana mo aave a mu rabuna aava ri fefeng sina Piran ri xuus fatexaas netaara pana senaso ri xalume ti la tangpat. 3 Naboxo a toxan a maana xakalayan xaves. E nenia na Luuk, ne fo fiai faaxaves pana maana mo xapiak aava fo savat ti la tangpat e voxo ne lamon rao ne taa kala xena faxuvul faroxoi a maana xuuskuus aave xena lisanaana xe siim, matalava Tiofilas. 4 E layaan no taa kate, no taa texaas sena tuunayan ina maana mo ri fo fapiti nano pana.
Na Gebriel A Lisan A Lagasai Xe Si Sekaraia
5 Lana yaan si Herot aava paamua lava pe Judia, a toxan a saxa priis a isina na Sekaraia. Nane a saxa bu Eron ti la pabung si Abiya. A mu bu Eron ri fuuna vil a faisok ina priis lana lifu ina nangusaana Piran. A tefin si Sekaraia, isina na Elisabet, nane vaxa a bu Eron. 6 Nare xapiak re waan fatak la matana Piran senaso re usi faroxoi a maana fefasaian e mu vuputkai sina Memai e re piau ta lalosaat. 7 Taasaxa re piau ta lak senaso na Elisabet ve a tefin mala. E nare xapiak vaxa re fo vaiak xo.
8 Saxa yaan layaan a parabuna priis si Sekaraia ri taxa vil a faisok ina priis siri la lifu lotu, na Sekaraia taxa sisiak la matana Piran. 9 E pana vilaana ina tapin a faat ri siak fati na Sekaraia xena laak la lifu lotu sina Memai talo i taa faram a vulut pana lasan roxo. 10 La yaan ina faramaana xo a savat e mu rabuna aava ri savat xena nangus a Piran, ri taxa faxuvul lamalei e ri taxa fenung.
11 E lana yaan fatak aave a angelo sina Memai moxo a savat xe si Sekaraia e a tigina la pamuaan ina nobina ina faramaana vulut aave. 12 Layaan na Sekaraia a xalume, nane ipul marasaxa e femataut faagut. 13 Taasaxa angelo aave a xuuse, “Muta mataut, Sekaraia. A Piran a langai a fenungan siim e na naasaam, na Elisabet, i taa luk a lak tomexaan e no taa faꞌisine pa Jon. 14-15 I taa vil fafaamamaas name. E maana rabuna xaves ri taa faamamaas sena luluuxan sina senaso i tafe lava la matana Memai. E i taa pi nunum a raarum tateak o xasano mo malaan e i tafe bas pana Vovau Xaradak ti la yaan ina luluuxan sina. 16 I taa lisan faꞌuli a maana rabuna ti Israel xe sina Memai aava Piran siri. 17 E i taa falet paamuin a Memai lana vilaana e gutan si Ilaija. I taa puk faꞌuli a vubuxanan sina mu tamana rafulak xe sina mu rafulak siri e a rabuna aava ri langai pesalai xe sina texaasan ina mu vilaana fatak. Nane taa vil malaane xena faigotanaana rabuna aava ri taa bang a savatan sina Memai.”
18 Na Sekaraia a fin a angelo aave, “Ne taa texaas sena tuunayan ina malaafaa? Nenia, ne mataa vaiak e a tefin siak sait a toxan a mariaas xaves.”
19 A angelo xo a suie, “Nenia ve na Gebriel e ne fuuna tigina la matana Piran. Nane xa a fengau xena xuus fatexaas nano pana lagasai roxo aanabeꞌ. 20 E naboxo, senaso no pife namkai sena ferawaian siak, no taa po. No taa pife ferawai fefexaxaas a yaan aave fo savat. E i taa savat tuuna lana yaan fatak ina.”
21 Lavaxa, a mu rabuna pe lamalei si, ri taxa lo waan bang na Sekaraia. Ri taxa lalamon pana senaso fo waan a yaan modus paaliu lana lifu lotu. 22 Layaan nane savatmaan xe lamalei ri texaas o nane xalum a saxa mo lana lifu lotu senaso pife fexaxaas sena ferawai taasaxa fakalimaan mon pana mana.
23 Lamina fulun saxa, layaan a yaan ina faisok sina xo a taxapus, nane ulaa xe la lifu sina. 24 E mui lamina, a tefin sina, na Elisabet moxo fetiva e pana fulun pama a waan fufunai mon pe la lifu sina. 25 Na Elisabet a kuus, “A Memai fo vil a mo aanabeꞌ xaanak. Lana yaan aanabeꞌ nane faxalitau pana xakaavangan xatam sina. Nane siak tapin a mangilan siak la matana mu rabuna.”
Na Gebriel A Savat Si Maria
26-27 La fapisaxayaana fulun si Elisabet, a Piran a feng a angelo naang, na Gebriel, xe pe Nasaret, a saxa bina pe Galili. Nane fe savat sina saxa tefin palau aava ri fakalimaane rao i taa tamai si Yosep aava bu Devit. A tefin aave a isina na Maria. 28 A angelo aave xo a savat sina e a xuuse, “A luaian xulum. A Piran a waan xuvul pama e a xafut nano pana roxoyan sina.”
29 Na Maria a mamaxus sena ferawaian sina e a lalamon faaxaves pana so ta buk fasusuian va malaan. 30 Taasaxa, a angelo a xuuse, “Muta mataut Maria, a Piran a faamamaas paaliu pama. 31 No taa tiva e no taa luk a lak tomexaan. E no taa faꞌisine pa Yesus. 32 Nane tafe lava e ri taa xalie pana Lak Tomexaan sina Piran pana Isin Molava Paaliu. E a Memai Piran i taa faneie la vena naian lava si buna lava, na Devit. 33 I taa tagan vulan a matafetama si Yaakop. E a fatataganan sina i taa pife taxapus.”
34 Na Maria a fin a angelo, “I taa savat malaafaa senaso nenia, ne tefin palau.”
35 A angelo aave a suie, “A Vovau Xaradak i taa savat siim e a gutan sina Piran pana Isin Molava Paaliu i taa xafut nano. E no taa luk a Lak Xaradak e ri taa xalie pa Natuna Piran. 36 A tauma, na Elisabet, i taa luk a lak e nane ve a tefin vaiak. Nane piau ta lak lunai, taasaxa i taxa waan xo lana fulun pisaxa sina. 37 Piau ta mo a Piran pife fexaxaas sena vile.”
38 Na Maria a suie. “Nenia xa ne sisiak sina Memai. E ne kuus turoxo pana ferawaian siim.” E a angelo xo a taꞌulane.
Na Maria Fe Xalum Na Elisabet
39 La yaan aave xo na Maria tamasiak e fe laak fataapus xe la bina put pe Judia. 40 Pave nane fe laak la lifu si Sekaraia e fesuai se Elisabet. 41 Layaan na Elisabet a langai a ferawaian si Maria, a popo la xuna a lalaas marasaxa. E na Elisabet febas paaliu pana Vovau Xaradak 42 e a ferawai falava paaliu e kuus, “Nano, no faamamaas paaliu sena maana lutefin e a roxoyan i taa xafut a lak aava no taa luxe. 43 Taasaxa, xenaso nano, nina Memai siak, no filimaan xena xalumau? 44 Layaan ne langai a ferawaian siim a lak la xuak a lalaas pana faamamaasan. 45 Nano, no fo namkai o a lagasai sina Memai xe siim i taa savat tuuna e voxo no taa faamamaas.”
A Yanganan Si Maria
46 E na Maria a yangan e a kuus,
“A xunus iga a nangus a Memai
47 e a vovau siak a faamamaas pana Piran aava Nges Ina Vil Fatato siak.
48 Nane fo lamon faꞌuliau, ne sisiak palau sina.
E naboxo a mu rabuna aava ri taa savat mui,
ri taa xaliau pana tefin pana faamamaasan.
49 A Piran pana Maana Gutan Xapiak fo vil a maana mo roxo paaliu paga
e a isina a taap e xaradak.
50 Nane tiuan a mamaaluxan sina xuluna mu rabuna aava ri suai faagut sena,
a mu rabuna xapiak lana mu yaan xapiak.
51 Pana mana, nane fo vil a maana buk faisok ina gutan:
nane fo tapalan xolan a mu rabuna aava ri vil falavai nari xa lana lamonan fufunai siri.
52 Nane fo fapoxoi a mu paamua la venanai piranan siri
e a faꞌisin a mu rabuna palau pana isin lava.
53 Nane fo famasi a rabuna aava ri lagai pana maana mo roxo
taasaxa feng tapin a mu rabuna piran malaan sena valagof.
54-55 E malaan sena kuus fanaian sina,
nane fo xavang a sisiak sina aava na Israel.
E nane lamon faꞌuli na Abrahem e mu buna xapiak pana mamaaluxan sina.”
56 Lavaxa, na Maria a waan xuvul pa Elisabet pana fulun talatul e mui nane ulaa xe la lifu sina.
A Luluuxan Si Jon Ina Fasufan
57 A yaan ina luluuxan xo a savat si Elisabet e nane luk a lak tomexaan. 58 A mu fesing sina e mu tauna ri langai o a Piran fo faxalite pana mamaaluxan molava e ri faamamaas xuvul pana.
59 La fapisiktulaana yaan sina lak aave ri savat xena putuxaana e ri buk faꞌisine sait pana isi tamana, na Sekaraia. 60 Taasaxa na ninana a kuus, “Piau, a isina na Jon.”
61 Ri fiai, “Xenaso? Piau ta tauma pana isin malaan.”
62 E ri talangai pana mari xe sina tamana lak xena fine pana so ta isin rao i vubuk faꞌisin a lak pana. 63 Nane fiai pana mo ina kala e nane faꞌipul nari xapiak layaan a kala malaan, “A isina ve na Jon.” 64 Fataapus paaliu a valana talakas e a xalemana tamulus e nane tangpat pana kuus fati a isina Piran. 65 A mu fesing siri, ri ipul marasaxa. E pe Judia, lana bina put aave, a mu rabuna ri taxa lo ferawai pana maana mo aanabeꞌ. 66 Naseꞌ ta mataa a langai pana mo aanabeꞌ a lalamon pana e a fiai, “A lak aanabeꞌ i taa so ta buk mataa?” Senaso ri texaas o a gutan sina Piran a waan xuvul pana.
A Yanganan Si Sekaraia
67 A tamana lak, na Sekaraia, a bas pana Vovau Xaradak e a kuus fatuxai malaan:
68 “Nangus a Memai aava Piran sina mu Israel
senaso nane fo filimaan xena maraan faꞌuli a mu rabuna sina.
69 Nane fo fasavat a Saxa ina Gutan xena fakaxup netaara,
a saxa aave a bu Devit aava sisiak sina.
70-71 Lokavai mupiis nane kuus, la ngusuna rabuna ina kuus fatuxai,
o nane taa fakaxup netaara xasena mu xaiyaas sitaara
e xasena gutan siri xapiak aava ri baian netaara.
72-75 Nane xa a kuus o i taa muluk a mu butaara
e i taa lamon faꞌuli a turoxoian taap sina aava nane kuus fanai pana xe sina butaara, na Abrahem.
Nane kuus o i taa fakaxup netaara xasena xaiyaas sitaara
talo taara taa savat sisiak sina lana roxoyan e xaradaxan
la maana yaan xapiak sitaara e taara taa pife mataut.
76 E nano xanatuk, ri taa xali nano pana
mataa ina kuus fatuxai sina Piran pana Isin Molava Paaliu
senaso no taa falet paamuin a Memai xena faigotanaana salan xana.
77 No taa fapiti a rabuna sina pana fakaaxupan
aava savat sena lamon tapinaana mu faasaalan siri.
78-79 A Piran sitaara a bas pana mamaaluxan e fananapan.
Nane vil famatavas a texaasan ina fakaaxupan
talo nari aava ri taagul lana bina ina maatan, ri taa tamulus sena,
xena sangas la matavas aava savat ti laaꞌui la xunavata.
Nane taa vil malaane xena paamuian netaara xe lana salan ina luaian.”
Nabeꞌ ve a yanganan si Sekaraia.
80 E a lak aave a palak e fesavat tateak lana vovau ina vaxa. E nane taagul la bina vingil fefexaxaas a yaan nane savat la matavas xe sina mu Israel.