1 Ŋicbomboŋ ŋoŋe kiŋaŋ qaqafâc-ŋeŋic wiac sâkoa etiŋnehuc ejarenšepieŋ, ehuc ŋaŋacne femicne Wofuŋ sambâŋko jukac i manasunšepieŋ.

2 Paŋšâic jaha numuhuc junšepieŋ. Erâ rucgereŋ juhuc daŋge nunumu enšepieŋ. 3 Erâ nâŋere wâc numupie Anutuzi mitire hata bâšâwe-nâreme Kristore dâŋ soŋne mufuanšepeneŋ. Dâŋ irec hâcne niŋgiŋko fokopac. 4 Nunumuzi dopecnupie dâŋ afeckehuc mujaŋgeŋkepe sâckezejec. 5 Qâpuc jaŋehec bâbâfuac erâ wiac mana tara-hâmohuc enšepieŋ. Ehuc gie bapa dameŋ mi sipirickenšepieŋ. 6 Dâŋŋeŋic hâwec ruacnepie aŋacne ezejec. Eme ŋic dâŋ iŋuc me iŋuc bâtikie-jareniŋte mi bititienšepieŋ.

7 No nahacne dâŋ binaŋ i Tikikozi eŋareocmu. E joroc âgo babafic-nâŋec â Wofuŋte kiŋaŋ qaqa micrereŋhec. 8 E hâcne juju-nâŋecte dâŋ binaŋ eŋarehuc mu âkeriŋ eŋareocte ŋoŋerao sorepe fakac. 9 Erâ Onesimo, miti mamana âgo biaŋ-nâŋec, ŋoŋere haeonec, e mâmâc ecnepe fârâ širec dâŋ binaŋ eŋare-fâreocmu.

10 Kâpâcwâru ŋic âgo-nane Aristako â Banaba nafe-ticne Mareko â Jesu, šâŋe-ticne moc Justo, jaŋe manasu-ŋareŋgopieŋ. Mareko ere sâcmutâc eŋarepo, fâ fisiocmuo âgo ecnenšepieŋ. 11 Ŋic i jaŋe sawa Judaŋic jaŋeraonec fuakicnezi Anutu uucmaŋ-ticnere giere baficnueŋgopieŋ, ehuc bubiaŋ qanareeŋgopieŋ. 12 Erâ ŋoŋere haeonec ŋic moc Epafara, Kristore kiŋaŋ qaqa, ere mamanac ŋoŋerao fokac, erâ ŋoŋe sanaŋkerâ Anuture micsâcko juhuc wiac mana tararâ etiŋneniŋte dameŋ sâc nunumuzi dopec-ŋopaekac. 13 No fuŋne-ticne manakopac, e ŋoŋere mecne erâ Laodikea haconec â Hierapoli haeonec mitiŋic jaŋere mecne mâmâc šâic gie wemo afecne baekac. 14 Luka dokta biaŋ-nâŋec â Dema jahe mu šeri eŋarekopirec. 15 Erâ no Laodikea haeonec mitiŋic â Nimfasi â wiacfâcne mu šeri ejarekopac i mufua-jarenšepieŋ. 16 Papia ši ŋic ŋokac wose-jarepie mana-fârepie Laodikea haeonec kikefuŋ jaŋerao râepie rame wosenšepieŋ. Á jaŋere moc qâreŋkepo iŋuc jaha ŋarepie wosenšepieŋ. 17 Arikipo e šiŋuc âzâcnenšepieŋ: “Miti gie Wofuŋzi neŋgoc ŋeha mugarekicne i aijakic jaha bâhâmozemec.” 18 Paulo no nahacne šâŋe qâreŋ ši râekopac. Kâpâcwâru ŋic nore manasunšepieŋ. Aki anonoczi ŋoŋerao fozejec.