1 Go ra iang i diat ra umana natu i Israel, diat ba dia ga vana uro Aigipto; diat par ma ra tarai ta ra kuba i diat dia ga varagur ma Iakob: 2 Ruben, Simeon, Levi, ma Iuda; 3 Isakar, Sebulun ma Beniamin; 4 Dan ma Naptali, Gad ma Aser. 5 Ma ra lavur natu i Iakob lavurua na vinun diat; ma Iosep i ga tar ki lua aro Aigipto. 6 Ma Iosep i ga mat ma ra umana turana par, ma nam ra taun tarai par bula. 7 Ma ra tarai Israel dia ga vangala mangoro na natu i diat, ma dia ga tavua na kaia, ma dia ga peal, ma dia ga ongor tuna; ma ra gunan i ga kor ma diat.

8 Io, ma tika na kalamana king i ga kure Aigipto, ma pa i ga nunure Iosep. 9 Ma i ga biti tai kana tarai: Gire, i peal ra tarai Israel ma dia ongor, ma dat pata; 10 boina dat a varkurai ma ra kabinana ure diat, kan diat a vapeal.diat mulai, ma ona ta vinarubu na vana rikai, diat a tur guvai ma kada umana ebar, ma diat a varubu ma dat, ma diat a vana oai kan ra gunan. 11 Kari di ga tibe ra umana lualua na papalum ta diat, upi diat a vakadik diat ma ra mamat na papalum. Ma dia ga pait ra ivu pia na pal na vuvuvung, Pitom ma Rameses, upi kai Parao. 12 Ma ba dia ga manga vakadik diat, dia ga manga tavua ka, ma dia ga pepeal. Ma dia ga milikuane ra tarai Israel. 13 Ma ra tarai Aigipto dia ga tul tar ra dekdek na papalum pire ra tarai Israel; 14 ma dia ga valigur kadia kini ma ra mamat na papalum ta ra pia bulit, ma ta ra tuntun vat na pia ma ta ra lavur mangana papalum ta ra umauma; dia ga vovo tar ra lavur papalum ta diat ma ra umana dekdek na varkurai.

15 Ma ra king Aigipto i ga tata pire ra ura vavina Ebraio, a ura rena varkakava, tikai a iangina Sipra, ma ta ra tikai Pua; 16 ma i biti dari: Ona amur a varkakava pire ra vaden Ebraio, ma amur gire diat ta ra kiki na kinakava ma dia kava ta bul tutana, io, amur a doka, ma ona ra bul vavina, na laun uka. 17 Ma ra umana tena varkakava dia ga ru God ma pa dia ga torom ta ra vartuluai kai ra king Aigipto, ma dia ga nur vue ra umana bul tutana upi diat a laun. 18 Ma ra king Aigipto i ga vartuluai upi ra umana tena varkakava, ma i ga biti ta diat: Ta ra ava ava nur vue ra umana bul tutana, upi diat a laun uka? 19 Ma ra umana tena varkakava dia ga biti tai Parao: Tago ra vaden Ebraio pa dia vardada ma ra vaden Aigipto; tago dia lulut, ma dia kava vue ra bul ba pa ta tena varkakava i vut boko pire diat. 20 Ma God i ga maravut ra umana tena varkakava; ma ra tarai dia ga pepeal ma dia ga ongor tuna. 21 Ma tago ra umana tena varkakava dia ga ru God, i ga vapealane ra umana natu i diat.

22 Ma Parao i ga vartuluai pire kana tarai par dari: A umana bul tutana par ba di kava diat, avat a vue diat ta ra tava alir, ma ra umana bul vavina par diat a laun.