1 Ma ra tinata kai ra Luluai i ga tadav mule iau, ma i biti: 2 Natu i ra tutana, una biti tai ra luluai Tiro: Ra Luluai God i biti dari: Tago i kolakolo ra nuknukim, ma u ga biti, Iau a god, ma iau ki ta ra kiki kai God ta ra bala na ta, ma a dovotina u a tutana ka, ma vakir a god, da u nuk ia; 3 u kabinana ta mumur ma Daniel; pa ta magit i pidik tam; 4 ta kaum kabinana ma kaum minatoto u ga uviana, ma u ga vung ra ngala na goled ma ra silva; 5 ta kaum kabinana ma kaum niivura u ga vangala kaum tabarikik, ma i kolakolo ra nuknukim ure kaum kini na uviana; 6 damana ra Luluai God i biti: Tago u ga nuk ia ba u a god, 7 ina tulue ra umana vaira tadav u, nina dia karvuvu ta ra lavur vuna tarai; ma diat a pakat kutu ra minamar i kaum kabinana, ma diat a vamavur ra lavur magit i mariringian tam. 8 Diat a vue tar u ta ra tung na minat, ma una virua da diat dia virua ta ra bala na ta. 9 Dave, una biti laka ta nina i doko u, Iau a god? U a tutana ka, ma vakir a god ta ra lima i nina i vakinkin u. 10 Una virua ta ra lima i ra umana vaira da ra umana Tematana dia virua; tago iau ga tatike, ra Luluai God i biti.

11 Ma go ra tinata kai ra Luluai i ga tadav iau, ma i biti: 12 Natu i ra tutana, una vatang ra kakailai na niligur ure ra king Tiro, ma una biti tana: Ra Luluai God i biti dari: U ra ul a pa ta ra kabinana ma ra magit i mariringian kakit. 13 U ga ki aro Eden ta ra uma kai God, ma di ga vamong u ma ra lavur mangana vat dia ngatngat, a sardia, a topas, a kristal, a beril, a onik, a iasper, a sapir, a emeraled, a karbukel, ma ra goled i ga vake diat. Ta ra bung di ga vaki u, 14 iau ga tul tar u pi una ki varurung ma ra umana angelo ta ra luana i gomgom kai God, ma u ga vanavana livuan ta ra umana lapap na vat nina dia ga rarao. 15 Papa nam ra bung di ga vaki u tana u ga ti boina kakit, ma i ga damana tuk tar di ga na tadav ra varpiam piram. 16 Ta kaum lavur kunukul u ga buka ma ra lavur bilak na mangamangana, ma u ga pait ra kaina; damana iau ga tar okole vue u kan ra luana kai God, tago u kaina; ma ra angelo i ga korot vue u kan aina livuan ta ra umana lapap na vat dia rarao. 17 Tago u ga mariringian i ga kolakolo ra nuknukim, ma kaum kabinana i ga kaina ta kaum minamar; iau ga vue u ura ra pia, ma iau ga nur vue u pi ra umana king diat a bobe u. 18 Tago i ga peal kaum lavur varpiam, ma kaum lavur kunukul dia ga kaina, u ga vabilak kaum umana pal na vartabar; damana ra iap i ga arikai livuan tam, ma i ga en vue u, ma u a kabu na iap uka ta ra luaina mata i diat par dia gire u. 19 Diat par dia nunure u ta ra lavur vuna tarai diat a kaian ure u; ma una tur a vakilang na bunurut, ma una panie kakit.

20 Ma ra tinata kai ra Luluai i ga tadav iau, ma i biti: 21 Natu i ra tutana, una lingan uro Sidon, ma una tata na propet ure, 22 ma una biti: I dari ra tinata kai ra Luluai God: Iau tut ure u, Sidon; ma ina mamar livuan tam; ba iau kure ma ra dekdek na varkurai, ma ba di gire kaugu lia na kini livuan tana, diat a nunure ba iau ra Luluai. 23 Ma ina tulue ra kaina minait tadav ia, ma ra gap na ki ta kana lavur nga; ma ra umana kinkin diat a bura livuan tana, ma ra pakat na vinarubu na ki taun ia; ma diat a nunure ba iau ra Luluai.

24 Ma diat par dia ki kikil ra gunan Israel, nina dia ga milikuane diat, pa ta tikai ta diat na da ra il na kait i varara ba da ra il na loboto i varvakadik; ma diat a nunure ba iau ra Luluai God.

25 Ra Luluai God i biti dari: Ba ina ga kap varurue ra tarai Israel kan nam ra umana vuna tarai nina ba di ga imire vue diat i tana, ma da ga gire kaugu lia na kini ta ra luaina mata i ra umana Tematana, diat a ki ta kadia gunan nina ba iau ga tul tar ia pire kaugu tultul Iakob. 26 Ma diat a ki bulu tana; maia, diat a pait ra umana pal, ma diat a vaume ra umauma na vain; diat a ki bulu ba iau ga tar pait ot pa kaugu umana varkurai ure diat dia ki kikil diat ma dia vakaina diat; ma diat a nunure ba iau ra Luluai kadia God.