11
1 A Luluai i milmilikuane tuna ra valavalar i rara,
Ma i manga gugu ta ra takodo na mamat.
2 Ba da nuk vangala pa dat, dat a vavirvir boko;
Ma diat ba dia vaikilik pa mule diat dia kabinana.
3 A ko na mangamangana kai ra dovot na tarai na lue rap diat,
Ma ga ra mangamangana gegagege kai ra umana tena vavagu na vamutue diat.
4 Ta ra bung na kulot a tabarikik pa i topa ta magit,
Ma ga ra mangamangana takodo i varvalaun kan ra minat.
5 A mangamangana takodo kai ra ko na tutana na mal are kana nga,
Ma ga ra tena varpiam na bura ta kana varpiam iat.
6 A mangamangana takodo kadiat dia dovot na valaun diat,
Ma ra umana tena vavagu diat a virua ta kadia kaina mamainga iat.
7 Ba ra tena varpiam i mat, pa i ki pa mule ta magit,
Ma ra nurnur kai ra bilak na tutana i panie.
8 Di valaun ra tena takodo kan ra magit na varmonong,
Ma ra tena varpiam i kia vue.
9 A tutana vakuku i vakaina talaina ma ra ngiene,
Ma ra umana tena takodo dia langalanga ure ra minatoto.
10 Ba ra umana tena takodo dia ki bulbulu, diat par ta ra pia na pal dia gugu;
Ma ba ra umana tena varpiam dia virua, di kukula na gugu.
11 A pia na pal i tavua ta ra varvadoan kai ra dovot na tarai,
Ma di vue pukue vue ta ra ngie i ra umana tena varpiam.
12 Nina i pidimuane talaina i papaua ka,
Ma nam ba i kapa ra nuknukina i ki mut uka.
13 A tena varurai i vanavana vurvurbit ma i vaarike ra magit i pidik,
Ma ra dovot na tutana pa i rarada.
14 Ona pa ta bo na varvateten, ra tarai dia bura; ma ba i peal ra umana tena varvateten, dia ki bulbulu.
15 Nina i tur kia ra vaira ure kana nilala na kaina tana,
Ma nina i milikuane ra vavalima na kiki bulu.
16 A bo na vavina i vatur vake ra variru,
Ma ra umana tena ra varpa dia vatur vake ra tabarikik.
17 A tena varmari i vadongone mule ia iat,
Ma ra tena varvakadik i vakaina ra pal a pakana iat.
18 A tena varpiam i vatur vake ra vabongon i vaongo,
Ma ga nina i vaume ra mangamangana takodo i vatur vake ra dovot na vapuak.
19 Nina i tur padikat ta ra mangamangana takodo na vatur vake ra nilaun,
Ma nina i murmur ra kaina na mat i tana.
20 A Luluai i milikuane diat i gegagege ra nuknuk i diat,
Ma ga diat i ko kakit kadia mangamangana i manga gugu ta diat.
21 A dovotina muka, a varkurai na tadav ra tena varpiam,
Ma ga ra umana tena takodo da valaun diat.
22 Da ra boroi i mong ma ra mamar bibilau na goled,
Damana ra metek na vavina ba pa i kapa ra nuknukina.
23 A mamainga kai ra tena takodo i boina ka,
Ma ra tena varpiam i ki pa ka ra ngala na kankan.
24 Ta tikai i vartabar ma i uviana ka tana;
Ma ta ra tikai i muie ra magit i takodo, ma i iba vanavana tana.
25 A tena vartabar na ti maur boko,
Ma nina ba i tabar vamomo ra tarai da kabila tabar vamoma.
26 A tarai diat a tata vabilak nina i muie vake ra kon,
Ma ra varvadoan na ki ta ra ulu i nina ba i ivure.
27 Nina i ongor ma ra tinikan upi ra boina i tikan upi ra varmananai,
Ma nina i ongor ma ra pepeng upi ra kaina na tadav ia boko.
28 Nina ba i nurnur ta kana ngala na tabarikik na bura ka,
Ma ra umana tena takodo diat a lubalubang da ra mapina davai.
29 Nina i vapurpuruan ra kubana iat na vatur vake ra vuvu tana,
Ma ra lunga na tultul pire ra tena kabinana.
30 A vuai ra tena takodo i da ra davai na nilaun,
Ma ra tena kabinana i ting valar pa ra tulungea i ra tarai.
31 Ea, da bali boko ra tena takodo ati rapia,
Ma da manga balbali pire ra bilak na tutana ma ra tena varpiam.