1 Ea, u a viviliai kakit ta ra vaden par,

Kaum vakak i tar vana uve?

Kaum vakak i tar lingan tar uve,

Upi dat a tikan upi ia?

2 Kaugu vakak i tar vana ur ta kana kinobot na davai i ang na katkat,

Upi na ian ta ra uma, ma upi na ilipe ra umana vaigoara.

3 Iau kai kaugu vakak, ma kaugu vakak ia kaugu;

I tabar kana kikil na sip maravai ta ra umana vaigoara.

4 Ea, kaugu vakak, u ti mariringian da Tirsa,

Ma u vakak da Ierusalem,

A magit na bunurut da ra loko na tarai na vinarubu ma ea vakilang na kamara.

5 Una lingan irai kan iau,

Tago a ura kiau na matam dir ga tar vaburut iau.

Ra pepe na ulum i da ra kikil na me,

Nina i va ta ra papar Gilead.

6 Ra umana pal a ngiem dia da ra kikil na sip.

Nina ba di ga puk vagomgom diat;

Dia vanavana a ururua, ma pa ta tikai ta diat i iba.

7 A ura pagupagu na ngiem, nina dir ki ta ra vavai kaum mal na tubatuba,

Dir da ra pakana gamata.

8 A laptikai na vinun diat ra umana vavina kai ra king, ma a lavutul na vinun na tultul na vavina,

Ma ra umana inip na vavina nina pa di luk diat, dia ki.

9 Kaugu nat na uka, kaugu viviliai, ia ra kavakake,

A kopono vavina kai nana;

A bul na vakak kai nina i ga lalau pa ia.

Ra umana vavina dia ga gire, ma dia ga biti: I ti doan;

Maikir, ra umana vavina kai ra king, ma ra lavur tultul na vavina, dia ga pite pa ia.

10 Ia go i da ra kapa ai ra buabuarana,

Ma i talapar da ra gai,

Ma i pupua da ra keake,

A magit na bunurut da ra loko na tarai na vinarubu ma ra vakilang na kamara?

11 Iau ga vana ur ta ra uma na galip,

Upi ina gire ra lavur ginol ta ra male,

Pi ina gire ra davai na vain ba i karakap boko,

Ma ra gamata ba i pupu.

12 Ba pa iau ga nununuk boko, kaugu mamainga i ga vako iau

Ta ra kiki na vinavana kai kaugu vakak.

13 Ea, u ra vavina maro Sulam, una lilikun;

Una lilikun, una lilikun, ma avet a gire u.

Upi ra ava avat a gire ra vavina Sulam,

Da ava bobe ra malagene maro Makanaim?