PAULO GENA TALOTALO VEGA-RUALANA TESALONIKA EKALESIARA GERIA
2 Tesalonika vega-matagaina kilara
Paulo na epepa vega-rualana vopepa kunena etalo-gatuato uve taula toitoi gevanagito mulinai etaloato. Ia Korinto ai roe waetaluwai aonai.
Epepa aonai golea kamuna tenu 2:3.
Paulo epepa vega-rualana etaloato Tesalonika ekalesiara:
1) gevega-vitivitirawai aonai eveakwalimurato;
2) Iesu gena waikule-wai vega-rualana kilara reketa maekaro-vararato;
3) evega-nagirato, geria kamonagi ai pia ruga-gaoka pene ago, Iesu Velekou pene waikule-wai, e elaunagirato maki, ragai pia lepeti.
Paulo na gena pepa vega-rualana evetaina ewareato:
1. Aora eveagaokarato, netiwato, Keriso mapene waikule-wai (tenu 1:1-12)
2. Rogora pia vetole kwalana Keriso opakauna pene vogomai-kune vou (tenu 2:1-17)
3. Ekalesia rakavetaina pene maguli (tenu 3:1-18)
1
1 Ai taumai toitoi, Paulo, Sila e Timoteo na Tamara Palagu e Velekou Iesu Keriso gena ekalesia Tesalonika aonai gatalo-venimina.
2 Palagu ita Tamara e Velekou Iesu Keriso geriana vega-nama e maino gemi ai pene mia.
Keriso pene waikule-wai tomanai, Palagu na taunilimalima geria rakava voira pene venira
3 Walakavamai maparami, ai na Palagu paia tanikiu-venia toma mapararai gomi pakumi ai. Vovetaina paia kala voo rorirori, kwalana gomi gemi kamonagi ekamu-iwavagina, e gemi ulamagi taukavami geriai maki ekamuna. 4 Gaura pakurai gomi gavega-ragemina Palagu gena ekalesia nuganugarai. Gavega-ragemina kwalana gomi lewana geguimina e gevega-vitivitimina, na gemi kamonagi gogapi-rogorogoana.
5 Vokala maparara na Palagu gena vevega-rorirori vegailiana gevega-taunataunaana, voia ganina gomi gelegele ia gena Basileia pio vaia, kwalana Basileia pakunai govitivitina. 6 Palagu rorirori kalaramo pene kalara: Gomi raira na gevega-vitivitimina talimara ia na pene vega-vitivitira. 7 E gemi vitiviti aora na pene vega-agalagimi e ai maki. Vovetaina pene kalara Iesu Velekou gena aneru matiavu iwavagira ria kupana piama rigo tomanai. 8 Makalova molemolena pene vogomai; Palagu ati gekwalanaana talimara e gera Velekou Iesu gena Vali Namana ati gegapi-rageana talimara geria rakava voira penema venira. 9 Geria rakava voira ea: Ia Velekou genana e gena maeka tiavuna genana mavepakara pia talu, viti pia vua-vanagivanagi. 10 Voia pene wala Keriso pene waikule-wai tomanai, gena taunilimalima maparara na pia vega-ragea, e gevega-taunataunaana talimara na pia vega-namaa ulanana. Gomi maki ia ria kwalana gavopata-venimito, gogapi-rageato pakunai.
11 Gaura pakurai vanagivanagi gomi atami ai garapalina. Gera Palagu ganogiana, gemi maguli pene vega-namara, kwalana ia na ekeamito pio maguli ulanana. Ia tiavuna na gemi ririwa namara mapararai pene veagavumi, e gemi kamonagi pakaunai gokalarana inagulura e kalara pene vega-gugulura. 12 Voanana, Iesu Velekou arana pia vega-ragea gomi pakumi ai, e gomi pia vega-ragemi ia pakunai. Ita gera Palagu e Velekou Iesu Keriso na geria vega-nama aora na vogaura maparara pia vega-walara.