8
Iesu ita gera Rupu Veaga velena kamuna
1 Ai na rakagau gakilagiana gauna ea. Ita magera Rupu Veaga velena kamuna. Ia kupai Goloka Iwa-kekere ravuravu Palaguna gena terona aloripanai etanu-talito. 2 Palagu gena veaga kapunai einaguluna. Vopalai rupuna taunatauna Velekouna evega-rugaato, ati taunilimalima na gevega-ruagaato.
3 Rupu Veaga velera kamura maparara gevega-rugarato, vega-nama gaura e polomakau, mamoe, manu pia veni ularana. Gaura pakurai eRupu Veaga velena kamuna, Keriso, maki magena gau reketa, pene veni ulanana. 4 Pere ia tanoparai pere talu, Rupu Veaga velenai ati pere ago, kwalana ea, Rupu Veaga velera warau getaorato ea, vega-nama gaura gevenina, Iuda geria rova ekilato gelegelenai. 5 Ira vega-nama gaura enai veaga iwavagi kovoganai gevenina, kupai voveaga iwavagi kovogana vetaina e kolemanamo. Vovetainai Palagu na Mose aliruputali ulanana palai rupu pene kalaa ulanana, gaura ekilagavu-veniato, netiwato, “Pono gitaa, gaura maparara gokalarana aonai, golo ai avega-gitamuto gelegelenaimo pono kalara.” 6 Na ewagumona Iesu na vekapawai vega-namana kalana kunenai Rupu Veaga velera geria inagulu evanagiato. Kwalana Palagu gena kilagavu valigunai Iesu Palagu e taunilimalima vekarawarai erugana, vekapawai valiguna pene vega-tiavua ulanana, evekapawai na vovekapawai kunena tiavuna evanagiana. E Palagu gena kilagavu valiguna na vovekapawai kunena ekilagi-gavuana maki evanagiato. 7 Pere vovekapawai kunena ati gena rakava, Palaguna vekapawai valiguna ta ati mapere kilagia. 8 Na Palagu na taunilimalima geriai rakava erawaliato gaurai ekilato,
“Velekou ekila-matagaina,
‘Pio kamonagi, toma ta roe evogomaina,
au na vekapawai valiguna ta mapana kalaa,
Isaraela petena e Iuda petena geria.
9 Evekapawai ati kunenai
ira tenera geria akalaato vetaina.
Ati votoma gimarai agapito,
ne Aikupito na avaiatirato
vekapawai na vetaina.
Kwalana ira au geku vekapawai
genai ati geveraramanina gaurai,
au na araokwanirato,’
Velekou vovetaina ekilana.
10 Velekou maekilana,
‘Wailara tomarai au na evekapawai
Isaraela petena geria mapana kalaa:
Au geku rova ira reparai pana tao-togara
e ira aorai pana talora.
Au ira geria Palagu ai pana ago e ira maki
au geku taunilimalimai pia ago.
11 Talima taa na laganai etaluna
talimana ati mapene vega-ripaa,
e talima taa walakava na ati pene vaikilaa,
“Velekou ono ripaa!”
Kwalana maparara na pia ripaku,
girigirina na pene ago kamuna.
12 Geria karoverave pana tugamagi-piatogara,
e geria rakava maparara ati mapana tugamagira.’ ”
13 Palagu na evekapawai ea ekilagiana, “Vekapawai valiguna” netina aonai, ia na vovekapawai tovotovonai gauna kunena ekilagiana. Rakagau kanina e rakavana atilovana pene lekwalekwa.