1 Ina lagimo, Yesuꞌa Kalaisi neꞌmo maiꞌniye, huꞌa huteꞌa apakesa afiꞌa fatago nehafi Gotiꞌa alino apateꞌnigeꞌa mafaꞌneꞌamo maiꞌnae. Muki vayaꞌamogimo alino apateꞌniya vekaeꞌmo hapau apayamopafiꞌmo nehapaisiyana ani kava huno alino apateꞌniya mafaꞌneꞌamogiꞌefeꞌmo hapau apayamopafiꞌmo nehapaiye. 2 Lagaemo Gotifeꞌmo lahau layamopafiꞌmo nelahaisigeta Goti keꞌaepa geꞌamo akame nehisunana ani kavatetiꞌmo alagi ageꞌnonana Goti mafaꞌneꞌamogifeꞌmo lahau layamopafiꞌmo nelahaiye. 3 Gotifeꞌmo hapau apayamopafiꞌmo nehapaiya kavaꞌmoꞌa Goti keꞌaepa geꞌamo ma kava hiyo, ina kava osiyo, huno huꞌniya geꞌamo akame nehaya kavaꞌmo haneꞌniye. Goti keꞌaepa geꞌamo akame hisuna kavaꞌmoꞌa kana osuꞌniyanageta afaꞌa akame hisuna kavaꞌmo haneꞌniye. 4 Gotiꞌa alino apateꞌniya mafaꞌneꞌamogimo ma mopafi kavaꞌmo aeꞌa neꞌagasae. Lagaemo Goti Mafaꞌneꞌaeꞌmo lagesa afita fatago huꞌnona kavatetiꞌmo ma mopafi kavaꞌmo ago aeta agaseꞌnone. 5 Ina lagimo ma mopafi kavaꞌmo aeꞌa agasegae. Yesuꞌa Goti Mafaꞌneꞌamo maiꞌniye, huꞌa apakesa afiꞌa fatago nehaya vayaꞌamogigeꞌmo afaꞌa aeꞌa agasegae.

6 Yesu Kalaisiꞌa anitetiꞌe kolaꞌaletiꞌeꞌmo emineꞌniye. Agaemo aniꞌalefekeꞌmo emiꞌnoꞌmeꞌnifa kolaꞌaleꞌefeꞌmo emineꞌniye. Goti Aunemeꞌamoꞌmo lama geꞌageꞌmo nehiya vekamo maiꞌniyaꞌmofeꞌmo ageteno ha maeno Kalaisifeꞌmo faigoko geꞌamo nehiye. 7 Loleꞌe magoꞌe vayaꞌmo kokuꞌnapiꞌmo maiꞌneꞌapaeꞌmo ageteꞌa ha maeꞌa faigoko geꞌapimo nehae. Apakaemo Afotimoꞌagi Goti Geꞌamae huꞌa agi neꞌaya vekagi Aote Aunemeꞌagi huꞌa maiꞌnayaꞌmonanafa magoke Gotiꞌa maiꞌniye. 8 Loleꞌe magoꞌe yaꞌmogimo ma mopafiꞌmo haneꞌneꞌa ageteꞌa ha maeꞌa faigoko geꞌamo nehae. Aunemeꞌamoꞌmogi aniꞌmoꞌagi kolaꞌamoꞌagi huꞌa magoke agufa geꞌageꞌmo huꞌa ageteꞌa ha maeꞌa faigoko geꞌamo nehae. 9 Ma mopafi vayaꞌmogimo ageteꞌa ha maeꞌa faigoko gemo aeꞌa hakalo nehageta afitetaeꞌmo, alagi lama gemo nehae, huta nehunaꞌmonanafa Gotiꞌa ageteno ha maeno faigoko gemo aeno hakalo nehiya gemoꞌa ma mopafi vayaꞌai geꞌapimo alagi ago aeno neꞌagase. Gotiꞌa Mafaꞌneꞌamo ageteno ha maeno faigoko gemo aeno hakalo huꞌniye. 10 Mani ageteno ha maeno faigoko geꞌamo Goti Mafaꞌneꞌaeꞌmo apakesa afiꞌa fatago nehaya vayaꞌai apaipafiꞌmo haneꞌniyaꞌmonanafa Gotiꞌa lama gemo nehiye, huꞌa nosaya vayaꞌmogimo Gotiꞌa aigofe gemo nehiya vekamo maiꞌniye, huꞌa nehae. Apakaemo Gotiꞌa Mafaꞌneꞌamo ageteno ha maeno faigoko gemo aeno hakalo huꞌniya geꞌaeꞌmo apakesa afiꞌa fatago osuꞌnayaꞌmofeꞌmae. 11 Gotiꞌa ageteno ha maeno faigoko gemo aeno hakalo hunoꞌaeꞌmo, nagaemo maige maige hutapa neꞌmaiya yaꞌmo aliꞌna lapamiꞌnove, huno laha paiꞌniye. Ani maige maige huꞌa neꞌmaiya yaꞌmo mafaꞌneꞌafiꞌmo maiꞌniye. 12 Goti Mafaꞌneꞌamo avaleꞌa apaipafiꞌmo ateꞌnaya vayaꞌmo maige maige huꞌa neꞌmaiya yaꞌmo ago aliꞌnae. Goti Mafaꞌneꞌamo avaleꞌa apaipafiꞌmo oꞌateꞌnisaya vayaꞌmo maige maige huꞌa neꞌmaiya yaꞌmo oꞌaliꞌnae. 13 Nagaemo mani gemo Goti Mafaꞌneꞌamo agiꞌalefeꞌmo lapakesa afita fatago nehaya vayaꞌmogita hutapaeꞌmo, maige maige huta maisuna yaꞌmo aliꞌnone, hutapa afitetapa agesayafeꞌmo mani avoꞌmo kaeꞌnove. Lapakaemo afitetapa lapakesa afita fatago hume hume visayafeꞌmo avoꞌmo kaeꞌnove.

14 Lagaemo Gotiꞌa, ani kavaꞌmo huguve, huno hu maleꞌniya kavatefeꞌmo nunumu huta afi gesunagenoꞌaeꞌmo getimo afaꞌa afiteno hugiye, huta agaefeꞌmo lagesa afita fatago nehune. 15 Getimo neꞌafiye, huta afiꞌnisunana ago ageꞌnonana na agufa yafeꞌmo aukaya huta ge nehisupi ago alino lamiꞌnigeta aliꞌnone, huta lagesamo neꞌafune. 16 Mago vekamoꞌa konagaꞌamoꞌmo ageꞌnigeno hosu kavaꞌmo ofalisiya agufa hosu kavaꞌmo huꞌnisigeno agetenoꞌaeꞌmo Gotifeꞌmo afi gesigenoꞌaeꞌmo ani konagaꞌamoꞌmo falisiya agufa hosu kavaꞌmo osuꞌniya konagaꞌamoꞌmo maige maige huno maisiya yaꞌmo alino amigiye. Mago vekamoꞌa alagi falisiya agufa hosu kavaꞌmo nehisiyana nunumu hutapa ateyo, huꞌna nosuve. 17 Muki agufa alagepa osu kavaꞌmo nehaya kavaꞌmoꞌa hosu kavaꞌmo haneꞌniyaꞌmonanafa mago hosu kavaꞌmoꞌa alagi falisaya kavategamo alino noꞌapateya hosu kavaꞌmo haneꞌniye.

18 Gotiꞌa alino apateꞌniya mafaꞌneꞌamogimo hosu kavaꞌmo akame nosae. Gotiꞌa alino apateꞌniya vayaꞌmogi apakaiꞌapileꞌmo yagaiꞌa neꞌapatagenoꞌaeꞌmo hosu vekamoꞌa alino hosu huno noꞌapate. 19 Lagaemo ago ageꞌnonana Goti mafaꞌneꞌamo maiꞌnonaꞌmonanafa muki ma mopafiꞌmo maiꞌnaya vayaꞌmogimo hosu vekamo aiyafiꞌmo maiꞌnageno yagaino neꞌapate. 20 Lagaemo ago ageꞌnonana Goti Mafaꞌneꞌamo emineno lama ge Gotiꞌa ageta aeto hisunafeꞌmo lagesamo afisuna yaꞌmo alino lamiꞌniye. Lagaemo lama ge vekafiꞌmo maiꞌnetaeꞌmo Mafaꞌneꞌamo Yesu Kalaisipiꞌmo maiꞌnone. Ani vekamo lama ge Gotiꞌa maiꞌnenoꞌaeꞌmo alagepa huta maige maige huta maisuna yaꞌmo aepa vekamo maiꞌniye. 21 Aise mafaꞌneꞌnimogitapae, aigofe gotiꞌapimogimo apakame osutapa maita halove huta maiyo. He, lama ge.