1 Mago vekamo agiꞌamo Nikonimasiꞌa Yu vayaꞌaiteꞌmo yagaino neꞌapateya vayatama vekamo Falasi mono vayapati vekamo maiꞌniye. 2 Agaemo mago haniꞌilagamo Yesutegamo eno, Tisao, lagaemo kageꞌnonana Gotiꞌa alino kateꞌnigeka eka alika apaya neꞌmalana vekamo maiꞌnane. Gotiꞌa kaha oꞌmaeꞌniyesinana noꞌagona kaune kavaꞌmo afaꞌa nosanesine, huno ha paiꞌniye. 3 Yesuꞌa, alagi lama ge kaha nepauve, halate alino oꞌapateꞌnisiya vayaꞌmogi Gotiꞌa haiya kava huno yagaino neꞌapatefi afaꞌa afiꞌa aeto osugae, huno ha paiꞌnigenoꞌaeꞌmo, 4 haiya kava huno alopa vekamo halate alino atesigeno saufa vekamo hamalegaiye. Mago vekamoꞌa itaꞌamo aipafiꞌmo halate uno haisigeno alino atesifiye, huno afi geꞌnigenoꞌaeꞌmo, 5 alagi lama ge kaha nepauve, anitetiꞌe Aunemeꞌaletiꞌeꞌmo alino oꞌapateꞌnisiya vayaꞌmo Gotiꞌa yagaino neꞌapateya kegiꞌyafiꞌmo afaꞌa faleꞌa ohaigae. 6 Atafa apaipa haneꞌniya vayaꞌmogi atafa apaipaꞌe vayaꞌmo aliꞌa neꞌapatae. Goti Aunemeꞌamoꞌmo saufa apaipaꞌe vayaꞌmo alino neꞌapate. 7 Halate alino lapateno, huꞌna kaha nepauva geeꞌmo afika kahau oꞌaiyo. 8 Yasimoꞌmo hauꞌnisiya kotegamo alinino ugefeꞌmo nehisiyana afaꞌa alinino ugiye. Yasimoꞌmo age neꞌaigekaeꞌmo ageꞌageꞌmo neꞌafinaꞌmonanafa neꞌeyaꞌamo oꞌageka neꞌviyaꞌamo noꞌagane. Ani agufa kava huno Goti Aunemeꞌamoꞌmo alino neꞌapategeꞌa neꞌmaiye, huno ha paiꞌniye. 9 Nikonimasiꞌa, haiya kava huno afole neꞌaiye, huno afi geꞌnigenoꞌaeꞌmo, 10 Ala vekamo maiꞌneka Isaleli vayaꞌmo alika apaya neꞌmalana vekamo maiꞌnanaꞌmonanafa ani kavafeꞌmo oꞌafiꞌnapiye. 11 Alagi lama ge kaha nepauve, afiꞌnoꞌa gemo lapa paitetaꞌa ageꞌnoꞌa kavafeꞌmo aetaꞌa hakalo hutaꞌa lapa nepauꞌaꞌmonanafa getiꞌamo noꞌafiye. 12 Nagaemo ma mopafi kavafeꞌmo kaha paiꞌnogekaeꞌmo kagesa afika fatago osuꞌnanaꞌmonanafa kokuꞌnapi kavafeꞌmo ava gemo huꞌna kaha paiguvana haiya kava huka kagesa afika fatago hugane. 13 Mago vekamoꞌa kokuꞌnapi kavaꞌmo haino oꞌageꞌniyaꞌmonanafa Vemo Mafaꞌnemo kokuꞌnapatiꞌmo emineꞌniya vekamogeno hemeniꞌeꞌmo kokuꞌnapiꞌmo maiꞌniye. 14 Moseseꞌa kaꞌme kotegamo nagaloꞌyavemo auneꞌamo alino yosaleꞌmo maleno kiteno alino he tino ateꞌniya agufa kavaꞌmo huꞌa Vemo Mafaꞌnemo aliꞌa he tiꞌa ategae. 15 Ina lagimo agaefeꞌmo apakesa afiꞌa fatago nehisafigeꞌa alagi ofaliꞌa alagepa huꞌa maige maige huꞌa maisayafeꞌmo aliꞌa he tiꞌa ategae. 16 Gotiꞌa ma mopafi vayaꞌaifeꞌmo hau ayamopafiꞌmo hauꞌniye. Ani kava huno lusi kava huno hauꞌnigenoꞌaeꞌmo ani aiya magoke mafaꞌneꞌamo avaleno apamiꞌniye. Ina lagimo mafaꞌneꞌaeꞌmo apakesa afiꞌa fatago nehisafigeꞌa alagi ofaliꞌa alagepa huꞌa maige maige huꞌa maisayafeꞌmo avaleno apamiꞌniye. 17 Gotiꞌa ma mopafi vayaꞌmo agoti huno apatetenoꞌaeꞌmo, hosu kavaꞌmo huꞌnae, huno hisiyafeꞌmo mafaꞌneꞌamo alino ateꞌnigeno emiꞌnoꞌmeꞌnifa apakufamo alino katino neꞌapateno hapau vaisiyafeꞌmo alino ateꞌnigeno emineꞌniye. 18 Goti Mafaꞌneꞌaeꞌmo apakesa afiꞌa fatago nehaya vayaꞌmo agoti huno apatetenoꞌaeꞌmo, hosu vayaꞌmo maiꞌnae, huno nosiyaꞌmonanafa apakesa afiꞌa fatago nosaya vayaꞌmo ago agoti huno apatetenoꞌaeꞌmo, hosu vayaꞌmo maiꞌnae, huno huꞌniye. Apakesa afiꞌa fatago osuꞌnayaꞌmofeꞌmae. 19 Gotiꞌa agoti huno apatetenoꞌaeꞌmo, hosu vayaꞌmo maiꞌnae, huno huꞌniya gemo aepaꞌamo haneꞌniyana ha le yaꞌamo ma mopafiꞌmo ago afole aiꞌniyaꞌmonanafa vayaꞌmogi ha le yafeꞌmo ohapauꞌnifa hani yafekeꞌmo hapauꞌniye. Hosu kavakeꞌmo nehayaꞌmofeꞌmae. 20 Hosu kavaꞌmo nehaya vayaꞌmogimo ha le yafeꞌmo alagi ohapauꞌnigeꞌapaeꞌmo hosu kavaꞌapimo afole oꞌaisiyafeꞌmo ha le yategamo alagi noꞌmae. 21 Noꞌmaeyaꞌmonanafa lama gemo akame nehaya vayaꞌmogi Goti geꞌamo neꞌafiya kavaꞌmo afole aisiyafeꞌmo ha le yategamo neꞌae.

22 Ani gemo hutegeꞌapaeꞌmo Yesuꞌe geꞌamo neꞌafiya vayaꞌeꞌmo Yutiya kotegamo uꞌa maiꞌneꞌapaeꞌmo Yesuꞌa muki afinaꞌaeꞌmo apakaeꞌeꞌmo magokepi lokaeno maiꞌneno mago vayaꞌmo aniꞌmo faleno apateꞌniye. 23 Inoni kotega Selemigayagamo asole aniꞌmo haneꞌniyaꞌmofeꞌmo Yoniꞌa ani kotegamo aniꞌmo faleno apateꞌniye. Mago vayaꞌmo agaetegamo eꞌnageno aniꞌmo faleno apateꞌniye. 24 Ani afinaꞌmo Helotiꞌa Yoniꞌmo kalavusi huno oꞌateꞌnigeno afaꞌa maiꞌniya afinane. 25 Yoni geꞌamo neꞌafiya vayaꞌe Yu nofi vayaꞌeꞌmo aniꞌmo faleꞌa neꞌapataya kavafeꞌmo ge vaiꞌnae. 26 Ge vaiteꞌa Yonitegamo, Tisao, muga faliga kagaeꞌeꞌmo lokaeno maiꞌniya vekamo ava gemo huꞌnana vekalegamo muki vayaꞌmo uꞌnageno aniꞌmo faleno neꞌapate, huꞌa ha paiꞌnageno 27 Yoniꞌa, Gotiꞌa mago vekamo agiꞌaleꞌmo alino asaga huno oꞌateꞌnisiyana ala agiꞌamo oꞌaligiye. 28 Hogoteꞌna, Mesaiya vekamo oꞌmaiꞌnovaꞌmonanafa alino nateꞌnigeꞌna hogoteꞌna eꞌnove, huꞌna lapa paiꞌnova gemo ago afiꞌnae. 29 Aꞌmo aligesuve, huno huꞌniya vekamoꞌa alisiya a kanomo agaiꞌa aꞌmae. Aꞌmo aliguve, huno huꞌniya vekamo ao vekamo eno magokepi lokaeno he tino maiꞌnigeno aꞌmo aliguve, huno huꞌniya vekamoꞌa amogaga aino ge huꞌnigeno afitenoꞌaeꞌmo amogaga neꞌaiye. Ani kava huno aꞌamo neꞌaligeꞌnaeꞌmo lusi kava huꞌna namogaga neꞌauve. 30 Agiꞌamoꞌmo kosime kosime anagamo nehaisigeno nagiꞌnimoꞌmo alino aise aise hume hume afelaga lamigiye. 31 Anagatiꞌmo emineꞌniya vekamoꞌa muki vayaꞌamo ago aeno apakaseꞌniye. Ma mopafatiꞌmo afole neꞌaiya vayaꞌmo ma mopafi vayaꞌmo maiꞌneꞌapaeꞌmo ma mopafi kavafeꞌmo ava gemo nehageno kokuꞌnapatiꞌmo emineꞌniya vekamoꞌa aeno apakaseꞌniye. 32 Agaemo afiteno ageꞌniya kavafeꞌmo hapa nepaigeꞌapaeꞌmo muki vayaꞌmogi ani gemo noꞌafiyaꞌmonanafa 33 geꞌamo neꞌafiya vayaꞌamogigeꞌmo huꞌapaeꞌmo, Gotiꞌa lama ge nehiye, huꞌa huꞌnae. 34 Gotiꞌa alino ateꞌnigeno eꞌniya vekamoꞌa Goti geꞌamo hapa nepaiye. Gotiꞌa Aunemeꞌamo alino fako huno magoꞌamo maleteno oꞌamiꞌnifa mukiꞌamo alagi alino amiꞌniyaꞌmofeꞌmo Goti geꞌamo aeno hakalo huno hapa nepaiye. 35 Muki yaꞌmo Afoꞌamoꞌa mafaꞌneꞌaeꞌmo hau ayamopafiꞌmo hauꞌnigenoꞌaeꞌmo muki yateꞌe vayaꞌaiteꞌeꞌmo yagaino apatesiya himamuꞌamo alino amiꞌniye. 36 Muki vayaꞌamogi Mafaꞌneꞌaeꞌmo apakesa afiꞌa fatago nehisaya vayaꞌmogimo alagepa huꞌa maige maige huꞌa maisaya yaꞌmo ago aliꞌnae. Muki vayaꞌmogimo Mafaꞌneꞌamo geꞌamo akame nosisaya vayaꞌmo Gotiꞌa aipamo leno neꞌapateya kavaꞌamo apakaeteꞌmo alagi haneꞌniyaꞌmofeꞌmo alagepa huꞌa maige maige huꞌa oꞌmaigae.