1 Mago vekamo agiꞌamo Layosiꞌa Metani taonifiꞌmo maiꞌniya vekamo kaita hauꞌnigeno maiꞌniye. Asaꞌalaꞌmoganimo Maliyaꞌe aganaꞌamoꞌmo Mataꞌeꞌmo Metani taonifiꞌmo magokepi lokaeꞌa maiꞌnae. 2 Ani Maliyaꞌa hogoteno alagepa atumo neꞌaiya uvelimo alino Ala kava neꞌmo aiyaleꞌmo lakino faleno ateteno ayokatetiꞌmo alino hau huno ateꞌniye. Asaꞌamoꞌmo Layosiꞌmo kaita hauꞌniye. 3 Asaꞌalaꞌmoganimo Yesutegamo ge huꞌana atalaꞌageno uꞌniya gemo, Ala kava nene, ani kahau kayamopafiꞌmo kahauꞌniya vekamo kaita hauꞌniye, huꞌana huteꞌana mago vekamo apaꞌmo aliꞌana ataleꞌnaꞌageno uꞌniye. 4 Yesuꞌa ani gemo afitenoꞌaeꞌmo, ani kaitaꞌmo falisiya agufa kaitaꞌmo ohauꞌnifa Goti ha le konali yaꞌamo ageteꞌapaeꞌmo agiꞌaleꞌmo aliꞌa asaga huge Goti mafaꞌneꞌamo agiꞌaleꞌeꞌmo aliꞌa asaga huge hisayafeꞌmo ani kaitaꞌmo hauꞌniye, huno hapa paiꞌniye.

5 Yesuꞌa Mataꞌe aganaꞌamoꞌe asaꞌamoꞌmo Layosiꞌefeꞌmo hau ayamopafiꞌmo hauꞌnigenoꞌaeꞌmo 6 kaita hauꞌniye, huꞌana huꞌnaꞌa gemo afitenoꞌaeꞌmo lole afinaꞌmo ani maiꞌniya kotegamo maiꞌniye. 7 Lole afinaꞌmo utegenoꞌaeꞌmo Yesuꞌa geꞌamo neꞌafiya vayaꞌaifeꞌmo, halate Yutiya kotegamo vigetao, huno hapa paiꞌnigeꞌapaeꞌmo, 8 Tisao, ani kotega maiꞌnaya Yu vayaꞌmogimo yafa kayotetiꞌmo kamagisayafeꞌmo huꞌnayana halate Yutiya kotegamo visanafeꞌmo nehapiye, huꞌa afi geꞌnagenoꞌaeꞌmo, 9 Magoke afinaꞌmo yegemo tuolofuꞌa aovamo letegeno haniꞌmo nehiye. Vayaꞌmogimo yegemo neleya afinaꞌmo ma mopafiꞌmo aeno ha leꞌnigeꞌa umenitata nehayaꞌmofeꞌmo nohapae. 10 Hanipiꞌmo umenitata nehisayaꞌmoꞌmo apaipafiꞌmo ha le yaꞌmoꞌa aeno ha noleyaꞌmofeꞌmo nehapae. 11 Lao vekamo Layosiꞌmo ago au kaleno maiꞌniyaꞌmofeꞌmo uꞌna aupatiꞌmo hauneꞌna ategauve, huno hapa paiꞌnigeꞌapaeꞌmo, 12 Ala kava nene, au kaleno maiꞌnisiyana kanalene, huꞌa ha paiꞌnae. 13 Yesuꞌa Layosiꞌmo ago faliꞌniya kavafeꞌmo au kaleno maiꞌniye, huno hapa paiꞌniyaꞌmonanafa afaꞌa au kaleno maiꞌnigenoꞌaeꞌmo huꞌniye, huꞌa apakesa afiꞌnae. 14 Yesuꞌa huꞌniya gemo afiꞌa aeto osuꞌnagenoꞌaeꞌmo Yesuꞌa huno afole aino hapa painoꞌaeꞌmo, Layosiꞌmo ago faliꞌniye. 15 Nagaemo agaeꞌeꞌmo ani afinaꞌmo magokepi lokaeꞌna oꞌmaiꞌnovaꞌmofeꞌmo lapakaetefeꞌmo nagesa afiteꞌna namogaga neꞌauve. Nagaefekeꞌmo lapakesa afitapa fatago hisayafeꞌmae. Agaetegamo vigetao, huno hapa paiꞌniye. 16 Tomasifeꞌmo lagoꞌya mafaꞌneꞌae, huꞌa agi neꞌaya vekamoꞌa Yesu geꞌamo neꞌafiya vayaꞌaifeꞌmo, agaegiꞌeꞌmo magokepi lokaeta falisunafeꞌmo lokaeta vigetao, huno hapa paiꞌniye.

17 Yesuꞌa uno avaꞌyi huteno afiꞌniyana Layosiꞌmo ago faligeta kita ateꞌnonageno loleꞌe loleꞌe afinaꞌmo uꞌniye, huꞌa ha paiꞌnageno afiꞌniye. 18 Metani taonimo Yulusalemu taonimo haopaleꞌmo haneꞌnigeno tali kilomita agufa aise afagiꞌaleꞌmo haneꞌniye. 19 Asole Yu vayaꞌmo Mataꞌe Maliyaꞌeꞌmo anasaꞌanimoꞌmo ago faliꞌniya kavafeꞌmo hapau huꞌa anatesayafeꞌmo anakaetegamo eꞌnae. 20 Yesuꞌa neꞌe, huꞌa huꞌnageno Mataꞌa ani gemo afitenoꞌaeꞌmo kategamo neꞌvisigeno neꞌesigeꞌana fotu hisaꞌafeꞌmo uꞌnigenoꞌaeꞌmo Maliyaꞌa nopiꞌmo maiꞌniye. 21 Mataꞌa uno Yesuꞌeꞌmo fotu huteꞌanaeꞌmo, Ala kava nene, manileꞌmo maiꞌnanesinana nasaꞌnimoꞌmo ofaliꞌniyesinaꞌmonanafa 22 ago afiꞌnovana hemenimo kagaemo Gotifeꞌmo namiyo, huka ge huka afi gesanageno afaꞌa alino kamigiye, huꞌna nagesa afiꞌnove, huno ha paiꞌnigeno 23 Yesuꞌa, kasakamoꞌmo halate he tigiye, huno ha paiꞌnigenoꞌaeꞌmo, 24 ago afiꞌnovana ma mopamo hano hisiya afinaꞌmo halate he tigiye, huꞌna ago afiꞌnove, huno ha paiꞌnigenoꞌaeꞌmo, 25 nagaemo faliꞌnayatetiꞌmo aliꞌna he tiꞌna apatege afaꞌa maisaya yaꞌmo aliꞌna apamige huꞌna maiꞌnove. Nagaefeꞌmo apakesa afiꞌa fatago nehisaya vayaꞌmo faligayana halate ago he tiꞌa afaꞌa maigae. 26 Ina lagimo afaꞌa maiꞌneꞌapaeꞌmo nagaefeꞌmo apakesa afiꞌa fatago nehisafigeꞌa ofaliꞌa afaꞌa maige maige huꞌa maigae. Geꞌnieꞌmo kagesa afika fatago nehapiye, huno afi geꞌnigenoꞌaeꞌmo, 27 He, Ala kava nene, kagaemo Kalaisi vekamo Goti Mafaꞌneꞌamo ma mopafiꞌmo eminegaiye, huꞌa huꞌnaya vekamo maiꞌnane, huꞌna nagesa afiꞌna fatago nehuve, huno ha paiꞌniye.

28 Mataꞌa ani gemo hutenoꞌaeꞌmo halate aino atagi neno uno vayaꞌmogimo oꞌafisayafeꞌmo aganaꞌamoꞌmo Maliyafeꞌmo sumi huno ha painoꞌaeꞌmo, Tisa vekamo ago eno manileꞌmo avaꞌyi huteno kagaefeꞌmo eno, huno ge nehiye, huno ha paiꞌnigeno 29 Maliyaꞌa ani gemo afiteno malage huno he tino uno fotu hisaꞌafeꞌmo uno lamiꞌniye. 30 Yesuꞌa taonifiꞌmo uno avaꞌyi osuꞌniyanafa Mataꞌeꞌmo fotu huꞌnaꞌa yateꞌmo maiꞌniye. 31 Maliyaꞌeꞌmo magokepiꞌmo lokaeꞌa maiꞌneꞌa hapau huꞌa anateꞌa maiꞌnaya vayaꞌmogi agayana Maliyaꞌa malage huno he tino uno lamiꞌnigeꞌa ageteꞌapaeꞌmo kiꞌa ateꞌnaya kanolulegamo uno aviꞌyaꞌmo hisiyafeꞌmo neꞌviye, huꞌa huteꞌa akame huꞌa uꞌnae. 32 Maliyaꞌa Yesutegamo uno avaꞌyi huno ageteno aiyafiꞌmo asagauno aino maiꞌnenoꞌaeꞌmo, Ala kava nene, manileꞌmo maiꞌnanesinana nasaꞌnimoꞌmo ofaliꞌniyesine, huno ha paiꞌnigenoꞌaeꞌmo 33 Yesuꞌa ageyana Maliyaꞌa aviꞌyaꞌmo huꞌnigeꞌapaeꞌmo agaeꞌeꞌmo magokepi eꞌnaya vayaꞌmogiꞌeꞌmo aviꞌyaꞌmo huꞌnageno apaketenoꞌaeꞌmo lusi kava huno aipamoꞌmo kana huꞌniye. 34 Agaemo, haiyateꞌmo kitapa ateꞌnae, huno apafi geꞌnigeꞌapaeꞌmo, Ala kava nene, eka ago, huꞌa ha paiꞌnae. 35 Yesuꞌa aviꞌyaꞌmo huꞌniye. 36 Aviꞌyaꞌmo huꞌnigeꞌapaeꞌmo Yu vayaꞌmogi, Ageyo, ani vekaeꞌmo lusi kava huno hau ayamopafiꞌmo hauꞌniye, huꞌa huꞌnae. 37 Mago vayaꞌamogi, ani vekamoꞌa aulagamo alagepa huno noꞌageya vekamo aulagamo alino alagepa huno ateꞌniya vekamo eno manileꞌmo maiꞌniyesinana himamuꞌaletiꞌmo alino hageno atesigeno ofaliꞌniyesipiye, huꞌa huꞌnae.

38 Yesuꞌa halate lusi kava huno aipamoꞌmo kana huꞌnigenoꞌaeꞌmo kanolulegamo uꞌniye. Yafa kapiꞌmo kiꞌa ateteꞌa avayaleꞌmo yafatetiꞌmo aiꞌa akani maleꞌnae. 39 Yesuꞌa, ani yafaꞌmo alitapa heleve hulitutapa ataleyo, huno hapa paiꞌnigeno Mataꞌa faliꞌniya vekamo asaꞌamoꞌmo, Ala kava nene, faliꞌnigeta kita ateꞌnonageno loleꞌe loleꞌe afinaꞌmo ago uꞌniyaꞌmofeꞌmo ago kano atumo aiꞌniye, huno ha paiꞌniye. 40 Yesuꞌa, kagesa afika fatago huꞌnisanaꞌmoꞌmo Goti ha le konali yaꞌaꞌe himamuꞌaꞌeꞌmo agegane, huꞌna kaha opaiꞌnofiye, huno ha paiꞌnigeꞌapaeꞌmo 41 yafaꞌmo aliꞌa heleve huꞌa ataleꞌnagenoꞌaeꞌmo Yesuꞌa alino maku huno kokuꞌnategamo ageꞌnenoꞌaeꞌmo, Afoꞌnimogae, geꞌnimo ago afiꞌnanaꞌmofeꞌmo kahao keꞌmo nehove. 42 Muki afinaꞌmo geꞌnimo neꞌafine, huꞌna ago afiꞌnove. Afiꞌnovaꞌmonanafa manileꞌmo nagaeꞌeꞌmo magokepiꞌmo lokaeꞌa maiꞌnaya vayaꞌmogimo afiteꞌapaeꞌmo, Gotiꞌa alino ateꞌnigeno emineꞌniye, huꞌa apakesa afiꞌa fatago hisayafeꞌmo ani gemo nehuve, huno huteno 43 alopa gefatiꞌmo ge hunoꞌaeꞌmo, Layosiyo, he tika emikeno, huno ge huꞌniye. 44 Lavolavoletiꞌmo faliꞌniya vekamo augosafiꞌe aiya ayategaꞌeꞌmo hayaeꞌa ateꞌnaya vekamo he tino emineꞌniye. Inagi Yesuꞌa, lavolavomo alitapa hakalu hetapa ataletetapa ategeno vino, huno hapa paiꞌniye.

45 Asole Yu vayaꞌmo Maliyategamo eꞌa maiꞌnaya vayaꞌmogimo Yesuꞌa huꞌniya kavaꞌmo ageteꞌapaeꞌmo agaefeꞌmo apakesa afiꞌa fatago huꞌnae. 46 Huꞌnayaꞌmonanafa mago vayaꞌamogimo uꞌa Falasi vayaꞌaifeꞌmo Yesuꞌa huꞌniya kavafeꞌmo ava gemo huꞌa hapa paiꞌnae. 47 Afiteꞌa kanisole vayanagi mono huꞌa neꞌapataya vayaꞌaiteꞌmo yagaiꞌa neꞌapataya vayanagi Falasi vayanagi huꞌa aliꞌa anupa huꞌa maiꞌneꞌapaeꞌmo, na agufa kava hisune. Ani vekamoꞌa noꞌagona agufa asole aune kavaꞌmo nehiye. 48 Oꞌatafauta afaꞌa ageta ataleꞌnisunageno ani agufa kavakeꞌmo hulino neꞌvisigeꞌapaeꞌmo muki asole vayaꞌmogimo agaefekeꞌmo lama ge nehiye, huꞌa huteꞌa akame hugae. Lomu gamani vayaꞌmogimo eꞌa alopa mono notimo heꞌa halagape vaiꞌa ataleteꞌa kame huꞌa latesageta ataleta atagu faetuteta huta maigune, huꞌa huꞌnae. 49 Apakaepatiꞌmo mago vekamo agiꞌamo Kaiyafasiꞌa ani kafugamo mono huꞌa neꞌapataya vayaꞌaiteꞌmo yagaino neꞌapateya vekamoꞌa, lapakaemo aiseꞌamo oꞌafiꞌnae. 50 Magoke vekamoꞌa muki vayaꞌmogitalefeꞌmo falino latesigeta hano osuta afaꞌa maisunafeꞌmo kanalene, hutapa hutetapa lapakesa afifi huge huge hutapa noꞌmaiye, huno hapa paiꞌniye. 51 Agaiꞌamo ani gemo osuꞌnifa ani kafugamo mono huꞌa neꞌapataya vayaꞌaiteꞌmo yagaino neꞌapateya vekamo maiꞌniyaꞌmofeꞌmo aune gemo huno Gotitegati gemo alinineno aeno hakalo huno hapa painoꞌaeꞌmo, Yesuꞌa Yu nofi vayaꞌaitefeꞌmo falino apategaiye. 52 Yu nofi vayaꞌalefekeꞌmo falino oꞌapategaiyaꞌmonanafa muki Goti mafaꞌneꞌamo atagu faeꞌuꞌeꞌa huꞌa maiꞌnaya vayaꞌamo apavalelineno alino anupa huno apateteno magoke nofi vayaꞌmo alino ha maleno apategaiye, huno hapa paiꞌniye. 53 Ani afinatetiꞌmo haiya kava huta amagisupi, huꞌa huteꞌa vege huꞌa maiꞌnae. 54 Huꞌnayaꞌmofeꞌmo Yesuꞌa magoꞌe huno Yu vayaꞌai apaulagaleꞌmo umenitata osuno ataleno kaꞌme kotegamo uno Ifalemu taonifiꞌmo geꞌamo neꞌafiya vayaꞌeꞌmo maiꞌniye.

55 Yu vayaꞌai Pasova afinaꞌmo eno hogo huꞌnigeꞌapaeꞌmo hogoteꞌa muki vayaꞌamogimo mono kavaꞌmo akame hisayafeꞌmo alo huteꞌa neꞌyaꞌmo nesayafeꞌmo muki koꞌapimo atale atale huꞌa Yulusalemu taonifiꞌmo uꞌnae. 56 Uꞌa haiꞌa alopa mono nopiꞌmo he tiꞌa maiꞌneꞌapaeꞌmo Yesuꞌa agesayafeꞌmo apakaiꞌapimo, na agufa yane, hutapa lapakesa neꞌafiye. Neꞌyaꞌmo nesayategamo oꞌmegaiye, hutapa lapakesa neꞌafifiye, huꞌa huꞌnae. 57 Mono huꞌa neꞌapataya vayaꞌaiteꞌmo yagaiꞌa neꞌapataya vayaꞌe Falasi vayaꞌmogiꞌeꞌmo huꞌapaeꞌmo, mago vekamogamo agesanaꞌmoꞌmo eka laha paigetao kalavusi huta ateno, huꞌa hu maleꞌnae.