SAMU
Mani mukumo Isaleli vayaꞌmogimo ina kavaꞌmo huꞌa mono yokemo nehaya mukumae. Mago mani mukufiꞌmo haneꞌniya yokemo Yulusalemu kotega Goti mono 3 noꞌafiꞌmo aliꞌa anupa nehaya afinaꞌmo nehaya mono yokemo haneꞌniye. Magoꞌamo ina kavaꞌmo huꞌa mono hisaya afinaꞌmo ve aꞌnemogimo aeꞌa hakalo huꞌa nunumu huge magoke magoke ve aꞌnemogimo apakaiꞌapi kanaꞌapimo haneya afinaꞌmo huge nehae. Ina kavaꞌmo huꞌa asole vayaꞌmogimo mani yokeꞌe nunumu geꞌeꞌmo alu afina alu afinafeꞌmo avoꞌmo kae maleꞌnae. Henagaꞌamo mago vayaꞌmogimo aliꞌa magokepi maleꞌnagenoꞌaeꞌmo magoke mukugana huno haneꞌniye. Mani yokemogiꞌe nunumu gemogiꞌeꞌmo alu aepa alu aepaꞌagi aipa agesagi huno haneꞌniye.
Goti agiꞌaleꞌmo aliꞌa asaga hisaya yokemo hanege hosu kavaꞌapieꞌmo aeꞌa hakalo hisageno alino atalesiya nunumu gemo hanege hanageke yaꞌmo alige kana alige hisaya afinaꞌmo hapa maesiya yaꞌmo alisaya nunumu gemo hanege alopa afinaꞌmo saufa kini vekamo lekana paiꞌa atesaya afina yokemo hanege Gotifeꞌmo apakesamo afiꞌa fatago huꞌnaya kavaꞌapieꞌmo aeꞌa hakalo hisaya yokemo hanege Gotifeꞌmo hao ke hesaya yokemo hanege apaipamoꞌmo kana huge apakesamo afige hisaya kavafeꞌmo aeꞌa hakalo hisaya nunumu gemo hanege Gotifeꞌmo afi gesageno kame vayaꞌapimo apamagisiya nunumu gemo hanege ina kava huno ve aꞌnemogimo akame nehisaya alagepa kavaꞌapimo alino apave lisiya yokemo hanege huno haneꞌniye.
Mani yokemoꞌe nunumu gemoꞌeꞌmo muki afaꞌa maiꞌnona ve aꞌnemogitamo alu kava alu kavapiꞌmo maiꞌnisunagenoꞌaeꞌmo mani yokemoꞌa laha maegaiye. Lagaemo lamogaga aisuna afinatimo hanege laipamoꞌmo kana hisiya afinatimo hanege huno haneꞌniye. Lagaemo neya vayaꞌmo lokiya vayaꞌmo maisuna afinatimo hanege kosuna lesuna afinatimo hanege huno haneꞌniye. Mago afinaꞌmo kaitaꞌmo lahauge mago afinaꞌmo laipamoꞌmo kanale huge nehiye. Yoke mukufiꞌmo haneꞌniya yokemoꞌmo fatago kavaꞌmo huno muki mani agufa afinaꞌmo lagaemo afaꞌa maiꞌnonagenoꞌaeꞌmo alino anupa huno nelateyaꞌmofeꞌmo akeyaꞌvilagatiꞌmo eno hemeniꞌeꞌmo mani yokemoꞌa apakesamo afiꞌa fatago huꞌnaya kavaꞌmo alino lokiya vaino apateteno Goti vayaꞌamo afaꞌa neꞌmaiya kavaꞌapimo alagi ha neꞌmae.
Neviniꞌa asole samu yokemo avoꞌmo kae maleꞌniye. Moseseꞌa samu 90 gemo avoꞌmo kae maleꞌniye. Etaniꞌa samu 89 gemo avoꞌmo kae maleꞌniye. Esafiꞌa samu 73, 74, 75, 76, 77, 78, 79, 80, 81, 82, 83 gemo avoꞌmo kae maleꞌniye. Ina laꞌmo mago samu yokemo avoꞌmo kae maleꞌnifi huta oꞌafiꞌnone. Mago samu yokemo Mesaiya vekamo afole aisiya Kalaisi vekaeꞌmo ava gemo haneꞌniye. Mago mani samu gefatiꞌmo saufa kotalake mukufiꞌmo avoꞌmo kae maleꞌnae. Samu 2, 8, 16, 19, 21, 22, 23, 24, 40, 45, 69, 72, 89, 102, 110 Kalaisi vekaeꞌmo ava gemae. Magoꞌe samu yokefiꞌmo Kalaisifeꞌmo ava gemo haneꞌnegaiye.
1
Alagepa vayaꞌe Gotifeꞌmo mono nosaya vayaꞌefeꞌmo apava ge yokemae
1 Gotifeꞌmo mono nosaya vayaꞌmogimo apakesamo afiteꞌapaeꞌmo, ina kateꞌmo viyo, huꞌa nehaya kateꞌmo umenitata osuge hosu kavaꞌmo nehaya vayaꞌmo neꞌvaya kateꞌmo uꞌa he tiꞌa oꞌmaige mono katefeꞌmo, afa kane, huꞌa huteꞌa huꞌa faipa huꞌa neꞌataya vayaꞌeꞌmo magokepi lokaeꞌa itopaleꞌmo oꞌmaige huꞌa neꞌmaiya vayaꞌmogimo Goti aulagaleꞌmo alagepa huꞌa maiꞌnayanageꞌa afaꞌa apamogaga aigae. 2 Ani agufa kavaꞌmo nosayaꞌmonanafa Ala kava neꞌmo keꞌaepa geꞌalefekeꞌmo amuse huteꞌa apamogaga neꞌaiye. Apakaemo felugaꞌe haniꞌilagaꞌeꞌmo keꞌaepa geꞌaekeꞌmo apakesa afifi huꞌa neꞌmaiye. 3 Apakaemo ani agoꞌnanena folagapiꞌmo fai maleꞌniya yosamoꞌmo alagamo neꞌaeya afinaꞌmo alagamo neꞌaesigenoꞌaeꞌmo haitaꞌamo falu noteya yosagana huꞌa maiꞌnae. Muki aliꞌnaya aliꞌyaꞌapimoꞌmo alagepa huno afole neꞌaiye.
4 Hosu vayaꞌmo ani kava huꞌa oꞌmaiꞌnae. Apakaemo mago haletiꞌya yakana huꞌa maiꞌnae. Haleti yaꞌamo haleꞌnagenoꞌaeꞌmo yasimoꞌmo alino halelino neꞌviya haletiꞌya yakana huꞌa maiꞌnae. 5 Maiꞌnayaꞌmofeꞌmo Gotifeꞌmo mono nosaya vayaꞌmo agoti huno apatesiya yateꞌmo he tiꞌa oꞌmaiꞌa alagi asagauꞌa aigae. Inagi hosu kavaꞌmo nehaya vayaꞌmogimo fatago vayaꞌmo aliꞌa anupa huꞌa maisayapiꞌmo uꞌa oꞌmaigae. 6 Ala kava neꞌmoꞌa fatago vayaꞌmogimo nehaya kavaꞌapieꞌmo apakeno amuse huno neꞌapateyaꞌmonanafa agaefeꞌmo mono nosaya vayaꞌai aliꞌyaꞌapimo alino hano huno atalesigeꞌa alagi lageso hugae.