1 O Gotiyo, huꞌna, Alopa gefatiꞌmo ge nehuvanagi afiyo. Nunumu nehuva geꞌnieꞌmo kagesa afifi huka maiyo. 2 Ma mopamo atupalegatiꞌmo kagaefeꞌmo ge huguve. Lusi kana yaꞌmo alisugeno aino nati kaesiya afinaꞌmo navalelika haika yafateꞌmo faika nato. Nagaemo afepiꞌmo maiꞌnovanagi navalelika haika anaga haneꞌniya yafateꞌmo faika nato.

3 Kagaemo fala kiꞌna maiꞌnova nokana huka maiꞌnekaeꞌmo alagepa huka yagaika nateꞌnane. Kagaemo yatala noꞌmo lokiya nokana huka maiꞌnanageꞌnaeꞌmo kame vayaꞌnimo apataleꞌna haiꞌna alagepa huꞌna maiꞌnove. 4 Nagaemo alagepa seli nokafiꞌmo muki afinaꞌmo maige maige huꞌna maiguve. Naha maegane, huteꞌna uꞌna kahakufiꞌmo fala kiguve.

5 O Gotiyo, huꞌna, ma kava huguve, huꞌna kaha paiꞌnova geꞌnimo ago afiꞌnane. Mafaꞌneꞌapimogimo afoꞌapimogi kagemi yaꞌapimo neꞌaliya kava huꞌa kagikaeꞌmo koli nehaya vayaꞌmogimo alagepa yakamo aligae. Ani kava huka alika namisanageꞌna aliguve. 6 Kagaemo kini vekamo ha maesanageno asole kafugamo maigiye. Agaemo mafaꞌneꞌamogi mafaꞌneꞌapimo apakegaiye. 7 Agaemo Goti aulagaleꞌmo muki afinaꞌmo alagepa huno maige maige huno maigiye. Kahau huka atesana kavaꞌe agaetefeꞌmo lama geꞌeꞌmo alo huvo. Kahau huka ateteka alagepa huꞌna yagaiꞌna kategauve, huka huꞌnana lama gekaletiꞌmo yagaika ategane.

8 Naha maesanageꞌna muki afinaꞌmo kagikaleꞌmo aliꞌna asaga huꞌna katege katege huꞌna maiguve. Huguve, huꞌna kaha paiꞌnova geꞌniletiꞌmo ani kavaꞌmo akame hisuvafeꞌmo muki afinaꞌae afinaꞌaeꞌmo kagikaleꞌmo aliꞌna asaga huꞌna kategauve.