1 Egetao Ala kava neꞌmo agiꞌaleꞌmo alita asaga huta agaefeꞌmo mono yokemo hugune. Lokiya vekatimo yafakana huno maiꞌneno lagufamo alino katino nelateya vekaekeꞌmo alopa gefatiꞌmo huteta lamogagamo aigune. 2 Agaetegamo egetao agaefekeꞌmo hao ke hegaune. Agiꞌaleꞌmo alita asaga huta lamogagamo aiteta samu yokemo hugune. 3 Ala kava neꞌmo ala Gotiꞌapimoꞌmo maiꞌniye. Ala kini vekamo maiꞌneno muki aigofe gotiꞌapimogimo alagi aeno apakaseno yagaino neꞌapateyaꞌmofeꞌmo mono yokemo higetao. 4 Kagoꞌmufilagamo yagaige aveleꞌmo yagaige huno neꞌyagaiye. 5 Solovala aniꞌe mopaꞌeꞌmo alo huꞌniyaꞌmofeꞌmo agaiꞌa yaꞌmo haneꞌniye. 6 Etapa ape higetao Ala kava neꞌmoꞌa alo huno lateꞌniya vekaeꞌmo laleꞌya faiꞌneta mono huta maigune. 7 Gotitimoꞌmo maiꞌneno yagaino nelateya vayaꞌmo sipisipi vayaꞌamo agaiꞌa kegiꞌyafiꞌmo haita maiꞌnonaꞌmofeꞌmo agaefekeꞌmo mono higetao.

Hemenimo lapakaemo Goti geꞌamo neꞌafisayana 8 lapaipamo alita lokiya vaitapa oꞌateyo. Lapakinago vayaꞌmogimo kaꞌme kotegamo nata neꞌa neꞌuꞌapaeꞌmo namalageka huꞌnae. Geꞌnimo ago amagiꞌa ataleꞌnaya kava hutapa geꞌnimo amagitapa oꞌataleyo. 9 Nagaemo lusi alagepa kavaꞌmo huꞌna fotiꞌa kafugamo hapa maeꞌnogeꞌa alagepa kavaꞌnimo ago ageꞌnayaꞌmonanafa hosu kavakeꞌmo nehuꞌapaeꞌmo, na agufa kavaꞌmo husifi, huteꞌa namalageka huꞌnae. 10 Huꞌnayaꞌmofeꞌmo ani afinaꞌmo muki maiꞌnaya vayaꞌaifeꞌmo naipamo kana huꞌnaeꞌmo, muki afinaꞌaeꞌmo hosu apaipa apakesageꞌmo afiteꞌapaeꞌmo neꞌnatalae. Geꞌnimo alagi alagepa huꞌa noꞌafiye. 11 Naipamo leꞌnigeꞌnaeꞌmo nagoꞌya ataleteꞌna lokiya gefatiꞌmo huꞌnaeꞌmo, nagaeꞌeꞌmo haiꞌeꞌa maiꞌa falu hisaya koteꞌmo alagi haiꞌa oꞌmaigae, huꞌna huꞌnove.