1 Ma mopafi muki haopalega maiꞌnaya vayaꞌmogitapamo lapamogaga aitetapa Ala kava nefekeꞌmo alopa gefatiꞌmo hiyo. 2 Ala kava neꞌmo agiꞌalefeꞌmo mono nehutapaeꞌmo lapamogaga lapamagaga aitapa maiyo. Yokemo nehutapaeꞌmo agaemo maiꞌniya yategamo etapa maiyo. 3 Agetapa aeto hutetapaeꞌmo Ala kava nefeꞌmo, Gotiꞌmae, hutapa hiyo. Lagaemo lagaitimo alo osuꞌnopa agaiꞌamo alo huno lateꞌniyaꞌmofeꞌmo lagaemo agaiꞌa vayaꞌmo maiꞌnone. Lagaemo vayaꞌamo maiꞌneta sipisipiꞌamo agae kegiꞌyafiꞌmo haita maiꞌnonagenoꞌaeꞌmo yagaino nelate.

4 Kahao ke nehone, hutapa hume hume neꞌutapaeꞌmo mono noꞌamo yafa lafi kegiꞌya kate kipaꞌapifiꞌmo faletapa haiyo. Mono no kumaꞌaleꞌmo neꞌutapaeꞌmo agiꞌaleꞌmo alitapa asaga hume hume viyo. Hao ke hetetapa ala agiꞌamo amiyo. 5 Ala kava neꞌmo alagepa vekamo maiꞌniyaꞌmofeꞌmae. Agaemo lagaefeꞌmo hau ayamopafiꞌmo haume haume neꞌviya kavaꞌamoꞌmo hauno hano osuno muki afinaꞌmo nehaiye. Lama gemo hunoꞌaeꞌmo, lapa maeꞌna lapamiguve, huno huꞌniya geꞌamo alagi oꞌataleno akame huno muki hemenimo maiꞌnaya vayaꞌaitegaꞌe aliꞌa apateme apateme visaya vayaꞌaitegaꞌeꞌmo ani agufa kavaꞌmo afaꞌa hugiye.