1 Ala kava neꞌmoꞌa Ala kava neꞌnieꞌmo, lamaga nahaopaleꞌmo faika maime maime neꞌugeꞌnao kame vayakamo aliꞌna kaiya afeꞌalumelaga apateno, huno ha paiꞌniye. 2 Ala kava neꞌmoꞌa kayotetiꞌmo yagaika apatesana himamukamo Saiyoni taonifatiꞌmo alino atesigeno ugiye. Kame vayakamogi folagapiꞌmo maiꞌneka yagaika apato, huno kaha paiꞌniye. 3 Himamukaletiꞌmo hisana afinaꞌmo vayakamogimo apaipafatiꞌmo hapauꞌnisigeꞌa apakufamo kamiteꞌa apaote konali kukenamo aliꞌa vaiteꞌa kakame hugae. Aꞌnemogimo apaipa kupatiꞌmo mafaꞌnemo aliꞌa neꞌataya kava huno netepiꞌmo laoꞌyaꞌmo nelamiye. Ani kava huno Gotiꞌa neya vayakamo alino apatesigeꞌa laoꞌyakana huꞌa afole aiteꞌa kagaetegamo ugae. 4 Ala kava neꞌmoꞌa aipa agesamo alino afe oleno agoꞌyamo ataleno ge hunoꞌaeꞌmo, Melikisetekiꞌa mono huno neꞌateya vekamo maiꞌniya kava huka agae akamelegatiꞌmo agae nofi vekamo mono huka neꞌatana vekamo maiꞌneka muki afinaꞌaeꞌmo maige maige huka maigane, huno kaha paiꞌniye.

5 Ala kava neꞌmo lamaga kahaopaleꞌmo maiꞌniye. Agaemo aipamo leno apatesiya afinaꞌmo kini vayaꞌmo alagi apamagigiye. 6 Agaemo muki alu nofi vaya alu nofi vayaꞌmo alino fako huno apateteno kamiti apamagisigeꞌa faliteꞌapaeꞌmo apakufaꞌamo mopafiꞌmo asagauꞌa aigae. Agaemo muki haopalega maiꞌnaya kini vayaꞌaifeꞌmo kame huno apateteno huno aeno apakasegaiye. 7 Kategamo neꞌunoꞌaeꞌmo ka agiꞌnaleꞌmo haneꞌniya anipatiꞌmo negaiyaꞌmofeꞌmo he tino lokiya vaino aeno apakasegaiye.