1 Ala kava nene, huꞌna, alagi nageka alagepa huka nageꞌnane. 2 Nagaemo itopaleꞌmo neꞌmaufi he tiꞌna neꞌmaufi huꞌna maiꞌnogekaeꞌmo neꞌnagane. Kagaemo afagitegamo maiꞌnekaeꞌmo nagesa neꞌafuva nagesamo neꞌnagane. 3 Umenitata huge havaege nehugekaeꞌmo nageteka muki nehuva kavaꞌnimo ago neꞌnagane. 4 Ge osuꞌnovaꞌmonanafa Ala kava nene, huꞌna, henagaꞌamo hisuva geꞌnimo ago ageꞌnane. 5 Yagaika ku aika nateteka nagaeteꞌmo kayaꞌmo maleka neꞌnatane. 6 Ago nageꞌnanana kagae kaipa kagesamoꞌmo nagae naipa nagesamo ago aeno agaseꞌniyanageꞌna afaꞌa oꞌagegauve. 7 Kagaetegatiꞌmo faiꞌna kasalo paetaleꞌna haiyategamo uguve. Maiꞌnanategamo uꞌna oꞌmaiꞌna naoteꞌmo maisuvafeꞌmo haiyategamo uguve. 8 Kokuꞌnapiꞌmo haiꞌna maisuvana maiꞌnane. Nagaemo faliꞌnaya vayaꞌmo uꞌa maiꞌnaya kotegamo lamiꞌna maiguvana maiꞌnane. 9 Yegemo hainenoꞌaeꞌmo hayomo neꞌaeya yaꞌmoꞌa afagitega mopa atupaleꞌmo malage huno neꞌviya kava huꞌna malage huꞌna afagitega uꞌna maiguvana maiꞌnane. 10 Afagitega uꞌna maiꞌnisugekaeꞌmo kayatetiꞌmo navalelika egane. Ani kava huka lamaga kayatetiꞌmo natafauka maigane. 11 Nagaemo, hani huka aika nati kao, huꞌna hisuvana hani huꞌniya yapiꞌmo ha le yakamoꞌa aeno ha leꞌnigeka neꞌnagane. 12 Hani huꞌnisiya yapiꞌmo uꞌna fala kisuvana nagegane. Yegemoꞌmo aeno ha neleya kava huno kagae kaulagaleꞌmo hanipiꞌmo aeno ha nele. Hani nehiya kavaꞌmoꞌmo kagae kaulagaleꞌmo ha le yakana huno haneꞌniye. 13 Muki nahau nayamopafiꞌmo haneꞌniya yaꞌaꞌnimo kagaikamo alo huꞌnanageno kagaika yaꞌmo haneꞌniye. Muki nagufafiꞌmo haneꞌniya yaꞌaꞌnimo alo huteka alika itaꞌnimo aipafiꞌmo magokepi maleꞌnane. 14 Kagaemo alagepa huka alo huka nateꞌnanaꞌmofeꞌmo koli huteꞌna kagikaleꞌmo aliꞌna asaga nehuve. Nagaetegamo huꞌnana kavaꞌmo ageteꞌnaeꞌmo nahau neꞌauve. Huꞌnana kavafeꞌmo alagepa kavaꞌmo huꞌnane, huꞌna huteꞌna aliꞌna namalagiꞌnove. 15 Itaꞌnimo aipafiꞌmo maiꞌnogenoꞌaeꞌmo nayamufaꞌnimo afole aiteno kosime kosime uꞌnigeka nageꞌnane. 16 Itaꞌnimoꞌmo aipafatiꞌmo alino oꞌnateꞌniya afinaꞌmo muki nagufafiꞌmo haneꞌniya yaꞌaꞌnimo ago ageꞌnane. Ma mopafiꞌmo afole aiꞌna oꞌmaiꞌnogekaeꞌmo na magi afinaꞌmo ma mopafiꞌmo maisapi huka mukufiꞌmo ago avoꞌmo kae maleꞌnane. 17 Nagaefeꞌmo kagesamo neꞌafina kavakamoꞌmo aeto agufa kanale yaꞌmo haneꞌnigeno neꞌnahaiye. Nagaefeꞌmo kagesamo neꞌafina kavaꞌmo lusi asole kavaꞌmo haneꞌniye. 18 Lekana paiguvana ani kahaepaleꞌmo aise yafaꞌmo ago aeno agaseꞌniya agufa yaꞌmo haneꞌniye. Naupatiꞌmo he tiꞌnaeꞌmo kagaeꞌekeꞌmo maiꞌnoꞌae. 19 O Gotiyo, huꞌna, hosu vayaꞌmo apamagisanafeꞌmo neꞌnahaiye. Kaveta nehapaya vayaꞌmo nataleꞌa visayafeꞌmo neꞌnahaiye. 20 Apakaemo kagaefeꞌmo hosu gemo huteꞌa huꞌa faipa huꞌa nekatae. 21 O Ala kava nene, huꞌna, Apaini huꞌa nekataya vayaꞌaifeꞌmo naini huꞌna neꞌapatove. Apakameꞌyamo nekamiya vayaꞌai apaulagafiꞌmo navenatuꞌna heꞌna neꞌapatove. 22 Nagaemo apakaefeꞌmo alagi oꞌnahauꞌnigeꞌnaeꞌmo, kame vayaꞌnie, huꞌna nehuve. 23 O Gotiyo, huꞌna, naipa nagesafiꞌmo alagepa huka alika fako huka nago. Naipa nagesafiꞌmo aulu haeka ago. 24 Naipafiꞌmo hosu kavaꞌnimo haneꞌnifigi ageteka alagepa huꞌna maige maige huꞌna maisuva kateꞌmo navalelika uvo.