1 Иона щи вер урәӈән нŏпсәԓ шӑкәс пӑ ԉикащәс.

2 Щӑԓта Турәм Куща пеԓа ԓўв пойәкщәс пӑ йастәс: «Турәм Куща! Щит эԓты щи ма пӑԓсәм, хун ма ма мўвемән хŏԓна усәм? Щи урәӈән Фарсис пеԓа ма хŏнтасәм, ма уйәтсэм, Нӑӈ, Турәм, йӑм сӑмәӈ, щаԉаӈ, арпуш умщәӈ, хўв ԓавԓәсты верәтԓән, шука пайәтты йасӈен китты ӑт кашащԓән.

3 Ин хŏты, Турәм Куща, ма ԓыԓэм ма эԓтэм ўйи, уԓтэм эԓты, хӑԓԓәм–ки йӑмшәк».

4 Щӑԓта Турәм Куща йастәс: «Щит эԓты нӑӈ шек нŏпсэн шӑкәс?»

5 Иона вош эԓты ким этәс, пӑ хутԓыты пеләк сӑхат вош пўӈәԓән пӑԓ нŏрәм хŏрпи ŏт верәс, ԓоӈԓа варәс нўвәт пŏнәс, щи иԓпийа сай тӑхайа опсәс, ваттыйа, вош хŏты йиԓ.

6 Турәм Куща щиты верәс, ун лыптәӈ пухращ энмәԓтәс, Иона нўмпийән пӑԓа энмәс, ԓўв охәԓ сайән ат ус, Иона ԉикәԓ ат мӑнәс ԓуԓән; Иона щи ун лыптәӈ пухращ урәӈән нŏх амтәс.

7 Турәм щиты верәс, кимет хӑтәԓән хутԓәты пŏрайән, ин ун лыптәӈ пухращ сŏв шупән шŏппи пŏрса пӑ ԓўв нŏх сорәс.

8 Хун най этәс, Турәм рўвәӈ вот китәс, Иона ŏх найән щиты кўтәрԓыса пӑ ԓўв рэԋԓы питәс. Сŏрәм ԓўвеԓа вохәс пӑ йастәс: «Уԓтэм ушән, хӑԓԓәм–ки йӑмшәк».

9 Турәм Иона пеԓа йастәс: «Нӑӈ мўй йӑна щи лыптәӈ пухращ урәӈән нŏпсэн шӑкәс?» Ԓўв йастәс: «Шек нŏпсэм шӑкәс, хӑԓты унты!»

10 Щиӈәԋща Турәм Куща йастәс: «Нӑӈ лыптәӈ пухращ щаԉәтԓән, ԓўвеԓ ӑт энмәԓтысэн пӑ щи кеша ӑт рупитысән. Ԓўв и ат сыс энмиԓыйәс пӑ кимет ат сыс нŏх сорәс.

11 Ниневия мўй Мӑнэм щаԉәтты ӑт рӑхәԓ? Щит Вŏԓаӈ вош, хŏта сот хус щŏрәс мŏԓтас хŏйат йӑм пеләк йош пӑрта пеләк йош эԓты артаԓәтты ӑт верәтԓәт, пӑ ар вой уԓ.»