1  Ese 1.28; Mt 17.2; VB 1.15-16Gu mbara wom garav, gu Fhe Bakɨme enser ŋkasŋka mbe garim, ana Hevenan kegap zeri. Ana buiva hurar wo ndogiap, shaar wo sharigi fara muuŋgim, vhuisha ana panan ki. Ana khom ŋgarav, ran fara muuŋgi. Ana suani vhavir khua gari gangana mbui. 2 Mba enser, ana dɨmgi gava bisaŋ maneŋ suirigi. Mba gavaneŋ fhoga ki. Ana won guva son mbasɨga tɨ khɨngi. Ana won harigi son, nuiana tɨ thɨgi. 3  VB 8.5Ana maaŋ muuŋgiap, thɨgap, guigira khɨrɨv kama bakɨme rugap raion kaai kakama mbui. Ana kamgia thugim, harathɨgi buivi phɨrerav wari wo buni nzuai. 4  Dan 8.26; 12.4; 12.9Mba harathɨgi buivi phɨreregim, gu mbe suaŋgi buni kherɨr za mbui. Gu nta kherɨr za mbuav, gu wom mbararagim, guma kamthooŋ mbe Hevenan kav khaŋ nzuai, “Ndu mba harathɨgi buivi suaŋgi buni, ndu ndɨkndɨgar nta suirav kɨri. Ndu nta kherɨ thari.”

5  Kis 8.6 Kis 20.11; Lo 32.40; Dan 12.7; Amo 3.7Gu mbara mba enser garim, ana so mbasɨk thɨgim, ana so mbe nuiana thɨgi. Gu ana garim, ana won guva hareŋ ŋgav, Heven farasarigi. 6  Neh 9.6; Sng 146.6; VB 4.11; 14.7; 16.17Ana Heven farasarav khaŋ nzuai, “Guigi guarara kha vun ki Fhe Bakɨme, ana zazera mbara muuŋgiap ki. Ana kha Heven ga muuŋgiap, anan ki bigi, ana vhɨra za nta muuŋgi. Ana vhɨra kha nuiana muuŋgiap, anan ki bigi, ana vhɨra za nta muuŋgi. Ana vhɨra kha mbasɨga muuŋgiap, ana vhɨra anan ki bigi, ana vhɨra za nta muuŋgi.” Mba enser vhɨra khaŋ nzuai, “Tuk ntige vhɨzɨr za mbui. Fhe Bakɨme ntigem wom rargɨ kegɨrga tuktɨgi fhuvara. Zakɨra fhuvara! 7  Dan 9.6; 9.10; Amo 3.7; Ro 16.25-26; VB 11.15Mba harathɨgi enser wo mbarɨva berarga, ana khɨkhɨm hɨrga, Fhe Bakɨme mba muun za suaŋgi bigeŋ, ne zorga ki, Fhe Bakɨme nen muuŋgirim, ne guigira hɨgɨrga. Ana fhum mba bigen won kamthooŋ gumgi, mbe anan ŋaara mbui, ana nen mbe suaŋgim, mbe ne bun suaŋgi.”

8  Ese 2.8–3.3Gu mba fhum mbararagi guman kamthooŋ Hevenan kav wom khaŋ na nzuai, “Ndu ŋgɨp mba mbasɨk gum nuiana thɨgi enser, ana mba gava fhogap, ana suirav ki. Ndu ŋgɨp, ana han ana ndigɨri.” 9  Jer 15.16Gu ne mbararagiap, mba enser han vov, khaŋ ana nzuai, “Ndu mba gava bisaneŋ nan nɨɨŋ.” Ana mbara khaŋ na nzuai, “Ndu ana ndigip, ana mbɨ. Ndu ana mbegɨrga, ndu fheeŋ shiv keŋkeŋ maanga. Ndu ana mbɨrga, ana ndun kamthoon guigira vhergip, hanin vhera farar muuŋgirga.” a Kha bigɨn “Hani,” ana mbɨn vher ma. Ana para gum nɨɨŋnɨɨiŋ mbui mbɨ ma. Nta ndɨɨa ruav, parawa shivir phara ndia vov, hani ga mbui. Gumgi gu mbigi vhɨrve ana pav, anan wari won mba suim, nta vhergi. 10  Ese 2.10; 3.3Ana maaŋ suaŋgim, gu mbara ana farve tɨn mba gava bisaneŋ ndigap, ne pi. Gu ne pim, ana nan kamthoon hani fara muuŋgiap, guigira vhergi. Gu ana mbegap, fheeŋ shiav keŋkeŋ mbai.

11 Mbe mbara khaŋ na nzuai, “Ndu Fhe Bakɨme kamthooŋ guma nzuai mbugum, ndu taagip zumgum kha gumgi gu mbigi vhɨrve hɨrga bigi bun mbe suaŋgirga. Ndu kha nuianan ki ŋgui bakɨvi, gu mbarkɨrga fhavi, mbarkɨrga kaar nzuai gumgi gu mbigi, gu kha nuianan ŋgui vhɨrve gari gumgir pani zam, ndu mba buni bun mbe suaŋgiri.”