BAMBANGI KU YELUSALEMI
2
Ndukudulu Pheve Yinlongo
1 Lumbu ki Pantekoti bu kidedakana, babo bakutakana va kimosi. 2 Zimbukila biyoko bingolo biba ku diyilu banga vuka ki ngolo, bimana wasa mu nzo yoso yi baba. 3 Bosi minlaki mi mbazu mivasuka, miba monikina, mitelama va mbata mintu miawu. 4 Batu boso bamana wala mu Pheve Yinlongo ; ayi batona yolukazimbembo bankaka, boso Pheve Yinlongo kaba kuba yolukisila.
5 Bayuda bawombo baba kinzikanga Mina mi Nzambi baba mu zitsi zioso zi ntoto bayiza ku Yelusalemi. 6 Biyoko bina bu bitembakana, nkangu wu batu wukutakana ayi wusimina mu mona ti kadika mutu wulembo wa mu mbembo andi. 7 Basimina buwombo ayi bakiyuvula bawu na bawu :
—Tala, batu boso bobo bantuba basi ko basi Ngalili e ? 8 Vayi buevi, beto boso, tulembo wila kadika mutu mu yandi mbembo, yoyi kabutukila e ?
9 Bila vava vadi basi Palitesi, basi Medesi, basi Elami, ayi beto tumvuandanga mu Mezopotami, basi Yuda, basi Kapadose, basi Ponti, basi Azi, 10 basi Filizi, basi Pamfili, basi Ezipite, basi zunga ki Libi kioki kifikimini ayi Silene, bosi beto basi Loma, tumvuandanga vava ; 11 Bayuda ayi banzenza bankaka zikituka Bayuda, basi Kelete, basi Alabi ; tulembo kuba wi balembo samuna mambu manneni ma Nzambi.
12 Babo basimina ayi bayuvasana : “Diambu diadi mbi dinsundula e ?” 13 Vayi bankaka baba nseva, batuba : “A beno keti vinu bakololo !”
Piela wulonga nkangu wu batu
14 Bosi Piela wutelama ayi kumi mvuala wumosi, wuvumbula mbembo, wuba kamba :
—Beno basi Yuda ayi beno boso lumvuandanga mu Yelusalemi, bika luzaba diambu diadi ayi luteka matu mu mambu mama. 15 Batu baba basi kolo vinu ko banga bu lulembo yindudila bila tukidi kueto mu thangu yi vua yi nsuka. 16 Vayi mambu mama mawu mambu mabikula mbikudi Yoweli :
17 Nzambi wutuba ti :
Tala mambu mela ba mu bilumbu bi tsuka :
ndiela dukula Pheve ama Yinlongo mu batu boso,
bana beno babakala ayi babaketo bela bikula,
bamatoko meno mela mona zitsongolo,
bosi biboba bieno biela lota zindozi.
18 Nyinga, mu bilumbu bina, ndiela dukula Pheve ama Yinlongo
mu bisadi biama,
bibaketo ayi bi babakala ayi bela bikula ;
19 Ndiela vanga bikumu mu matuti, mu diyilu.
Ndiela monisa bidimbu va mbata ntoto :
Menga, mbazu ayi muisi ;
20 thangu yela kituka tombi,
bosi ngondi yela kituka menga.
Mawu mambu mela monika tuamina lumbu ki Pfumu,
lumbu kinneni ayi ki nkembo ;
21 ayi buela, woso mutu wela tela dizina di Pfumu wela vuka.
22 A beno basi Iseli, wanu mambu mama : Yesu muisi Nazaleti, mutu wowo Nzambi kalumonisa ayi kakikinina va meso meno mu bikumu, mu mambu manneni ayi mu bidimbu biobi Nzambi kavangila mu mioko miandi va khatitsikꞌeno, banga kuandi bu luzebi buawu 23 baluyekudila niandi boso bubela mayindu ma Nzambi ayi boso bubela lukanu lukakikanina. Beno lumbanda va dikulusi ayi lumvondisa mu mioko mi bankua masumu. 24 Nzambi wumfulukisa ayi wunkula mu mianga mi lufua bila lufua lusia ba kadi lulendo ko mu kunsimbidila. 25 Bila Davidi wutuba mu diambu diandi :
Minu ndimona mu zithangu zioso Pfumu ku ntualꞌama.
Bila widi va koko kuama ku lubakala
muingi ndibika nikunu.
26 Diawu ntimꞌama wumona monina khini
ayi ludimi luama lumona moni khini
ayi nitu ama yela vundila mu diana dioso.
27 Bila wulendi yekula ko muelꞌama wusiala ku tsi yi bafua,
ayi wulendi kikinina ko ti nitu yi kisadi kiaku kinlongo yi bola.
28 Ngeyo wumbonisa zinzila zi luzingu.
Bosi wela ku mbonisa khini yiwombo
bu wela kumbengudila thalu aku.
29 A bakhomba ziama, bika ndilukamba mu kambu memata mu diambudi nkulu eto Davidi, niandi wufua ayi wuziku. Ziami kiandi kidinate lumbu kiaki. 30 Bu kaba mbikudi, ayi bu kazaba ti Nzambi wunlevila ndefi ti wela vuandisa va kundu kiandi ki kipfumu mutu wowo wela totukila mu nkunꞌandi, 31 buna niandi wukimuena ayi wuyolukila mfulukulu yi Klisto. Wutuba ti : kasia yekolo ko mu tsi yi bafua ayi nitu andi yisia bola ko. 32 Yesu beni, Nzambi wumfulukisa. Beto boso tuidi bambangi mu diambu diodi. 33 Bosi wutombolo mu diambu di vuanda va koko ku lubakala ku Nzambi, ayi, wutambula kuidi Tata Pheve Yinlongo yivanunu tsila ; buna niandi wutembikisa mambu lulembo moni ayi lulembo wi.
34 Bila Davidi kasia kuenda ku Diyilu ko, vayi niandi veka wutuba :
Pfumu wukamba kuidi Pfumuꞌama :
Vuandila va koko kuama ku lubakala,
35 nate ndiela mana tula bambeni ziaku
zioso ku tsi malu maku !
36 Bika Iseli dioso dizaba mu bukiedika ti Yesu beni diodi lubanda va dikulusi Nzambi wunkitudi Pfumu ayi Klisto !
Batu batheti bawilukila
37 Bu bawa mambu mama, mintima miawu miluala ; diawu bayuvudila Piela va kimosi ayi bamvuala bankaka :
—A bakhomba, a mbi tuvanga e ?
38 Piela wuba vutudila :
—Lubalula mavanga ! Bika kadika mutu mu beno kabotama mu dizina di Yesu Klisto mu diambu di ndemvokolo yi masumu. Buna luela tambula dikaba di Pheve Yinlongo. 39 Bila tsila beni yidi mu diambu dieno, mu diambu di bana beno ayi mu diambu di baboso badi thama, babo bobo Pfumu eto Nzambi kela tela mbila.
40 Piela wubuela kuba kamba diaka mambu mawombo muingi bawilukila ayi wuba kindisa ti :
—Bika lukivukisa mu tsungi yayi yi mbimbi.
41 Babo bobo bawilukila mambu ma Piela babotama. Mu lumbu kina nduka-nduka mili tatu zi batu zi buelama.
Nzingulu yi batu batheti ba wilukila
42 Buna bazingila ngolo mu landakananga malongi ma bamvuala, ayi mu kithuadi, mu ndiwulu dipha ayi mu zitsambulu.
43 Baboso bamona boma ; bamvuala bavanga mambu manneni ayi bikumu. 44 Batu boso bawilukila baba kalanga va buangu kimosi ayi batula bima bioso mu kithuadi.
45 Baba sumbisanga mintoto miawu ayi bima biawu ayi baba kabulanga kuidi batu babo boso bubela minkiza mi kadika mutu.
46 Bilumbu bioso, mu kithuadi kimosi baba kutakananga mu Nzo Nzambi, baba dianga mapha mu zinzo ziawu, baba dianga bidia biawu mu khini ayi mu kukikulula koso. 47 Baba kembisanga Nzambi ayi batu boso baba zola.
Kadika lumbu Pfumu wuba kuba buelanga batu bobo baba mvukanga.