1 Yesu bu kaba mvioka, wumona mutu wumosi wubutuka phofo. 2 Buna minlonguki miandi minyuvula :

—Labi, nani wuvola masumu : mutu wawu voti bambuta bandi muingi kabutuka phofo e ?

3 Yesu wuba vutudila :

—Nana, kadi sia ti niandi wuvola masumu voti zimbota ziandi vayi mu diambu di mavanga ma Nzambi mamonika mu niandi. 4 Mfueti vanga mavanga ma mutu wowo wuthuma muini bu wukidi. Buisibuawu yila mutu kalendi buela sala ko. 5 Bu ndikidi va nza, minu ndidi kiezila ki nza.

6 Bu kamana tuba mambu momo, wulobula madita va tsi, wusoba nyamba mu madita mandi ; wuvinda nyamba beni mu meso ma phofo.

7 Buna wunkamba :

—Yenda ayi wukisukula ku buindi ki Silowe (“Silowe” dinsundula “wutumu”).

Phofo beni wuyenda, wukisukula. Wutoma mona bu kaba mvutuka.

8 Batu bafikasana yandi ayi batu babo batuama kunzaba ti niandi wubanlombi, bayuvasana :

—A beno ! Niandi ko mutu wowo wubedi vuandanga ayi wubedi lombanga e ?

9 Bankaka batuba ti :

—Niandi !

Bankaka batuba ti :

—Nana, niandi ko ! Dedakana kuandi badedikini !

Vayi niandi veka wuba kamba :

—Minu kuandi !

10 Buna bawu banyuvula :

—Vayi buevi buzibukididingi meso maku e ?

11 Wuba kamba :

—Mutu wowo bantedilanga Yesu, niandi sobikisidingi nyamba, vindidi yawu mu meso mama, bosi wukhembi ti yenda kisukula ku buindi ki Silowe. Buna ndiedingi, ndikisukudi ayi mbueningi.

12 Banyuvula :

—Mutu beni kuevi kadi e ?

Wuba vutudila :

—Ndikadi zaba !

13 Banata mutu wowo wuba phofo kuidi Bafalisi. 14 Kiba lumbu ki saba* 9.14 Lumbu ki saba : Kiawu kiba lumbu ki lumingu kuidi Bayuda. Mina miawu miba kandika mu sala kisalu mu lumbu kioki. Tala Yowani 5.9. kioki Yesu kasobikisa nyamba ayi kazibula meso ma phofo. 15 Bafalisi mamvawu banyuvula buevi meso mandi mazibukila.

Niandi wuba vutudila ti :

—Nyamba katudidingi mu meso mama, ndikisukudingi ayi ndilembo moni !

16 Ndambu Bafalisi bakamba :

—Mutu wawu kasi ba kuidi Nzambi ko. Bila kakinzikanga ko lumbu ki saba !

Vayi bankaka bavutula :

—Buna buevi nkua masumu kalenda vangila bikumu banga biobi e ?

Mu bila kioki batu bavasuka. 17 Babuela yuvula diaka phofo :

—Ngeyo veka, mbi wuntuba mu diambu di mutu wowo e ? Bila meso maku kazibudi.

Wuba vutudila :

—Niandi mbikudi kadi.

18 Bayuda basia wilukila ko ti niandi wuba phofo ayi basia wilukila ko ti meso mandi mazibukidi ; diawu nate batumisa bambuta bandi.

19 Baba yuvula :

—Bukiedika kuandi ti niawu niandi muanꞌeno wowo lueti kamba ti wubutuka phofo e ? Vayi buna buevi kalembo monina buabu e ?

20 Zimbuta bandi baba vutudila :

—Tuzebi ti niawu niandi muanꞌeto, wubutuka phofo. 21 Vayi buevi keka monina buabu, diodi tukadi dizaba ayi tukadi zaba nani wunzibudingi meso. Vayi weka wuyunduka, lunyuvula niandi veka bila maka tuba mambu momo madi mu niandi.

22 Zimbuta bandi zitubila mambu momo bila boma zimona Bayuda ; mu diambu di Bayuda bawizana ti woso mutu wela kikinina ti niandi Klisto, buna mutu wowo wela kanduku mu buela kotanga mu nzo yi lukutukunu. 23 Diawu bambuta bandi zitubila ti : “weka wuyunduka, lunyuvula niandi veka.”

24 Bafalisi batumisa mu khumbu yimmuadi mutu wowo wuba phofo, bankamba :

—Vana nkembo kuidi Nzambi bila beto tuzebi ti mutu wuna widi nkua masumu !

25 Vayi mutu beni wuba vutudila :

—Enati widi nkua masumu, diodi ndisi dizaba ko vayi diambu dimosi kaka nzebi : ndibedi phofo vayi buabu ndilembo moni.

26 Babuela kunyuvula diaka :

—Vayi mbi kasidingi e ? Buevi kazibudidingi meso maku e ?

27 Niandi wuba vutudila :

—A mamveno diaka, keti ndilukembingi mambu moso ! Vayi lumengi kueno wa ! Bila mbi lutididi diaka kuma wila e ? Bati beno mamveno lutidi kituka minlonguki miandi e ?

28 Bamfinga ayi bankamba :

—Ngeyo widi nlonguki andi, vayi beto tuidi minlonguki mi Moyize ! 29 Beto tuzebi ti Nzambi wuyolukila mu Moyize, vayi mutu wowo, tuisi zaba ko kuevi kaba !

30 Mutu beni wuba vutudila :

—Didi ditsiminanga ! Beno luisi zaba ko kuevi kaba, vayi zibudingi meso mama e. 31 Muaki beto tuzebi ti Nzambi kawilanga bankua masumu ko vayi enati mutu weti kinzika Nzambi ayi weta vanga luzolo luandi buna niandi Nzambi keta wila. 32 Bila tuwilu ko ti mutu wuzibula meso ma mutu wubutuka phofo. 33 Enati mutu wowo kasia ba kuidi Nzambi ko nganu kalendi vanga diambu dimosi ko.

34 Bawu bamvutudila :

—Ngeyo wubutukila mu masumu ayi ngeyo weka kutulonga e ?

Bankuka ku nganda.

35 Yesu bu kawa ti bankuka ku nganda ayi bu kambakula, buna wunkamba :

—Wunwilukila mu Muana Mutu e ?

36 Buna mutu beni wumvutudila :

—Tata, mutu beni nani muingi ndiwilukila mu niandi e ?

37 Yesu wunkamba :

—Wummueni, mutu wowo wulembo tubana yaku, niandi.

38 Mutu wumvutudila :

—Pfumu, nguilukidi !

Wumbuongimina.

39 Yesu wunkamba :

—Minu ndiyiza va nza yayi mu diambu di tsambusulu muingi bankambu monanga bamona ayi muingi bobo bammonanga bakituka baphofo.

40 Bafalisi bankaka baba yandi bawa mambu momo, banyuvula :

—Buevi, beto mamveto tuidi baphofo e ?

41 Yesu wuba vutudila :

—Enati luidi baphofo nganu luisi masumu ko. Vayi buabu lulembo tubi ti lulembo moni diawu masumu meno madi kaka yeno !