21
Yesu wumonikina minlonguki miandi
1 Momo bu mavioka, Yesu wubuela monikina diaka minlonguki miandi va ndambu disimu di mbu wu Tibeliadi. Tala phila kamonikina : 2 Simoni Piela, Toma baba ntedilanga kitsimba, Natanayeli muisi Kana mu tsi yi Ngalili, bana ba Zebede ayi minlonguki miodi minkaka baba va kimosi.
3 Simoni Piela wuba kamba :
—Ndiedi kuama ku loba.
Bawu bamvutudila :
—Beto mamveto tunkuenda yaku !
Bayenda, bakuma mu nlungu. Vayi builu buna basia baka kadi kima ko.
4 Buisi bu bukia Yesu wutelama va disimu. Muaki minlonguki misia bakula ko ti niandi Yesu. 5 Buna yesu wuba yuvula :
A bana, lubeki ndambu zimbizi e ?
Bamvutudila :
—Nana tata, kadi kiasa !
6 Buna wuba kamba :
—Lozanu dikondi ku ndambu lubakala lu nlungu, buna ma lubaka !
Baloza dikondi, basia nunga ko mu vumuna dikondi mu diambu di zimbizi ziwokila ngolo.
7 Bosi nlonguki wowo Yesu kaluta zola, wukamba Piela ti :
—Niowo Pfumu !
Piela bu kawa ti Pfumu, wuvuata kikhutu kiandi, bila pheni kaba ; bosi wukiloza mu mbu. 8 Minlonguki minkaka miyiza ku nlungu bila misia thama ayi disimu ko ; nduka-nduka khama yimosi yi zimetele ; mituta dikondi diba zimbizi.
9 Bu batula va disimu, bamona mbizi va yilu makala ma mbazu ayi dipha va ndambu.
10 Yesu wuba kamba :
—Tualanu ndambu zimbizi mu ziozi lubeki !
11 Simoni Piela wukuma mu nlungu, wututa dikondi ku disimu. Khama yimosi ayi makumatanu zimbizi zitatu zinnene ziwesa dikondi. Ka diambu ko zimbizi ziba ziwombo vayi dikondi disia kakuka ko.
12 Yesu wuba kamba :
—Yizanu, ludia.
Muaki kadi nlonguki wumosi kasia kunyuvula ko ti : “widi nani e ?” Bila mizaba kuawu ti niowo Pfumu. 13 Niandi veka yesu wufikama wubonga dipha, wuba kabudila, buawu bobo kavanga mu mbizi.
14 Yiza khumbu yintatu Yesu kamonikini minlonguki miandi tona lumbu kikafuluka mu bafua.
Yesu wusolula ayi Piela
15 Bu bamanisa dia, Yesu wuyuvula Simoni Piela :
—Simoni, muana Zonasi, wunzodidi viokila bumvangila baba e ?
Piela wumvutudila :
—Nyinga Pfumu, zebi kuaku ti ndieta kuzola !
Yesu wunkamba :
—Buna dikilanga bana bama ba mamemi.
16 Mu khumbu yimmuadi, wunyuvula diaka :
—Simoni, muana Zonasi, wunzodidi e ?
Piela wumvutudila :
—Nyinga Pfumu, zebi kuaku ti ndieta kuzola.
Yesu wunkamba :
—Buna sunganga mamemi mama !
17 Yesu wubuela kunyuvula diaka mu khumbu yintantu :
—Simoni, muana Zonasi, wunzodidi e ?
Piela wumona kiadi bu kabuela kunyuvula kiuvu mu khumbu yintatu ti : “Wunzodidi e ?” Buna wumvutudila :
—Pfumu, ngeyo zebi mambu moso ; ngeyo zebi ti ndieta kuzola.
Yesu wunkamba :
—Buna sunganga mamemi mama. 18 Bukiedika, bukiedika ndikukamba, bu wuba ditoko, wuba nkanganga nsinga mu luketo luaku ngeyo veka ayi wuba nkuendanga koso ku wuzola kuenda. Vayi bu wela nuna, wela nonuna mioko ayi mutu wunkaka wela kukanga nsinga mu luketo ayi wela kunnata ku mengi kuaku kuenda.
19 Wutuba mambu momo mu monisa phila yi lufua lu kela fuila, lolo kela kembisila Nzambi. Bu katuba bobo, wunkamba :
—Wundandakana.
20 Piela bu katala ku manima, wumona nlonguki wowo Yesu kaluta zola, wuba landakana. Niandi wuyekama va thulu yi Yesu ayi wunyuvula mu thangu baba ndia : “Pfumu, nani wela kuvakula e ?”
21 Piela bu kammona, wuyuvula Yesu :
—Pfumu, buevi benzi mu diambu diandi e ? Mambu mbi mela kumbuila e ?
22 Yesu wumvutudila :
—Enati thidi kazinga nate ndiela vutuka, buna ngeyo matedi e ? Vayi ngeyo ndandakana !
23 Tsangu yimuangana muidi bakhomba ti nlonguki beni kalendi fua ko. Muaki yesu kasia kamba ko ti kela fua ko vayi wukamba kaka : “Enati thidi kazinga nate ndiela vutuka buna ngeyo matedi e ?”
24 Nlonguki beni niandi wulembu telimina mambu mama kimbangi ayi niandiwusonika mawu. Tuzebi kueto ti kiambangi kiandi kidi kikiedika.
25 Muaki mawombo mankaka mavanga yesu. Enati mana kumasonika dimosi-dimosi, nganu buangu kilendi bakama ko va ntoto wumvimba kilendalundulu zibuku zioso zifueti sonoko.