1 Mu thangu yina nyadi* 14.1 nyadi : voti Guvelinele Elode, wuwa tsangu yi Yesu.

2 Wukamba bisadi biandi :

—Mutu wowo niandi Yowani Mbotiki, wufulukidi mu bafua, diawu kadidi lulendo lu vangila bikumu.

3 Bila Elode wukangisa Yowani ayi wunkangisa mu zisieni bosi wunkotisa mu nloko mu diambu di Elodiasi nketo wu khombꞌandi Filipi. 4 Bila Yowani wuba tubidilanga Elode ti :

—Wisi ko minsua mu kunkuela.

5 Elode wuba tombanga kumvondisa, vayi nkangu wu batu kaba ntinanga bila batu baba monanga ti Yowani widi mbikudi. 6 Vayi mu lumbu ki nyengo wu mbutukulu wu Elode, muana wu nketo wu Elodiasi wukina va meso ma batu bobo batumusu ayi wumonisa Elode khini. 7 Diawu kamvanina tsila mu leva ndefi ti mankamvana kima kioso kioki kanlomba.

8 Mu diambu di zindongi zi ngudi andi, diawu kankambila :

—Phani vava mu dilonga ntu wu Yowani Mbotiki.

9 Ntinu wumona kiadi kiwombo. Vayi mu diambu di ndefi yi kaleva ayi mu diambu di batu bobo bavuanda yandi va meza, buna wuvana lutumu ti bamvana wawu. 10 Buna wutuma mutu ku nloko muingi kenda zengi ntu wu Yowani. 11 Banata ntu andi mu dilonga ayi bavana wawu kuidi muana ndumba. Niandi wuyenda kuwuvana kuidi ngudi andi. 12 Minlonguki mi Yowani miyiza bonga nituꞌandi ayi mizika yawu, bosi miyenda vumbudila Yesu kipholo.

13 Yesu bu kawa nsamu beni, wukatuka kuna mu nlungu ayi wuyenda niandi veka ku buangu kikondolo batu. Vayi thangu nkangu wu batu bu wuwa wawu ; batotuka mu mavula mawu ayi banlandakana mu malu. 14 Yesu bu kakuluka mu nlungu, wumona nkangu wu batu bawombo. Wuba mona kiadi kiwombo ayi wubelusa bimbevo biawu.

15 Mu thangu masika, minlonguki miyiza va kaba ayi minkamba :

—Va buangu kikambulu batu tuidi bosi buisi bueka yila, diawu vutula batu baba mu mala muingi benda sumbi bidia !

16 Vayi Yesu wuba kamba :

—Basi mfunu mu kuenda ko, luba vananu beno veka bidia !

17 Buna bawu bamvutudila :

—Tala, mapha matanu ayi zimbizi zizole zi nlangu kaka zidi yeto vava.

18 Yesu wuba kamba :

—Lundatina biawu vava.

19 Bosi wutuma nkangu wu batu wuvuanda va biti, wubonga mapha matanu beni ayi zimbizi zizole, wuvumbula meso ku yilu ayi wuvutula matondo. Wubukuna mapha beni ayi wuvana mawu kuidi minlonguki ayi miawu mikabudila nkangu wu batu. 20 Bawu boso badia ayi bayukuta. Batota bitini bisiadidila ayi biwesa kumi bipani biodi. 21 Baboso badia baba nduka-nduka mili tanu yi babakala. Kadi tanga baketo ayi bana† 14.21 Kadi tanga baketo ayi bana : Bayuda baba kifu kitanganga kaka babakala, baba tanganga ko baketo ayi bana balezi. Tala Malako 6.44 ; Luka 9.14..

22 Ku nzimunina Yesu wutuma minlonguki miandi mu kuma mu nlungu ayi mintuaminina ku disimu dinkaka. Niandi wusiala mu sindika nkangu wu batu. 23 Thangu kamana sindika nkangu wu batu, wukuma ku mongo muingi kenda sambila va buangu ki niandi veka. Nate buisi buyila buna wukidi kuna niandi veka kaka.

24 Mu thangu yina nlungu wutula va khatitsika mbu, wunikunu kuidi mayo bila muphepi wudengana nlungu. 25 Mu thangu yi nya yi builu, Yesu wuyenda ku baba vayi wudiatila va mbata mbu. 26 Minlonguki bu mimmona wulembo diatila va mbata mbu, mimona boma ayi mituba :

—Tala nkuyu e ! Ayi mitona yamikina mu diambu di boma.

27 Bosi Yesu wuba kamba :

—Bika lukinda, bila minu kuandi ; bikanu mona boma.

28 Buna Piela wunkamba :

—A Pfumu e ! Enati bukiedika ngeyo kuandi, buna wukhamba ndiza kuidi ngeyo va mbata nlangu.

29 Yesu wunkamba :

—Yiza ! Piela wutotuka mu nlungu, ayi wutona diata va mbata nlangu muingi kenda kuidi Yesu. 30 Vayi bu kamona ti muphepi widi wu ngolo buna wumona boma. Bu katona diama, wuyamikina :

—A ! Pfumu ! Wumvukisa e… !

31 Bosi Yesu wunonuna koko, wunsimba ayi wunkamba :

—Mutu wu minu kifioti, bila mbi memitini e ?

32 Bakuma bawu buadi mu nlungu ayi vuka kimanisa. 33 Bobo baba mu nlungu bafukama va ntualꞌandi ayi batuba :

—Bukiedika widi Muana Nzambi !

34 Buna bamana sabuka mbu ; batula mu tsi Ngenezaleti. 35 Batu ba tsi yina, batembikisa tsangu mu zunga kina. Bosi batu bannatina bambevo ziawu zioso. 36 Banleba ti kabika basimba kaka tsongi yi yunga kiandi. Babo bobo bansimba babeluka.