1 Bilumbu bisambanu bu bivioka, Yesu wubonga Piela, Zaki ayi Yowani khomba Zaki ayi wuba nata ku yilu mongo wumosi wunda. Kuna bakala bawu veka. 2 Buna wukituka va ntualꞌawu ; zizi kiandi kieka nlezima banga thangu ayi minledi miandi mieka miphembi banga kiezila. 3 Tumbu zimbukila Moyize ayi Eli bamonikina minlonguki ; bansolula ayi Yesu.

4 Buna Piela wukamba Yesu :

—Pfumu, bulutidi mboti tukala kueto vava ! Enati tidi, ndieka tunga zinzo zitatu zi ngoto : yimosi mu diambu diaku, yimosi mu diambu di Moyize ayi yimosi mu diambu di Eli.

5 Buna wukidi tubi, dituti dimosi dinlezama diyiza kubafuka ayi mbembo yitotuka mu dituti beni yiwakana :

—Niandi niawu Muanꞌama wu luzolo, khini yiwombo kakumbonisanga ; bika lunwila !

6 Mu thangu minlonguki miwa mbembo beni, mibubika bizizi biawu va ntoto bila boma bubabuila.

7 Buna Yesu wufikama ; wuba simba ayi wuba kamba :

—Lutelama ! Lubika mona boma !

8 Mu thangu mivumbula meso, niandi veka, Yesu kaka mimona.

9 Bu baba nengumuka mongo, Yesu wuba vana thumunu yayi :

—Lubika kamba mambu mama lumueni kuidi mutu nate lumbu Muana Mutu kela fuluka mu bafua.

10 Ku nzimunina minlonguki minyuvula :

—A bila mbi minlongi mi Mina mieta tubila ti Eli kafueti tuama kuiza theti e ?

11 Yesu wuvutula :

—Bukiedika. Eli wela kuiza ayi wela kubika mambu moso. 12 Vayi minu ndikulukamba ti Eli wuyiza vayi basi kunzaba ko ayi bamvangila mambu boso bubela luzolo luawu. Buawu bobo bela monisina Muana Mutu phasi.

13 Buna minlonguki misudika ti wuyolukila mu diambu di Yowani Mbotiki.

14 Buna batula vaba nkangu wu batu bawombo, mutu wumosi wufikama ; wufukama va ntuala Yesu ayi wunleba :

15 —Pfumu, mona muanꞌama wu bakala kiadi ! Kimbevo kisisuka kidi yandi ayi wulembo moni ziphasi ziwombo. Zikhumbu ziwombo keta buila ku mbazu voti mu nlangu. 16 Ndinnetingi kuidi minlonguki miaku vayi mikadi nunga mu ku mbelusa !

17 Yesu wuvutula :

—A beno batu ba tsungi yikambulu minu ayi yimbimbi ! Zithangu zikua ndiela kadilanga yeno diaka va kimosi e ? Zithangu zikua ndiela buela kangilanga ntima mu bila kieno e ? Lundatina niandi vava ! 18 Yesu wutemina pheve yimbimbi beni ayi yawu yitotuka mu muana. Muna yawu thangu muana wubeluka.

19 Bosi minlonguki miyiza kuidi Yesu, va bawu veka, minyuvula :

—Bila mbi beto tusi nunga ko mu kuka pheve yoyi e ?

20 Yesu wuba vutudila :

—Bila minu kifioti kidi yeno. Bila bukiedika ndikulukamba ti enati minu kieno kidi banga luteti lolo bantedilanga mutalide, nganu lulenda kamba kuidi mongo wowo : “Botuka vava, yenda kuna !” Ayi wawu wela botuka. Kuisi ko diambu luela lembakana. 21 [Vayi pheve yimbimbi yiphila yayi yeti totukila kaka mu lusambulu ayi mu kukifuisa nzala mu lusambulu* 17.21 Buku kiaki kisi ko kisonama mu minkanda minkaka..]

22 Bu bayiza va kimosi ku Ngalili, Yesu wuba kamba :

—Muana Mutu wela yekolo mu mioko mi batu 23 ayi bela kumvonda ; vayi mu lumbu kintatu niandi wela fuluka mu bafua. Buna minlonguki mitona mona kiadi kiwombo.

24 Mu thangu batula ku Kafalinawumi, batu bobo baba futisanga phaku yi Nzo Nzambi bafikama vaba Piela ayi banyuvula :

—A buevi, Nlongiꞌeno kafutanga ko phaku yi Nzo Nzambi e ?

25 Piela wuvutula :

—Nyinga, weta futa. Piela bu kakota mu nzo ; Yesu wuntuaminina :

—Buevi wumbanza Simoni e ? Banani beti futa ziphaku kuidi mintinu mi ntoto e ? Bana bawu voti banzenza e ?

26 Piela wuvutula ti :

—Zinzenza.

Bosi Yesu wunkamba :

—Diawu bana balendi futa phaku ko ; 27 vayi mu diambu tubika kotisa divuda mu batu baba. Yenda ku mbu, loza nziolo mu nlangu ; benda mbizi yitheti yimbakana, zibula munuꞌandi, buna ma wumona vanzi. Bonga kiawu ayi wuba vana mu diambu di futa ziphaku zi beto buadi.