1 Yesu wuba yolukila diaka mu zinongo. Wuba kamba :

2 —Kipfumu ki Diyilu kidedikini banga ntinu wumosi wusadisa nyengo mu diambu di dikuela di muanꞌandi wubakala. 3 Wutuma bisadi biandi mu kuenda tedi batu bobo batumusu ku nyengo ; vayi batu beni bamanga kuawa kuiza. 4 Wubuela tuma diaka bisadi binkaka ayi wuba kamba :

“Lukamba kuidi batu bobo batumusu ku nyengo ti mbeni kubika bidia ; phondisidi zingombi ziama ayi bibulu biama bi mafuta ; bima bioso bikubimini. Yizanu ku nyengo dikuela !”

5 Vayi batu bobo batumusu bamona mambu beni maphamba, bosi kadika mutu wuyenda kuandi : Wumosi ku tsolꞌandi, wunkaka ku kita kayenda. 6 Bobo basiala ; bakanga bisadi biandi ; babayamisa ayi babavonda.

7 Buna ntinu wufuema ngolo ayi wufidisa masodi mandi mu vonda mimvondi beni ayi muvika divula diawu. 8 Bosi wukamba bisadi biandi :

“bidia bi nyengo wu dikuela bikubimini. Vayi batu batumusu basi bafuana ko. 9 Diawu yendanu mu ziphambu zi zinzila, tumisanu batu boso lummona muingi biza ku nyengo wu dikuela.”

10 Bisadi biyenda mu zinzila ayi bakutikisa batu boso bobo bamona ; batu bamboti ayi bambimbi ayi nzo yi nyengo wu dikuela yiwala. 11 Ntinu bu kakota mu tala batu bobo baba mu nzo yi nyengo, wumona mutu wumosi wukambu vuata minledi mi nyengo wu dikuela.

12 Buna wunyuvula :

“A nkundi ama ! A buevi kotidi vava ngeyo kambulu vuata minledi mi nyengo wu dikuela ?” Vayi mutu beni kasia baka divutula ko.

13 Buna ntinu wukamba bisadi biandi :

“Lunkanga malu ayi mioko ; lunloza ku nganda kuidi tombi, kuna kuidi bidilu ayi nkuetosolo wu menu.”

14 Bila batumusu badi bawombo vayi bobo basobulu badi bafioti.

15 Buna Bafalisi bayenda ayi bafindana ziphaka bawu na bawu mu tomba diluaku di buidila Yesu mu mambu momo kalenda tuba niandi veka. 16 Bamfidisila minlonguki miawu ayi batu ba dikabu di Elode. Batuba :

—A Nlongi, tuzebi mboti ti ngeyo widi mutu wuntubanga kiedika, weta longa nzila yi Nzambi mu kiedika ayi wumonanga mutu boma ko bila wutalanga bizizi bi batu ko. 17 Wutukambi buabu kani buevi wumbanza mu diambu diadi : minsua midi mu futa phaku kuidi Sezali voti nana ?

18 Vayi Yesu wuzaba mayindu mawu mambimbi ayi wutuba :

—A bankua mayuya, bila mbi lukumfiedila e ? 19 Mbonisanu zimbongo ziozi lumfutilanga phaku ! Buna bannatina denali* 22.19 denali : yiba zimbongo zi bisengo. Tala mu Matayi 18.28. kimosi.

20 Bosi wuba yuvula :

—Zizi kiaki kinani ayi bisono biabi bi nani e ?

21 Bavutula ti :

—Bi Sezali.

Buna Yesu wuba kamba :

—Diawu luvana bi Sezali kuidi Sezali ayi bi Nzambi kuidi Nzambi !

22 Babo basimina buwombo bu bawa bobo ; bambika ayi bayenda kuawu.

23 Muna lumbu beni kuandi, Basaduki, bobo beti tuba ti batu bafua balendi fuluka ko, bayiza kuidi Yesu ayi banyuvula :

24 —A Nlongi, Moyize wukamba ti bakala dikuela bu kafuidi, enati kasi buta bana ko buna khombꞌandi kafueti vinginina nketo wowo kabikidi muingi kabutila khombꞌandi wufua bana. 25 Vayi tuba ayi tsambuadi di bakhomba zi babakala. Muana wutheti wukuela nketo, wufua ayi kasia buta bana ko. Wubika nketoꞌandi kuidi khombꞌandi. 26 Buawu bobo buvangimina kuidi khomba yoyo yimmuadi ayi yintatu nate kuidi yoyi yi tsambuadi. 27 Ku nzimunina nketo beni mamvandi wufua. 28 A buna mu lumbu ki mfulukulu nketo beni wela ba wunani mu bawu tsambuadi bila bawu boso bankuela e ?

29 Yesu wuba vutudila :

—Lulembo kukivuni bila lusi zaba Masonoko ko ayi lusi zaba ko lulendo lu Nzambi. 30 Ku nzimunina yi mfulukulu. Batu balendi buela kuelana ko ayi kuedusu ko vayi bela ba banga zimbasi mu Diyilu. 31 Vayi mu diambu di mfulukulu yi bafua, lutengi ko mambu ma lukamba Nzambi : 32  Minu ndidi Nzambi yi Abalahami, yi Isaki ayi yi Yakobi e ? Nzambi kasi Nzambi yi batu bafua ko vayi Nzambi yi batu badi moyo.

33 Nkangu wu batu bu wuwa bobo basimina ngolo mu malongi mandi.

34 Bafalisi, bu bawa ti Yesu kangisidi miunu mi Basaduki, bakutakana va kimosi. 35 Buna wumosi mu bawu wuba nlongi wu mina, wuyiza kumfiela. Buna wunyuvula :

36 —A Nlongi ! A Muina mbi wulutidi mu Mina mioso e ?

37 Yesu wumvutudila :

—Zola Pfumu Nzambi aku mu ntimꞌaku woso, mu muelꞌaku woso ayi mu mayindu maku mamo. 38 Wowo muina wulutidi ayi wawu wutheti. 39 Wummuadi wudedikini banga wowo wutheti wawu wawu : Zola ndiaku banga bu weta kukizodila ngeyo veka. 40 Mina mioso ayi malongi ma mimbikudi madi mu Mina miami miodi.

41 Bafalisi bu bakutakana va kimosi, buna Yesu wuba yuvula :

42 —Buevi lumbanzila mu diambu di Klisto ? Widi Muana nani e ? Bamvutudila :

—Widi Muana wu Davidi !

43 Buna wuba kamba :

—Buna buevi Davidi, mu lutumu lu Pheve, kantedila Pfumu e ? Bila niandi wutuba :

45 Diawu, enati Davidi wuntedila “Pfumu” buna buevi kafueti bela muanꞌandi e ?

46 Kadi mutu wumosi kasia nunga ko kumvutudila mvutu. Ayi tona lumbu beni, kadi mutu wumosi kasia buela nunga ko mu kunyuvula diaka biuvu.