Minkunga 18
Matondo bu wukhula
Nkunga Davidi, kisadi ki Yave, kuidi Pfumu minyimbidi. Wuyimbila nkunga wawu mu diambu di Yave mu thangu Yave kankula mu mioko mi bambeni bandi ayi mu mioko mi Sawuli.
1 Yave, ndikuzolanga, ngeyo zingolo ziama.
2 A Yave, niandi ditadi diama,
tinunu kiama ki ngolo,
ayi ngeyo nkudi ama.
Nzambi ama, niandi ditadi diama ;
mu niandi ndintombila suamunu,
niandi nkaku ama, ayi phoka yi phulusu ama,
ayi tinunu kiama ki zangama.
3 Ndiela tela Yave, niandi fueni mu zitusu
ayi ndiela vuka mu bambeni ziama.
4 Minsinga mi lufua mimfietikisa.
Bosi khuka nlangu yimbunganga yimbuila mu kinzimbukila.
5 Minsinga mi tsi bafua minzingalakana.
Mintambu mi lufua mi lekama ku ntualꞌama.
6 Mu ziphasi ziama, nditela Yave
Ndiyamikina kuidi Nzambi ama mu tomba lusadusu
wuwa mbemboꞌama tona kuna nzoꞌandi,
ayi yamikina kuama kutula va ntualꞌandi,
mu matu mandi.
7 Buna ntoto wunikuka ayi wutita.
Zifondasio zi miongo zinikunu
ayi zinikuka, bila wuba wufuema ngolo.
8 Muisi wutotuka mu mayilu mandi,
ayi mbazu yi nlalikisanga yitotuka mu munuꞌandi ;
muawu mu totukila makala ma mbazu.
9 Wukulula diyilu ayi wukuluka,
ayi matuti ma ndombe maba ku tsi malu mandi.
10 Wukuma va yilu kheluba ayi wudumuka.
Wuvevumuka va yilu mavavi ma phemo.
11 Wukitula tombi buangu kiandi kisuamina ;
kapu andi yiba kunzungidila,
tombi kinokisa mvula yi matuti ma diyilu.
12 Mu kiezila kiba va ntualꞌandi mutotukila matuti,
mvula yi matadi ayi zitsiemo.
13 Yave wuduma tona mu Diyilu ;
mbembo yi Nzambi yizangama yiwakakana* 18.13 Minkanda minkaka mibuela mvula yi matadi yinoka, makala ma mbazu madoduka..
14 Niandi wuloza madionga mandi
ayi wusasikisa bambeni ;
zitsiemo zinneni
ayi wuba zimbikisa nzila.
15 Tsi nlangu yi mbu yimonika,
ayi zifondasio zi ntoto zimonika
ngeyo Yave bu wutema mu phemo yitotukila mu mayilu maku.
16 Wunonuna koko kuandi tona ku yilu
ayi wutsimba,
wuthotula mu minlangu minneni midi thipula.
17 Niandi wukhula mu mbeni ama yingolo,
ayi mu batu bobo bandenda
bila bawu bandutila ngolo.
18 Bawu banduanisa mu lumbu ki ndiba mu mabienga,
vayi Yave niandi wuba singumunu kiama.
19 Niandi wuthotula ayi wuthula va buangu kikambulu tsisi ;
wukhula bila khini kaba monanga mu minu.
20 Yave wuphangidi bobo boso buididi busonga buama ;
wupheni mfutu boso buididi vedila ku mioko miama
21 Bila ndikebidi zinzila zi Yave
ayi ndisia tamba Nzambi ama mbusa ko
mu diambu di vanga mambimbi.
22 Mina miandi mioso midi va ntualꞌama
ayi ndisia vengama ko mu zithumunu ziandi.
23 Ndiba mutu wukambu tsembolo va ntualꞌandi
Ndikikeba mu diambu di masumu.
24 Yave wupheni mfutu boso buididi busonga buama,
boso buididi vedila ku mioko miama
va ntuala meso mandi.
25 Kuidi mutu widi wukuikama,
ngeyo wukukimonisanga wukuikama.
Kuidi mutu wukambulu tsembolo
ngeyo wukukimonisanga mutu wukambulu tsembolo.
26 Kuidi mutu wuvedila,
wukukimonisanga wuvedila.
Kuidi mutu wumbimbi,
wukukimonisanga wumbimbi.
27 Ngeyo wumvukisanga batu beti kukikula
ayi wunkululanga meso madi luyanu† 18.27 Minsekudi minkaka minsadila luniemo va buangu ki luyalu..
28 Ngeyo a Yave, keba muindꞌama wuba wulema
A Nzambiꞌama, kitula tombi kiama ;
kikituka kiezila.
29 Mu lusadusu luaku
ndilenda nuanisa nkangu masodi,
va kimosi ayi Nzambi ama,
ndilenda dumuka baka kikunzama.
30 Kuidi Nzambi, nzilꞌandi yidi yi fuana,
mambu ma Yave madi ma kiedika.
Niandi nkaku wu batu boso bobo
bansuaminanga mu niandi.
31 Bila nani Nzambi, enati ka Yave ko e ?
Ayi nani ditadi di ngolo,
enati ka Nzambi eto ko e ?
32 Nzambi, niandi wukuphananga ngolo
ayi wunkitulanga nzilꞌama yi fuana.
33 Wunkitulanga malu mama banga malu ma tsesi,
ayi wukuthelimisanga va bibuangu biama bizangama.
34 Wunlongisanga mioko miama mu nuana mvita,
mioko miama milenda leka mbasa wusengo.
35 Wuphana nkaku aku wu ndungunu,
ayi koko kuaku ku lubakala kukhindisa
ayi wukuluka mu diambu di kukhitula mutu wunneni.
36 Ngeyo wukubikidi nsolo wuyalumuka
ku tsi bitambi biama,
muingi bikodi biama bibika visuka.
37 Ndikuka bambeni ziama
ayi ndizibakidila.
Ndisia vutuka manima ko enati ndisia mana kuzivonda.
38 Ndiba kosikisa ayi basia buela baka bu telimina ko ;
babua ku tsi malu mama.
39 Ngeyo wuphana zingolo zi nuanina mvita ;
Ngeyo weti komvika batu beti kundenda
ku tsi malu mama.
40 Ngeyo wuntinisanga bambeni ziama
va ntualꞌama
ayi ndibunga bobo bakundendanga.
41 Bayamikina mu tomba lusadusu,
vayi kadi mutu mu kuba vukisa.
Bayamikina kuidi Yave
vayi kasia ku bavutudila mvutu ko.
42 Ndiba kosikisa banga mbungi-mbungi
yeti vevumunu kuidi phemo.
Ndiba loza thama banga nyamba wu zinzila.
43 Wukhula mu minzonza mi batu,
ayi wukhitula ntu wu makanda ;
batu bobo ndisia zaba ko, bawu ndiela yadila.
44 Bu batumbu kungua bathumukina ;
banzenza zikikulula va ntualꞌama.
45 Zinzenza zilembo vongi,
balembo titi sumbu bantotuka mu bibuangu biawu bisuama ngolo.
46 Yave wulembo zingi
Nzitusu wuba kuidi ditadi diama
yayusu kuba kuidi Nzambi Mvulusi ama.
47 Niandi Nzambi wukuphutudilanga landi ;
ayi wutula makanda ku tsi luyalu luama.
48 Wuphukisa mi bambeni ziama,
Ngeyo wundiayisa va yilu batu bobo bandenda.
Ngeyo wukhula mu batu ba matsita.
49 Diawu ngeyo Yave, ndiela ku zitisa
va khatitsika makanda.
Ndiela yimbila minzitusu mu diambu
di dizina diaku.
50 Niandi wuvana ndungunu yinneni
kuidi ntinu andi
ayi wummonisanga mamboti mandi ma ngolo kuidi mutu andi kavinda mafuta‡ 18.50 Mutu kavinda mafuta voti kusua ki Yave mu minkanda minkaka.,
kuidi Davidi ayi nkuna andi mu zithangu zioso.
*Minkunga 18:13 18.13 Minkanda minkaka mibuela mvula yi matadi yinoka, makala ma mbazu madoduka.
†Minkunga 18:27 18.27 Minsekudi minkaka minsadila luniemo va buangu ki luyalu.
‡Minkunga 18:50 18.50 Mutu kavinda mafuta voti kusua ki Yave mu minkanda minkaka.