6
1 Timi bi kpaan Uwumbɔr chee ki tun waatuln na le gaŋni nimi, ni taa gaa Uwumbɔr aaterm yɔli. 2 Uma Uwumbɔr le len ke,
“Naah ŋeer pu na, le m pel saameen.
Bundaln ni ŋeer ke m gaa si lii na, le m ter si.”
Li pel man, din le ni ŋeer. Din le ye n‑yoonn mu u ga gaa si lii na.* : Lik Aisaya 49.8.
3 Taa ŋani tiwan ni ga leŋ unii ubaa Uwumbɔr aasan ni na, aan ubaa taa len ke timi aatuln kpa taani. 4 Timi aabimbin aah bi pu na, nima le mɔk binib ke ti ye Uwumbɔr aatutum. Kinye pu? ti kan falaa, ni limukl, ni tibɔr, ki ji limɔr, ni mɔmɔk ponn ni. 5 Binib lue timi ŋinaalab, ki laŋ timi tiyondir ponn ni, ki ŋma tijar ti pu. Ti tun lituln linimaln, kaa geeni kinyeek, ki lann tijikaar. 6 Timi aabimbin bi chain la. Ti bee Uwumbɔr aabɔr, ki kpa limɔr, ni tibulchinn, ki gbii Uwumbɔr Aafuur Nyaan, ki gee binib mbamɔm, 7 ki tuk bi Uwumbɔr aabɔr ti ye mbamɔn na. Ti kpa Uwumbɔr aapɔɔn. U len ke timi aabɔr ŋan, nima le ye tijawan ti bi tiŋangii ni tiŋangan ni na. 8 Binib bibaa nyuŋni timi, bibaa mu seei timi. Bibaa bii timi, bibaa mu pak timi. Bibaa len ke ti ŋmanni binib la. Le ti tee len ibamɔn. 9 Taa kpa liyimbil binib chee. Ti kpa liyimbil Uwumbɔr chee la. Nkun dii timi, le ti beenin bi. Uwumbɔr cha falaa pii timi, ki mu aa cha u ku timi. 10 Tisui bii la. Yesu pu, le ti kpa mpopiin n‑yoonn mɔmɔk. Ti ye bigiim la, le ki ŋa binib pam biwankpadam Uwumbɔr chee. Taa kpa dulnyaa wee ni aawan nibaa, ti kpa paacham aawan mɔmɔk. Nimina mɔmɔk le mɔk ke ti sil ye Uwumbɔr aatutum.
11 Nimi Korint aatiŋ aanib, ti tuk nimi tiponn ni aabɔr mɔmɔk. Ti gee nimi sakpen. 12 Naa ye ke timi le aa gee nimi. Ni ye ke nimi le aa gee timi. 13 M len nimi ke uja aah ga len waabim pu na. Ni li gee mi man, ke maah gee nimi pu na.
Ni taa dii binib bi kaa dii Yesu Kristo na aasan
14 Ni taa kpaan binib bi kaa gaa Yesu ki kii na chee man. Binib bi ŋan na, ni binib bi kaa ŋan na ga ŋmaa kpaan tɔb chee ee? Nwiihn ni mbɔmbɔɔn ga li ŋmaa kpaan bi ii? 15 Kristo ni kinimbɔŋ ga li ŋmaa kpaan kimɔbaan aa? Unii u dii Yesu aasan na, ni unii u kaa dii na aabimbin kpaan aa? 16 Uwumbɔr aadiik ni ŋiwaa kpaan aa? Naa kpaan. Timi le ye Uwumbɔr u ye limɔfadaan na aadiik. Uma ubaa le nan len ke,
“M ga li bi maanib aasui ni, ki chuun bikaasisik ni.
M ga li ye Baawumbɔr, bi mu ga li ye maanib.”† : Lik Liifai Yaab 26.12; Jeremia 32.38; Esekiel 37.27.
17 Nima le cha Uwumbɔr ki bui ke,
“Nya binib bi kaa dii mi na ponn ni man, ki li bi nibaa,
ki di cha titunwanbir, le m ga gaa nimi.‡ : Lik Aisaya 52.11.
18 M ga li ye Nite;
ni mu ga li ye njapɔtiib ni mbisatiib.§ : Lik 2 Samuel 7.14; 1 Bibɔrb Aabɔr 17.13.
Min Uwumbɔr u kpa mpɔɔn mɔmɔk na, le len kina.”