John Nunda Reta Soroda Gefusira, Amo Eviri.
Nunda reta einda jokáda, John nunda javo jo isagha gembaeri, avata evetu genembo da kotari mo, John nu reta evia gefusira. Namanenda kotari mo, nu gitofudae oju use, nunda javo jo isagha gembaeri. Kau daba aminga ava, nu ategi use, “nanda ghasovuko” sisira amo, nu ekaresia+ eni ava kotise, nunda javo kivo use, aminge sisira.
Geka teria beká tuturoda gefusira amo, eviri. Kuristini da tumondari bekári: Iesu jo asisi vanemboimi furae usira, nu tamoghae dabade fusira. Avata kotugo, nu jo ‘genembo eveva’ vanembo iraeri. Numo, God beká, a kotugo genembo bekári. Ava ijuguse, John reta evia gefusira.
1
1 Arie, nanda ghasovuko!
Na ninda begori. God ni gategetiri nunda natofo jokáda iresa. Na ni ategi beká ava erena. Yari budo gi!
Ninda sasingu barago ategi erena. Na, ne dubo bu gogoghomberaena. Kotugo, jo nasuka nane ne dubo bae eraena. Evetu genembo isambu mave geka beká kasama edo irera aimi, eredo, ni ninda sasingude dabade ne dubo buraera. 2 Ne dubo buraera da susu mo: geka beká namondeda dubo jokáda irira, a kotugo evovodae irarira.
3 God Afa a nunda Mandi Iesu Keriso, namondekena geka beká futuse a joka use, namonde dubo ruruse, nenda sonemba a dubo jama mutoro namonde baore! Yari budo givu!
4-11 Namonde Tofo Tofo Dubo Baeteri.
4 Ninda sasingu mendeni, Geka Beká ainda amboda amboda ero ningido, na ivuga beká ava useni. Ne, God Afa rea aoro dae sisira, ava eraera. 5 Avori, nanda ghasovuko, na ni dubo ruruse, eminge resena. Namonde tofo tofo dubo ruruse irore! Amo jo agho dari seka eni iraeri. Amo, tuturoda ghe sero niningudo refera, daba avori. 6 A dubo bari setena ava ari sarera amo, namonde God da agho dari ava kaifa use irarera! Agho Dari resena emo, tuturoda sido fusera, daba avori: amo, namonde tofo tofo dubo ruruse irarera!
7 Derari kakato digari, ne vasada ghe buvudo era reighi mendeni mendeni aminda irise, nenda ijuga sembae ava ijugeraera. Aminguse, Iesu Keriso namondeda tamo evia budo siroredo, genembo beká usira ava, ne ighagha eraera. Evetu genembo amo, ne evetu genembo mendeni dederuse, Keriso kena gitofu eraera. 8 Nenda dubo joká totofo kaifa aovo dae sise resena. Erama God nemokena mino mutari erekotira ava, kosasagheove! Nenda saramana eraeva ainda mino ava, isambu baovo dae sise resena.
9 Mave Keriso da ijuga darigedo, dombu eni ijugarira amo, nu God da jebuga jo bae arira. O mave Keriso da ijuga tumonduse irarira amo, nu God Afa nunda Mandighaekena jebuga barira. 10 Evetu o genembo mave ijuga dombu eni budo nemokena furarira amo, erama nundae nati joká dedo bu kaifa use tavo eove! Nu erá itako ategi eove! 11 Ainda beká mo: mave nu ategi arira amo, nunda ijuga a ari sembae ava sonembuse arira.
12-13 John Evetu Genembo Ategi Edo, Tano Usira.
12 Na nimokena geka digarigo gembaeteni. Avata na retada gembari imboe erena. Nanda uju mo, na ya nimokena buvudo, nangae dombu dabade edo, geka dabade se nininguse ivuga beká ava aeteri. Yari budo gi!
13 Ninda dubo bari gagarako God gategusira, ainda sasinguimi ni ategi erera. Yari budo gi!
Avori, nanda geka tano eviri.