37
Ari Ekoko Embo Vasa Ekoda Iruroro, Ari Eveva Embo Vasa Eveva Da Yarera.
1 Erá ari ekoko embo rea arera aindae, mema use, kotari futo eove!
Ari ekoko ari kakato rea arera aindae, erá bengoso futo eove!
2 Ai resira amo, kau kikisa gharasa edo aviraira, ne aminga ava use, totoi nembo manje tefo arera.
Kotugo, vive gharasa edo aviraira aminga ava, ne ambu tefo arera.
3 Tumondari isambu Bajari kena fifituse, ari eveva nembo edo ghevu!
Amingareva, ne nenda enda nane futusena aminda irise, mema eni tefo, dubo jamaghae irareva.
4 Ninda ivuga Bajari kena bari dae kotise iraresa amo,
ninda janje jokáda rea uju beká use koteraesa ava, nune mutari baresa.
5 Ninda kotari a uju isambu Bajari da ungoda fiti!
Tumondari isambu numokena fifitururaso, nune sonembarira.
6 Nune ari, ninda irari dambugo beká, kau isonga iji janimberaira aminga ava use, ijugururari isagha ari natofo garera.
7 Erá, evetu genembo ari ekoko ururoro nenda gugua nanjogo dige fasarira,
o evetu genembo mave dara ari dae manaka gayeraera aindae, janje takegha eure!
Durumugedo Bajari sonembari dae, gigita use iri!
8 Nimokena dubo mema futo ari, o janje eko ari avaga erá afigeuri fureure!
Roera avavagaimi dara undiari siroreraira.
9 Evetu genembo mave nenda tumondari Bajari kena fifituse irá gheraera aimi, enda nene tofo arera.
O ari ekoko embo mo, ondari do buvarera.
10 Ari ekoko embo mo, totoi manjarera.
Nemo gari dae kakova aresa, avata ne itako jo tambae aresa.
11 O tumbari embo aimi enda nene budo, gugua ghayafade edo, ririaghae irarera.
12 Genembo ari ekoko ari kato aimi genembo eveva ava ambare dae aito use, imboe gamboe use,
ababa gambu bainbaingheraira.
13 Avata, Bajari ari ekoko ari kakato aindae gegha jiraira.
Ainda susu mo, nemo sosighi ari da sifo utua ari dae erira ava, nu kasama erira.
14 Ari ekoko embo nene eredo, makasi a jarutari embo,
kotugo evetu genembo aito eveva fugeraera ava isambu, dedo gaedo ghaoro amboro dae sise,
nenda isoro da kaiya jigheoro erorureari, a nenda feva jighi otomberaera.
15 Avata, God nenda feva jighi joredo, totofo nenda isoro da kaiya aimi nemoa jari ambarera.
16 Genembo eveva ainda gugua jo anjaga iraeri, avata eveva use irá gheraira, ava sedo, ivuga tambarira.
O ari ekoko embo mo, nenda ghayafa digarigo, avata ekoko use irá gheraera aindae, ivuga jo tambae arera.
17 Ainda susu mo, Bajari nune ari, ekoko embo da fakina, ava dadabarira.
O evetu genembo eveva da mo, nune gagara arira.
18 Evetu genembo Bajari da sari ava nembo eraera amo, nune kaifa tavo eraira.
Kotugo enda nene anumbirera amo, evovodae nenda tofodae barera.
19 Baimara sifoda ne jo mema itatama use, meka gae arera.
Baimara sifoda ne inono beká irarera.
20 O ari ekoko embo mo, ambu tefo arera.
Bajari dae osogo ari kakato mo, manjarera.
Kau vare joka gharasedo dore dudurugeraira, amingari garera.
A kau imbosi yauraimi bu ghumbu irureari dadaberaira, ava arera.
21 Genembo ari eko ari kato roera se bambudo, mino jo mutae eraira.
O genembo ari eveva embo mo, kavevera use nunda gugua soro eraira.
22 Evetu genembo mavejoa Bajari esimbugarira, aimi
enda nenda tofodae barera.
O evetu genembo mavejoa nune simbora arira amo, ondari buvarera.
23 Evetu genembo da emboro mo, Bajari nune ijugeraira.
Evetu genembo nune uju eraira ava, nu gagara eraira.
24 Ne ata de fokugharera amo, ne jo du burudughe fasae arera.
Ainda susu mo, Bajari nune jijighururari, totoi erarera.
25 Na bajido ghousago iriani. Ava oroko na genembako eteni.
Avata, Bajari genembo eveva ava jo doyari na gaeri.
Kotugo, nunda sasingu barago, bayaudae benunu sise, deinghururoro jo gaeri.
26 Genembo amo sifo ghousa soro vesa use, kokomana rejudae benunu sarera, sonembarira.
God genembo amo esimbuguse, sasingu mutari barira.
27 Ari ekoko da ari amo dodo, ari eveva vanembo use irareva amo,
nenda imemesiri gamemisiri sifo ghousa enda eminda irarera.
28 Ainda beká mo, Bajari ari dambu aindae uju use,
natofo nunda sari ava eraera aikena, gukai jo mutae arira.
Nemo evovodae nune gagara eraira.
O ari ekoko embo da imemisiri gamemisiri mo, nune ondari darigarera.
29 Ari eveva gaveva embo aimi enda nenda tofodae budo, aminda dighi anumbedo evovodae irarera.
30 Genembo eveva mo, nu geka evevago a kotofu geka ava seraira.
Nu rea eraira, ava evetu genembo isambukena inonoda inonoda eraira.
31 Nu God da Agho Dari ava bu nunda janje jokáda fiti kaifa use,
jo sifo nanjigo emboro kosasaghedo, ajagha yae eraira.
32 Ari eko embo mo, genembo eveva ava dari ambare dae sise,
kato use irá gheraira.
33 Avata, Bajari genembo eveva amo jo itako doyari, nunda gitofu da vaghoda terae arira.
Aminguse, koto ari sifoda jo doyari, genembo eveva amo mema tambae arira.
34 Nenda gigitari isambu Bajari kena fifituse, nunda sari ava edo ghevu!
Amingururovo gido aindae, ne kakara use, enda nemokena mutari bareva.
Budo gosururovo, ari ekoko embo God nune ondari darigarera.
35 Anakora na genembo ghambura, geka ningae tambuno ava gosuseni.
Nu kau Lebanon da beriberiya aminga ava use, ika mendeni do darige viti ikáda vagheraira.
Aminguse, evetu genembo digari ava nune kateyavara edo ghusira.
36 Avata amboda, na sekago aminda buvudo, nu jo aminda irari gaeri.
Na numoa gari dae kakova usena, avata nu jo itako tambaeri.
37 Genembo eveva ava gi gogoghombaresa, a genembo ari dambugo ava kote garesa.
Ai resira amo, genembo mainugarighae irá gheraira, ainda imemesiri gamemisiri digari sirorarera.
38 O, ari ekoko ari kakato mo, God nune dari amomonjegarera.
Kotugo nenda imemisiri gamemisiri barago vekaghae musarera.
39 Bajari gegenembo dambugo ava, dara sifoda nune gagara use sonembeari jebugeraera.
40 Ne ambo numokena sosiroro, nune ne sonembuse, darakena saighimbe buraira.
Nune nemoa ari ekoko embokena saighimbe bu darigeari jebugeraera.