45
Kini Evetu Fifitusira Da Yaruri.
1 Na kini da javoda nanda duboda yaru eveva gaveva irira, aimi gate divarena.
Gembono dae sise, nanda kotari geka eveva gavevaimi bedo erira.
Buku gembari kato nunda sonemba susufikena buraira aminga ava,
nanda aviva aimi na sonembari kini da yaru gembarena.
2 Gegenembo iritirera ainda jokáda, genembo mendode sovode beká nimori.
Nimo geka seoso ghamo beungheraera. Sifo ghousa God nimoa esimbugeraira.
3 Nanda kini fakinago, gogho use, ninda isoroda kaiya ifuda dighi. Ai bekári, ni duroghaeri.
4 Kini da aito fugari ava fugutuse, ninda isoro kakato da giti jighido,
evetu genembo nanjogo geka bekáda bekáda seraera, a ari bekáda bekáda eraera ava sorise,
ninda gitofu sosighi e baresa. Ninda fakinaimi ninda gitofu de atai fati fetaresa.
5 Ninda feva da goroba isambu sighonogori, aimi ninda gitofu da gomoda gayeraesa.
Oro oro irera, a isambu ninda ata duruda du fafasegeraera.
6 God nimokena kini da anumba vasa futusira, ainda fakina jo nanjigo dadabae arira, evovodae irarira.
Ninda natofo inonoda kaifa eraesa.
7 Ni ari dambu beká ava uju use, ari ekoko mo, gari imboe eraesa aindae,
God nine tumonde baingheraesa aimi, nimoa gategedo, usu muká ninda jiroda avereguse,
nunda ivuga barago, mutiri itatama use iresa. Kini eni nunda ivuga avavaga jo bae irira.
8 Ika moor (myrrh) a alo (aloe) a kotugo kásia (cassia) jasisera,
ainda muká muno futo ava ninda embo boka aimi muno yavegeraira.
Kini da kambo Sino fuka elefanti (elefant) da kore aimi gogho usera aminda, yaru didivururoro umo aresa.
9 Ninda kaifa kakato totorugetera ainda jokáda, kini mendeni da ade jamena ojighera fetirera.
Ninda avo anumba ainda ungo gimandukena ninda datu gagara, ninda evetu seka ereruresa,
aimi fetirira. Datu gagara ainda gogho mo isambu goldi (gold) numo bekáimi ariri.
10 Arie Kini da Datu Gagara, oroko dengoro indari dae erena, ningi!
Kini kena vai edo, ninda natofo a kotugo nano namendi dodo, ninda kotari irari sekakena fitaresa.
11 Ni eveva gagara aindae kini sereregharira, ninda bajari numori, ava sedo nunda sari ava edo ghe!
12 Bogu nati Tyre seraera aimi ninda dombu doruse, fuyo fitarera.
Kokotofu susu iti fafode nanjogo iritirera barago, ninda dombu darera.
13 Arie! Kini da datu gagara kini da kamboda teteriri eregosera!
Nunda embo duroghae amo, goldi (gold) imi arigo firiseri.
14 Kini da datu gagara amo nunda embo gembari gegembaghaeimi avido irurari,
nunda ade jamena tamo sandi iruroro, ne isambu unumbe bu yaoro kini kena terarera.
15 Ne ivugaghae riria use foa kinida kamboda terarera.
16 Arie nanda kini, nimokena resena, ningi!
Ninda sasingu vide jamena ghagurugo sirorarera aimi, nembua maneda vasa nene budo kini arera.
Nine aso, enda da frovensi isambu ainda kini nene edo, kaifa arera.
17 Nanda yaru gembena evia sise, ninda bino jighoro eroruse irarira evovodae,
a kotugo evetu genembo isasambu sakai nindae sarera, kotugo evovodae sido yarera.
Nanda yaru gembena evia didivururoro ninda binó ivegedo irurari,
evetu genembo isambu nindae sakai sido evovodae yarera.