55
Genembo Nunda Komanaimi Aito Usira, Aindae God Numo Sonembare Dae Banungusira.
1 Arie God, nanda benunu ningi! Erá, nanda benunu resena evia imboe use, ninda dengoro gajeose!
2 Nanda benunu ningido na sonembe! Na mema itatama use, kotari tomanako futo use, garoro eteni.
3 Gitofuimi na daoro ambono dae setero ningido, ungu ata dadadagherira.
Ari ekoko emboimi na kateyavara urureoro, dubo vevera use irena. Ne namokena dara bu refera.
Aminguse, ne janje ekoghae na gari imboe eraera.
4 Na ghamo takegha erena. Na daoro ambaetena aindae oju use, gofari beká edo irena.
5 Beká resena, na ojuimi duduku dudukughuse ungu ata dadadagherira.
Nanda tamo ghaunja bambariguse, ghamo kenkenghedo gherira.
6 Namokena ungu kau rika ribo da ghabu iraeti! Na ghumbu esike yama ghamo asegaeteni.
7 Na ghumbu soka beká yama reighi evetu genembo a uvu irae da vasada iraeteni.
8 Na bibitaimi ghumbu yama, nasuka nanda jungari vasa tambu jungaeteni.
Yaura vovoga eko beká darige ya esike jungaeteni.
9 Arie Bajari, aso nanda gitofu beka soesa saore!
Ainda susu mo, reighi begaya aminda kaera tataya a titigho ari avanembo urureari giraena.
10 Kaera tataya a titigho ariimi birurughuse, sifo tumba ava, kusia bagia a dara dombu eni dombu eni bu refera.
11 Sosighi ariimi vasa isambu bedo edo irira.
Maketa vasada, kokomana katiyavaraimi a kotugo kokomana derariimi ganjimberira.
12 Gitofu eniimi namoa dere jise gegha yaruda fitaetira amo, na fakina edo fetaeteni.
O nanda vasai namoa e darigedo, totofo sakai sise na dere jiraetira amo, na numokena jungaeteni.
13 Avata genembo namokena mema bouvu erefutira, amo nimori.
Ni nanda karona, nanda ambo bego, a kotugo nanda komana beká edo iriasi.
14 Nangae kiki eveva gaveva dabade se ningido ghuseri, a kotugo God da tafaroro kamboda teredo,
tafaroro dabade edo ghuseri.
15 Bajari, aso nanda gitofu isambu evetu genembo seka irise amomonjegarera.
Aso, nenda ofofoda diti jebuga furugaoro dae resena!
Nenda ofo kambo mo ari ekokoimi bedo edo irira a nenda janje joká barago ekokori.
16 Avata namo, Bajari God kena sonemba dae kori saono, nune namoa saghimbe bari jebugarena.
17 Ataeghae, isonga a kotugo tumba evia inono nanda bouvu, mema numokena osa sise a aoro sirureono,
nu nanda banungari ningiraira.
18 Gegenembo digari futo namo daoro ambono dae eraera,
avata God na gagara urureari, na jebuga jovereghe foa gheraena.
19 Ne God jo igheghi ae irise, dubo jovereghari imboe eraera.
Ava sedo, God roera isasambu reju irira ava kaifa eraira, aimi nanda benunu ningido,
ne dedo atai duboda fatarira.
20 Nanda komana manai nunda beka gajari ava bejise, nunda kokomana ava dedo gaedo ghari dae usira.
21 Nunda geka mo nu vivigori, avata nunda janje jokáda kokomana imboe ariimi bedo usira.
Nunda geka mo, ferukogori, avata rea sisira aimi, garureari mema siroredo ghusira.
22 Nenda bouvu mema Bajari kena fiti dovu, nendae sorega nune fumbarira.
Nu jo itatako doyari, evetu genembo bekáda bekáda eraera ava, gitofuimi de atai fatae arera.
23 Avata God, evetu genembo kokomana aito use daoro ambarera, ava seka iroro,
nine rete budo foama nenda ofofoda gorogharesa.
O namo, na God nisuka nimoa tumondarena.