76
Gitofu Sosighi Ari Da Tofo God Numori.
1 God da binó Judah Frovensi aminda mindafu bekári. Israel Frovensi aminda nunda Javo kakara eraera.
2 Nunda dobo Salem o Jerusalem seraera aminda fitiri fetirira.
Nunda irari vasa ututu Saion* Afige, geka eni Saion dae gefusera, tuturo 2:6 duruda tege, garesa! aminda irá gheraira.
3 Vasa aminda gitofu da feva goroba mane ava nune fati jojorugusira, nenda bere,
a kotugo nenda isoro da kaeya mane, nenda ambi goroba isasambu ava, nune fati jojorugusira.
4 Arie God, duro usasago beká mo, nimori.
Ni doriri aminda ninda gitofu dedo, atai duboda fafatigusesa amindaghe jovereghe fuse,
ninda duró, kini (king) da gogho aminga ava asugedo deinghe refesa.
5 Nenda isoro embo da genembo fakinago beká ainda gugua ava nine sosighi e rurusesi.
Oroko mo, ne isambu ambu fafase irera. Nenda fakina kotugo nenda kasama isasambu dika irae ututusira.
6 Arie Jacob da God, nine katiyavara use seteso, hosi (horse) mane isoro embo nenda etoda anumbe sufuse,
isoro usera ainde dabade isambu du fafasedo amomonjeguseri.
7 Avata Bajari, evetu genembo isasambu nindae oju eraera.
Nine janje ekoko aresa da sifo aminda, mave eniko ninda dombuda jo fetae eraera.
8-9 Gitofuimi kateyavara ero, mema tafuse iritirera ava, sonembaso jebugaoro dae sise, ni utuda irise,
ategi ari erorusesa amo, ni reju ava ari dae kotisesa ava seteso,
endada evetu genembo isasambu oju beká use beka gotiseri.
10 Evetu genembo nu janje ekoko eraera, avata nine eoso, nindae sakai seraera.
Evetu genembo nimokena isoro tataya doyeraera aimi, ninda kirumu sifo seteso fefetusira aminda
tafaroro use, nimoa tumonde bainghedo gharera.
11 Nenda Bajari God kena rea mutari beka gagojuseva ava mutuvu!
Ne oro mendeni tinguda iritireva isasambu, numokena fuyo tige fuvu!
God nune seari natofo isambu nundae oju eraera.
12 Gavana da kokotofu nenda babojegaride, ivuga ari kakato amo nune fitiari vovosegeraera,
a kotugo nune eari kini mane binonde amo ojuimi ungo ata dadadagheraera.