84
God Da Kambo Dae Uju Beká Eraera, Ainda Gekari!
1 Bajari Fakina Isambu da Tofo, na ninda banungari kambo dae dubo ererurena.
2 Na nanangedo Bajari da Banungari Kambo jokáda iraetena, aindae uju erena!
Arie, Bajari God, evovodae irá gheraesa, nanda tamo a asisi isambuimi ivugaghae nimokena yaru seraena.
3 Arie Bajari Fakina Isambu da Tofo, nanda kini (king) a nanda God,
rika veveyako barago ninda kamboda moghá fitiraera a kaughoro barago nenda mamandi fumbudo,
ninda olta (altar) dengesida kaifa eraera.
4 Mave ninda banungari kamboda irá gheraera amo, ivuga use irera.
Ne evovodae yaru sise ninda javo jigheoro ereraira.
5 Evetu genembo mave nimokena fakina buraera amo, ne ivuga use irera,
a mave evovodae doriri Saion* Afige, geka eni Saion dae gefusera, tuturo 2:6 duruda tege, garesa! aminda yari dae uju eraera, nembarago ivuga use irera.
6 Ne govi eni uvu tefo javo Baka aminda deinghe sembi yarera amo, reighi aminda,
uvu kirikara gharira, a ghaeko sifo dadaba ururari borija tuturo edo dise, uvu sirorarira.
7 Aminguse, ne fakina rurudo yarera. Ne ya Saion buvudo, god mendeni irera nenda God beká ava,
aminda irari garera.
8 Arie Bajari God Fakina Isambu da Tofo, Jacob da God, nanda benunu ningi!
9 Arie God, namane da kini nine gategusesa ava, esimbuge!
10 Iji dabako ninda tafaroro kamboda anumbiraetena a nu evevagori,
iji 1,000 ava reighi mendeni kena irari mo, jo amingo iraeri.
Arie nanda God, ninda kambo guro bekada fetaetena amo, evevari,
jo kusia bagia ari kakato da kamboda irari amingo iraeri.
11 Bajari mo, namondeda bere a Kini usasago bekári.
Nunda kavevera a tumondari namonde kena eraira, aimi namonde esimbugeraira.
Ari eveva embokena roera eveva reju ava uju eraera, ivugaghae muturaira.
12 Bajari Fakina Isambu da Tofo, mave ni tumonderaera amo, ne ivuga use irera.