1 Saso, ninda nano namendi sekago evia kotarera! Ne babojegari a gavana da sari ava ningarera. A ari eveva isambu ari dae sedo, kato use irarera. 2 Ne jo mavedae aji sae arera. Ne edo gido, beisiga jo totoi ae arera, kokomana da uju ava use, evetu genembo isambu da dombuda durumugedo irarera. 3 Ainda tuka mo: evetu genembo mendeni rea eraera ava, namonde barago giti amingedo ghuseri. Namonde giti ari kotae kotae use a gogore use, ari ekoko edo ghuseri. Namondeda uju a fisi da uju mendeni ainda fakinaimi, namonde bundetiri iriari. Namonde sifo aminda, kokomana da bino aindae dubo ekoko use, tofo tofo aji sise, mema futuse itatamedo ghuseri. Namonde tofo tofo imboe use irá ghedo ghuseri. 4 Avata namondeda Sonemba Kato God da kavevera a dubo bari fira isagha usira. 5 Isagha usira da sifo aminda, nune sonembetiri namonde jebuga evovodae irari ava tuve ruruseri. Nu namonde sonembusira amo, jo namonde ari eveva eni aoro gido, aindae aeri. Nu taká namondedae joka use sonembari dae sedo, nunda Asisi Kakara da fakinaimi, namondeda dubo joká ava seghe simbugusira. Seghe simbugetiri, namonde jebuga seka budo, kau God da sasingu seka sirorari da kaugo edo irera. 6 Namondeda Sonemba Kato Iesu Keriso, mino futuse ambududurusira. Aindae sedo, God nunda Asisi Kakara namondekena mutiri, namondeda dubo joká bedo usira. 7 Nu aminge uju usira da beká mo: namonde nunda sonemba baoro gido, namondedae ‘eveva’ sarira. Amingari, namonde jebuga evovodae irari gigituse irera, ava barera. 8 Setena amo, geka bekári. Evetu genembo God tumonduse irera amo, ari eveva ari dae sedo, nenda fakina isambu mutarera. Ainda geka ava ijuge gogoghombaso dae resena! Aminguse irarera, amo evevari. Aimi, evetu genembo sonembarira. 9 O evetu genembo geka kotae kotae sise irera, o nombuamane reda ghe siroredo fusera, ainda kiki ava sise irera, o gekadae beisiga use irera, o Jusi embo da agho dari da tuka jungarida ava tava use irera, ava darigaso dae resena. Ari ainda jokáda, sonemba a beká eni tefori. 10 Genembo mave beisiga ururari, nano namendi aindae sarigarera amo, yasi, numokena umbu etoto naká erá amingeure dae sise buregase! Beisiga jo dodo dubo jovereghae arira amo, erá genembo ainde dabade umo gamo use deingheove! 11 Evetu genembo amingeraera amo, nenda dubo joká anakora bebeta eari irá gheraera. Nenda ari ekoko eraera aminda gosuse, kasama eraera.

12 Na eminge resena. Na yama reighi Nikapoles aminda buvudo irono, yavata tuturo edo didivudo yama doyarira. Ava sedo, na Artemas o Tychicus dirigaono ya nimokena buvari garesa amo, ni edo gido yama, na aminda tambaetesi. Yari budo gi!

13 Eni mo: ni edo gido, agho dari da kasama kato javo Zenas, a kotugo Apollos sonembururaso, ne javi edo yarera. Ne rejo ava bu yaetera amo, sonembaso ne budo yaeteri. 14 Ijugururaso, namondeda nano namendi ari eveva a kavevera ari ava use, evetu genembo mema itatameraera ava, nene sonembarera. Amingarera amo, nenda fakina jo soesa fugae arera. Ainda beká mo: saramana amo evevagori. Yari budo gi!

15 Evetu genembo namonde dabade irera eimi, ni ategi beká ava erera. Yari budo gi!

Namondeda kokomana tumondari embo, ava ategi erena. Se ningore! God nunda sonemba a esimbugari ava, ne isambukena irare!